Read Angami Naga Nehemia 6 Bible Online

Nehemia 6 - Angami Naga bible

Nehemia 6

¹Siro süki Sanbalat, Tobia mu Arabmia Geshem, siro hie ngumvümia kekreiko ae dahouu pfhelieketa mu sünu puo kepa puorei ba moketa silie tse, (süki a kharu kikhako pesieshülie mo baluo),

²Sanbalat mu Geshem-e unie mia ketseshü di sie, “Vorlie, úko Ono razhau nu rüna puo nunu kese khe” si. Derei ukoe a gei mha kesuo chüketuo rhüta.

³Süla a dieliemia ketsepie uko ki shü di sie, “Ae mhatho kezha chü ba mu a nie ki kerlie kenjüte. A kiüdi mhatho-u khawa di nie ki kertatuo mu?” sishü.

⁴Mu ukoe hamhie di va dia mia ketseshü; mu ae sükemhie tou di uko die kelashüwa.

⁵Süsie rei Sanbalat-e sükemhie va pengouu va puo kituoko dzie nunu leshü hiepieketuo puo ketseshü.

⁶Sünu thupieketuo, “Hau seyieko donu pu tuote mu süu Geshem[10] rei puya, süu no mu Judamiako mia perhieketuo rhüba; süla noe dahou-u pfheba, mu die pukeshü hau mhie ro, noe uko kediu chü nyüya.

⁷Siro noe siedzekesimia keda pie u bu Jerusalem nu n dze pushüketuo la khapie bataü si, di sie, ‘Juda nu kedimia puo bawe!’ Süla tsie die hako kemhie di kediu ki pushütatuo. Süla tsie vorlie, di keze kerüchücie” sita.

⁸Sitse a mia ketse pie puo ki lashü, “N kepu tuoikecü puo rei chüba mo, derei no n nou nu rhükelie zo” sishü.

⁹Kekreilamonyü uko pete hieko chü kemidewaketuo le di sie, “Uko dzie bu mhatho nu thachü ta di süu chülie motatuo” siya. Derei he-i Kepenuopfü, tsie no a dzieko chükemetei shücie.

¹⁰Süsie ae Mehetabel nuo Delaia nuou Shemaia, kinu puo khapfü kebau ki vor, ru puo sie, “Úko keze Ukepenuopfü kinu, rüsuo kinu kesetuo khe, sidi úko rüsuokiu khawatuo khe, kekreilamonyü ukoe theva ze nu nie dukhriwatuoü vorzhiecü la” sita.

¹¹Derei a sie, “A mhiekecü mia puo ta tuotuo me? A mhiekecü puo puo phou kelalietuoü rüsuoki nu votuoüketuo supuo ba ga? A we sünu volie lho” siwa.

¹²Mu ae si mu ngukelie Kepenuopfü puo ketseshü mo, derei puo bu siedzekesidie pu a petsoutuoü di Tobia mu Sanbalat unie puo zhakhrüshükecü la.

¹³Mharhü hau la puo zhakhrülie, süusü a bu michie di kephouma chüwa, sidi ukoe a za pu pesuo di a kengatuoükecü la zo.

¹⁴He-i a Kepenuopfü, no Tobia, Sanbalat mu Noadia siedzekesipfü, siro siedzekesi kekreiko, a pie kemichie nu shüwatuoükecüko mhatho rükrashücie.

¹⁵Sidi mhatho-u Elul khrü zha mepfüepengou nhie, zha hiepengouekenie nu chü tseilie.

¹⁶Süki hie ngumvümia pete süu silie, mu hiekhiehiemhou keba seyieko mha hako ngu tse, uko michie mu u thesuo seta, kekreilamonyü ukoe mhatho hau Ukepenuopfü thuo khruoshü di chülie zoükecü ngulieketa la.

¹⁷Sizomonyü teisozha süko nu Juda mu pehüko leshü kekra thupie Tobia tsü, siro Tobia leshüko uko ki vor.

¹⁸Kekreilamonyü Juda nu themia kekra puo ki rüse shü, puoe Ara nuopfü Shekania lie, mu puo nuou Jehohanan-e Berekia nuo Meshulannuopfü liecü la.

¹⁹Siro ukoe a mhodzünu puo mhatho dze rei pu, a dieko puo ki pushü. Mu Tobia-e a bu michietatuoü di leshü kekra ketseshü.