Read Angami Naga Nehemia 8 Bible Online

Nehemia 8 - Angami Naga bible

Nehemia 8

¹Siro khrü thenieu vorlie mu Israelko u thuo u rüna nu lhoukelie ki themiako pete keze puo chülie di Dzü Kharu mhodzünu chapfüu nu vo kengulie, sitse ukoe Ezra leshükesiu bu Mosa zho leshüdau, Jihova khapie Israel tsükeshüu se vorlienushü.

²Sitse Ezra zievo-u thezho-u se themiako kengukebako mhodzünu vorlie, thepfumia mu thenumia bu süu rünyülie di puocapuola silieketuo la; süu khrü therieu nu teisozha thenie nhie chü.

³Mu puoe Dzü Kharuu chapfüu mhodzünu khise nunu vo khinhie ketso, thepfumia mu thenumia puocapuola silie kevimiako mhodzünu nu süu phrüshü, mu themia pete u nyie kedei pie thezho leshüdau rünyülie.

⁴Siro Ezra leshükesiue sei pie kechü shadze puo nu, uko süu la chükeshüu gei thalie, siro puo khie ki Matithia mu Shema, Anaia, Uria, Hilkia mu Maseia bu puo dzie puo zatsa tha; mu puo dzie puo vitsa, Pedaia, Mishael, Malkija, Hashum, Hash-badana, Zekaria mu Meshulam bu tha.

⁵Siro Ezrae themia pete mhingu kinu leshüdau hielie; puoe themia pete mho thacü la, mu puoe süu hielie tse, themia peteko siethalie.

⁶Sitse Ezrae Jihova, Ukepenuopfü kezhau tsheshü, sitse themia pete u dzie yha di sie, “Amen, Amen” idi puo pfhekhoshü, sidi ukoe tsünge mu u zie pesoulie di Jihova rüsuota.

⁷Süsie rei Jeshua, Bani, Sherebia, Jamin, Akub, Shabethai, Hodia, Maseia, Kelita, Azaria, Jozabad, Hanan, Pelaia mu Levikoe, themiako khruohi pie uko bu thezho-u ca silie; mu themiako u tha nu tha zo.

⁸Sidi uko Ukepenuopfü zho leshüdau nunu phrü kemecietsuoishü, sidi kiüba shikecü thashü, mu uko bu phrükeshü cau silie.

⁹Süsie Nehemia, kezhau, zievo-u mu leshükesiu Ezra, mu Leviko mia pethayakecüko sie themiako ki, “Teisozha hau Jihova nie Kepenuopfü kitsatie mesa; süla thenousuo morei kra hie” sishü. Themia petekoe thezho-u dieko silie tse kratacü la.

¹⁰Süsie puo sie uko ki, “Nie cha nu volie, mha kelhe cha cülie mu mha kemou krielie, sidi mhapie mhapuorei keseliekemomia tsüshülie; kekreilamonyü teisozha hau Jihova kitsa mesa; mu nie nousuota hie; Jihova keneiu sü nie kekuou zocü la” sishü.

¹¹Süla Levikoe themiako kekha di sie, “Kemekrietalie, teisozha hau mesacü la, nie nou suota hie” isiwa.

¹²Sidi themia petekoe mhacümhakrietuoü mu mha pie huoniehuo tsütuoü mu u kenei tei batuoü u thuo u chanu vota, ukoe uko ki pukeshü dieko silieketa la.

¹³Süsie teisozha kenie nhie, thezho leshüdau nu dieko silietuoü di, themia peteko u puonuoko kinuko donu krütako, zievoko mu Leviko vor Ezra leshükesiu ki kengulie.

¹⁴Sidi ukoe Jihova die khapie Mosa tsükeshü thezho nu thupieketuo, süusü thekhrü thenie nyiu nu Israelmiako Pru[11] nu bacü mese ücü ngulie,

¹⁵mu uko bu rüna pete nu, mu Jerusalem nu hamhie di pu pesishülienushü, “Pruko[12] chüketuo la kijü khruko gei vo Oliv coko, kukuo coko, seibo kedei coko se vorliecie” isi.

¹⁶Süla themiakoe vo di süko se vorlie, sidi mia puopuokecü puo kitie nu, mu kitie zha nu, Ukepenuopfü ki kitiezha nu, mu Dzü Kharu nu, tsiu Efraim Kharu chapfüu nu, u thuo u la pru[13] chü phrelie.

¹⁷Tsiu miadie chütuo di la vorketa themia kro-u pete pru chülie, sidi pruko[14] nu balie, kekreilamonyü Nun nuou Joshua tei ki nu vor teisozha sünhie ketso Israelmiakoe sükemhiecü chü vor mota. Sidi ukoe uko nei pie mha puo chü.

¹⁸Sizomonyü teisonhie, teisozha therienhie nu vo thela nhie ketso, puoe Kepenuopfü zho leshüdau phrü sidi ukoe teisozha thenie thenyi nyi; mu teisozha thetha nhie thezho medzi di therhukenyi kehou puo kehoulie.