Read Angami Naga Nehemia 9 Bible Online

Nehemia 9 - Angami Naga bible

Nehemia 9

¹Siro thekhrü hau nu teisozha mepfüedia nhie Israelmiako kengulie di mevo, gakhropfhe dzie mu u tsügei nyophe kenhepfü bata.

²Siro Israelkoe seyie kekrei pete donu u thuo u kelakreilie, sidi siethalie di u kephouma mu u puonuoko kesuokechüko phrawa.

³Tsiu ukoe u thako nu thalie, sidi teisozhau za dia za puo pie Jihova uko Kepenuopfü zho leshüdau phrü; mu za dia za puo kekreiu pie uko kejo phra di Jihova uko Kepenuopfü rüsuo.

⁴Süki chapra gei, Leviko, Jeshua, Bani, Kadmiel, Shebania, Buni, Sherebia, Bani mu Kenani, uko pfhephra kemerie chü di kra pie Jihova uko Kepenuopfü ki shü.

⁵Sitse Leviko, Jeshua, Kadmiel, Bani, Hashabneia, Sherebia, Hodia, Shebania, mu Pethahia, ukoe sie, “Siethalie di kechachie mu kechachie ketuou Ukepenuopfü tsheliecie mu n za thetshetherhu kepfü bu kemeyieu chüliecie, süue theja mu ketshe pete mhote” sishü.

⁶Sitse Ezra sie, “N rübei Jihova zo; noe tei chüshü, teiko mho teiu, sünu ketuo pete, kijüu mu sünu ketuo pete, dzükezhako, mu sünu ketuo pete chüshü, mu no süko pete se baya; tsiu teigei ketuo krodiko n rüsuoya.

⁷Noe Jihova, Abram kedakelie Kepenuopfüu zo, sidi Chaldian-u Ur nunu ze parshü, mu puo za thopie Abraham chükeshüu zo,

⁸tsiu n mhodzü ki puoe dietho ba di ngulie, sidi Kananmia, Hitmia, Amormia, Perizmia, Jebusmia mu Girgashmia kijü khashü puo tsü tuoü puo ze dietseidiekholie, sidi n die phrakeshüu chü tseishü, noe dietho zokecü la.

⁹“Tsiu Ijipt nu hie puonuoko kemezhiekecü ngushü, mu Kemerie Dzükezha[15] khie ki nu uko kekra pfhe rünyülie.

¹⁰Siro zasiko mu ungothoko chü pie Faro mu puo kituoko, mu puo kijü nu themia peteko kieshü, kekreilamonyü ukoe hie puonuoko gei uzhosuokecü noe sikecü la. Sükemhie di noe tsiedo teiki kemhie n za pesishüte.

¹¹Siro no uko mhodzünu dzükezha bie kezawa, süki ukoe dzükezha metsuo nunu kijü keso gei vota, tsiu uko ngumvümiako, ketsie puo pie dzükezha nu keshü tuoi noe uko kelhoushüwa.

¹²Khinhie gei kimhou co puo nunu uko chatha, mu theva gei uko voketuo cha nu kezie khashüketuo miü co puo nunu uko chatha.

¹³Noe Sinai kijüthou gei ker, sidi teigei nu uko ki diepu, mu kesikele puotoukecüu, thezho ketho-u, kepethadie keviko mu thezhoko khashü uko tsü.

¹⁴Sidi n kituou Mosa dzie nunu, n kemesa sabat-u pekieshü, mu chüüzelienukecü kepethadie mu thezhoko khashü uko tsü.

¹⁵Tsiu uko kemerü la teigei niekhrüda khashü mu uko terhü la tsiekrie geinu dzü se parshü, sidi noe rüse di khapie uko tsütuoükeshüu uko bu vo welienukecü pushü.

¹⁶“Derei uko mu hie puonuoko kemiakota, mu u nou reta, sidi no diekhakeshüko ze mvüta.

¹⁷Ukoe miadie ze mvü, mu noe uko donu chükeshü ungothoko dze le mo; derei u nou chüperelie, di miadiekechü nu la vo tatuoü krüta puo kedashü derei noe mia kejo vashülie, mu mia ngumezhieya, n noumiatho mu ketseikevi bu tshupfü, di uko khawa molie.

¹⁸Ukoe mhalho pie mithunuo puo chülie di sie, ‘Ijipt nunu nieko ze parshükecü nieko Kepenuopfü sü hauha zo’ isi di thenou meyie sekecü chüshü zoü rei,

¹⁹noe n kekhrie nyi rei nyithorkecü nunu nha nu uko khawa mo; khinhie gei kimhou co-u uko tseta mo di uko chau nu volie morei teizei gei uko bu voketuo chau nu volieketuo la, kezieu khashütuoü miü co-u uko tseta mo.

²⁰Noe n Ruopfü keviu bu uko pethashütuoü khashü tsü, tsiu uko me nunu n manna khawa mo, mu uko terhü la dzü khashü tsü.

