Read Angami Naga Esther 2 Bible Online

Esther 2 - Angami Naga bible

Esther 2

¹Mha hako sie, kediu Ahasurus puo noupfhü rükreta tse, puo Vasti pfü kedipuo chüwa shi mu hapfü pejo di puo gei mhakikecüpuo chüwa shikecü dze rükra bata.

²Sitse kediu kituoko mia puo sie puo ki, “Kediu la rüü kezivi pfhücie.

³Tsiu kediu bu puo kedirüvie rüna pete nu kezhamia kedalie di uko bu rüü phouse kezivi khe pfhü kengu se Susa seluoba nu kediu khrokezhau thenumia pfhe bayakezhau Hegai, kediu iunok ki ze vorliecie, sidi uko chü keziviketuo vieko khashülie.

⁴Sidi rüü supfü puo nie kediu nei chülietie shi, süpfü bu Vasti sounu kedipfü chütacie” sishü mu mha süu kediu puo medolie, süla puoe sükemhie chülie.

⁵Süteiki Susa seluoba nu Judamia puo ba, puo za Mordekai, puoe Jair nuo, Shimeiu nuo, Kish nuou, Benjamin yiemia puo.

⁶Kish-e[3] Jerusalem nunu Nebukadnezar, Babilon kediu bu teze keta Jekonia, Juda kediu ze di kediemia teze voketa ki puo sa teze vota.

⁷Puoe Hadasa, süpfüsü, Esther, puo nieu nuopfü theke se siershü kekreilamonyü puoe puo puo morei puo zuo rei jü; rüüpfüe zivi tsiu mesümede-i; puo puo mu puo zuo siaketa ki Mordekai-e hapfü üse puo nuo tuoi thekelieta.

⁸Süki kediu diekhashü mu thezho-u se pesikeshü ki, mu rüümia kekra Susa seluoba Hegai thenumia kepfheu kebachüu nu vorkelie ki, Esther rei ze kediu kinu, Hegai thenumia kepfheu kebachüu nu vorlie.

⁹Sitse rüüpfüe puonei chülie, siro puo khriepfülie; mu puoe hapfü chü kezivi ketuo la kediu ki nunu puo tierko mu kecüca puo ya meseko, siro kedakelie chaliemiapfü thenie sa di uko pie thenuko ki kevitho-u nu shüwa.

¹⁰Esther-e puo themia morei puo seyie pie kiewa mo; kekreilamonyü Mordekai-e puo bu süu pu hienuwacü la.

¹¹Tsiu puoe teisonhie Esther kedipuo mhie ba shi, mu hasie puo gei kiü tatuo shikecü silieketuo la, thenumia keba kiu kitie mhodzünu vo seiya.

¹²Rüümia mia puopuo bu kediu Ahasurus ki le ketuo tei kevor-e, u bu khrü kerekenie u chü kezivi kecü bawa diya; kekreilamonyü süteiki u chü keziviketuo la khrü sorou tier puore kevipfü se mu khrü sorou mharekethengu se thekekecü chüya.

¹³Rüüko kediu ki lekecü ki, thenuko kiu nunu puoe kedipuo se vo nyü shiü süu pie puo tsüya.

¹⁴Rüüpfüe thevatie sünu letaya, mu puoe khise la par di Shashgaz, kediu iunok-u bu mehoyakezha kediu zepfüko bayakezha thenuko ki kenieu nu votaya, mu kediu thuo puo ngu pie puo nei di puo kie la zokemosie, süpfüe kediu ki la leya mo.

¹⁵Siro Mordekai-e puo noupra mhie di thekekelie, puo nieu Abihail nuopfü Esther-e kediu ki leketuo puo mesetei vorlie tse, puoe Hegai, kediu iunok, thenuko kemeho-u ki puo chatha die zokemosie mhakekrei puorei cha mo. Sitse Esther-e puo kengu khe neipfülie.

¹⁶Sidi khrü ker-u, süu Tebeth-u khrü, Ahasurus kedi chükelie cie thenie cie, Esther ze kediu kinu vor.

¹⁷Kediu sü thenumia pete kirei Esther khrieta, tsiu kediu mhodzü ki rüüphouse peteko donu hapfüe puo khriepfülie mu puo nei chülie, süla puoe keditsüre pie hapfü tsügei shü, sidi Vasti sounu puo bu kedipfü chüta.

¹⁸Süsie kediu kedinuonuoko pete, mu puo kituoko la thehe kezha puo keseshü, “Süue Esther theheu,” tsiu kedimia zho tuoi puoe puo rüna nu kerülei[4] khapie themia tsü, mu mephruomevuo di mha methuo pie miatsümiaza.

¹⁹Siro rüü phouseko va kenieu vor kengukelie ki, Mordekai-e kediu care ki ba.

²⁰Mordekai-e Esther ki kepu tuoi, puo tsie rei puo seyie morei puo themia suomia shikecü thashüwa mo zoluo, kekreilamonyü Esther-e Mordekai puo theke sierkeshü ki tuoi, puo pukeshüu medzi ba zo.

²¹Süteiki Mordekai-e kediu care nu bakecü ki, kediu khro kezhamia kenie Bigthan mu Teresh kikha pfhe thayakezhanie, unie nou meyie ba mu kediu Ahasurus dukhriwakecü[5] pfhü ba.

²²Mu mha hau dze Mordekai-e silie tse, puoe süu pie Esther kedipfü ki pushü; mu Esther-e Mordekai za nunu süu dze kediu ki pushü.

²³Mu mha hau dze ketso kesie ki, süu kethokecü silieta; süla unie kenienie gouwa; süu thupie thedze leshüda nu zhü.