Read Angami Naga Esther 5 Bible Online

Esther 5 - Angami Naga bible

Esther 5

¹Zha se nhie, Esther-e puo kedi pfhenei selie di kediu kinu kibou kesouu nu lelie, di kediu bou kepetsou nu thalie; mu kediue puo kedi bau gei ba, kiu care meze nu ba.

²Kediue Esther kedipfü kiluozhau nu ketha ngushü tse, puo ngu puo neilie, sidi kediu puo suna the puo dzienu kebau yhapie Esther tsüshü, süla Esther-e phi di ketheu tie nyüshü.

³Sitse kediu puo üse, “Kiü ga? Kedipfü Esther! N kechau kedipuo ga? A kedirüvie ketoupuo zorei pie n tsütuo” sita.

⁴Sitse Esther sie, “Mhanuü süu kediu medo üliro, kediu mu Haman unie bu thie a kediu la kesepiekeba thehe nu vorcie” sishü.

⁵Sitse kediu sie, “Haman ze rükri vorlie, hienie bu Esther kemengu chülieketuo la,” sishü. Sidi kediu mu Haman unie Esther kesepiekeba theheu nu vor.

⁶Tsiu khubezu se thehe chü keba ki kediue sie Esther ki, “No kedipuo chaya ga? Süu chüpie n tsü zotuo; tsie no kedipuo lie nyüya ga? Kedibau ketoupuo zo shierei chüshü zotuo” sita.

⁷Sitse Esther sie, “A kechau mu a lie kenyüu liro,

⁸mu kediu a kechau khashü tsiu liekenyüu chükeshü puo medoü liro, kediu mu Haman unie bu a sodu nnie la thehe kesepiekebau nu vorcie, sitse a sodu kediu kepu kemhie chüshütuo” sishü.

⁹Sitse sünhie Haman puo neisiei mu puo noumvü phi di tuota; derei Haman-e kediu care nu Mordekai puo mhodzünu sietha rei mo, morei mele rei shükemo ngu tse, Mordekai gei puo nei mopie mhapuo chüta.

¹⁰Sishierei Haman-e puo kethelie di kinu vorta; sitse puoe mia ketsepie puo zeko mu puo kimia Zeresh kielie.

¹¹Mu Haman uko ki puo kinyi vi thedzechü zokecü, mu puo nuonuo kekra keba dze, tsiu kediu puo chü pezhakeshü dze pete, mu kedipuo mhie di puoe kedinuoko tsiu kediu kituoko mho puo bu zhasiete shikecü pushü.

¹²Süsie rei Haman pu sacü, “Esther kedipfüe a zokemosie mia puo bu rei puoe kesepiekeba thehe nu kediu ze vo mo zo; mu sodu rei sa puoe a mu kediu hienie kie bate.

¹³Derei Mordekai kediu care ki kebau, a ngukecü ki mha kevi hako a la mhapuorei motaya” sita.

¹⁴Sitse puo kimia Zeresh mu puo zeko pete sie puo ki, “Mia kegoura thu hiepengou rükriekecü puo chüliecie, mu sodu sügeinu Mordekai gouwanu di kediu ki puliecie; sidi no n nei siei di kediu ze theheu nu voliecie” sita. Sitse Haman-e mha süu puo neilie, sidi puoe kegourau chülie.