²¹Teicie hiedia noe uko theke vor, sidi ukoe mhapuo nu rei tsopfhü mo, uko pfhe weta mo, mu uko phi rümieta mo.

²²Siro noe kedibako mu themiako pie uko tsüshü, sidi uko kezapie kijü ke pete nu shü; süla ukoe Heshbon kediu Sihon kijü mu Bashan kediu Og kijü welie.

²³Noe uko nuosenuoyie chü pekrapie teigei themvü tuoishü, sidi uko puonuoko ki, uko bu vo di welienukeshü kijüu nu ze vorshü.

²⁴Süla u nuosenuoyiekoe vo kijüu welie, mu noe uko mhodzünu kijüu nu kelhouko, Kananmia penyüshü, sidi uko bu u medo chülietuoü, uko kediko, mu kijü nu themiako khapie uko dzie nu shü.

²⁵Sidi ukoe nadi kemeteiu mu kijü kekro-u lielie, mu kinu mha kevi pete keba, dzükhou thielie, khubelie, mu Oliv lie, mu nhasibo kekra welie, sidi ukoe cüükrie di u ketshukelhuo chülie, di luolie, mu n ketseikeviu nunu u neilie.

²⁶“Sishierei uko n die ze mo, di n perhieta, sidi n zho-u kelhoupie u sietsa shüwa, tsiu n siedzekesimia, uko bu rürei n kitsatie vorlietuoü zhapu chükeshüko dukhriwa, mu uko themia thepesuo sekecü mhatho chüshü.

²⁷Süla noe uko khapie uko ngumvümia dzie nu shüwa, sükoe uko pechüpenyü; tsiu ukoe kemezhiekelie ki, uko n ki u mezhiemelo tse, noe teigei nu uko pfhe silie; sidi n kekhrie nyithorkecü nunu noe uko ngumvümia dzie nunu uko kelalieketuo puo khashü uko tsü.

²⁸Derei ukoe kerülei ngulieta tse, ukoe n mhodzünu mha kesuo chü lata; süla noe uko khapie uko ngumvümia dzie nu shüwa, sidi ukoe uko mhodi, sirei ukoe rürei la vorlie, sidi n ki chalie tse, teigei nu uko pfhe silie, mu noe va kekra mia ngumezhieyakecü ki ze uko kelashü.

²⁹Siro noe uko bu n zho-u nu rürei la vorlieketuo la uko pethashü, sirei uko kemiako di n diekhakeshüko ze mvüta, sidi n zhoko varhuo di phouma, süko mia puoe chüüzelie ro puoe rheilietuo, derei uko u bouka kereilie, mu u nou chü perelie, tsiu rünyülie lhoüte.

³⁰Noe teicie kekra uko gei shükhreshühie vor, sidi n siedzekesimia geinu n Ruopfü se di uko pethashü, sizoshierei ukoe unyie kereishülie mo; süla noe uko khapie kijüu nu themiako dzie nu shüwa.

³¹Sirei noe mia khrielekhriethorkecü la noe uko peka lotsowa mo, morei uko khawata mo; kekreilamonyü noe ngukemezhie tsiu kekhrie Kepenuopfü puo zocü la.

³²“Süla tsie, hie Kepenuopfü, kezhau, kekuou, mu kemerie zokecü Ukepenuopfü, diekhakeshüu mu kekhrie se bayakezhau, Asiriamia kediu tei ki nu vor thie ketso, kemezhiekecü, hie gei hie kediko gei, hie kedinuoko gei, mu hie zievoko gei, hie siedzekesiko gei, hie puonuoko gei, mu n themia peteko gei kevor ha üse mhathopuo moükecü chüwa hiecie.

³³Sirei no hieko gei se kevorko pete rei puotou zo; noe mhakemezhüu chüshü, derei hieko we chükekrüwaketa la.

³⁴Hie kediko, hie kedinuoko, hie zievoko, mu hie puonuoko n zho-u chüüzelie mo, morei no diekhakeshüko tsiu n zhapuko, no uko bu u kirilienukeshüko rünyülie mote.

³⁵Kekreilamonyü ukoe n kedirüvie nu n lie chülie mote, noe n ketseikevi nunu se uko tsü mu no khapie uko mhodzünu keshü kijü meya mu keviu nu, morei uko u kerüzhü mhatho nunu rüreilie mo.

³⁶Harie, hieko thie mia kituomia chüte, noe hie puonuoko bu kijü keviu si mu süu nu mha kevikhakeshüko cüükrielienukeshüu nu, harie, hiekoe sünu mia kituomia chüte.

³⁷Hie kephouma la, puo si rüchü pevi sepie hie ketsüko noe kedi khapie hie mhodikeshüko dzienu vote, siro ukoe hie chüümo, hie kicükiri kekha u medo chü, sidi hie bu kemezhie sekecü nu bate.”

³⁸Mha hako pete la hie dietseidiekho chü toulie, sidi süu thulie, siro hie kedinuoko, Leviko mu hie zievoko süu zasi vüwa.