Read Angami Naga Esther 6 Bible Online

Esther 6 - Angami Naga bible

Esther 6

¹Süzhü kediu zelie kenjüta, süla puo thedze leshüdako se vorlienushü, sidi kediu mhodzü süko phrüshü.

²Mu sünu Bigthana mu Teresh kediu khro kezhamia kenie, kikha pfheya kezhanie, kediu Ahasurus dukhriwaketuo[6] rhükecü dze Mordekai-e pukeshü thupieketuo ngulie.

³Sitse kediue sie, “Mhahau la therhu mhatho morei mha kevi kikecüpuo chüpie Mordekai tsüshü ga?” idi ketso. Sitse kediu kituomia puo sie, “Mha puorei chüpie puo tsüshü molie” sita.

⁴Sitse kediue sie, Suopuonie kediu kinu ba ga? sidi ketso. Hateiki Haman-e Mordekai la kegoura puo chüpie kebau geinu puo gouwaketuo la, kediu kiputuoü kediu kipfhükhro vor.

⁵Sitse kediu kituoko sie puo ki, “Harie, Haman-e kipfhükhro thalie” sishü. Sitse kediue sie, “Puo bu lerliecie” sishü.

⁶Sitse Haman lerlie, mu kediue puo üse, “kediu mia puo rhushünyü liro kedipuo chüshü ro vi ta?” idi ketso süki Haman-e puo thuo puo rüchü di sie, “Kediu mia puo rhushü nyü bakecüu sü a mo di supuo ta?” siba.

⁷Süla Haman kediu ki sie, “Kediu mia puo rhushü nyü kebau la,

⁸kediu seyakezha kedipfhenei mu kediu bayakezha gurau, mu keditsüre puo tsügei shüyakezhau se vorliecie.

⁹Sidi kedipfheneiu tsiu gurau pie kediu kedinuonuo therhutho-u dzie nu shülie, sidi puo bu kediue puo rhushü kenyü themiau ketsoshülie, sidi puo bu gura chie geinu rüna nadiu pfüthe volie mu puo mhodzü hau pu shie di; ‘Kediu themia rhushükenyümia gei hakemhiekecü chüpie puo geishütuo ho’ isicü putuo” sita.

¹⁰Sitse kediu Haman ki, “Rükri vo di kedipfheneiu mu gurau selie sidi puo kepu tuoi, süu chüpie Mordekai Judau, kediu care ki bayakezhau gei shüliecie. No pukeshüko puorei chü mota hie” sishü.

¹¹Süla Haman-e kedipfheneiu tsiu gurau selie, sidi pie Mordekai ketsoshü, mu gura geinu puo ze rüna nadiu pfüthe vo di puo mhodzünu nu sie, “Kediu miapuo rhushü kenyümia gei hakemhie chüpie puo gei shütuo ho” si vota.

¹²Süsie Mordekai la kediu care nu vorta. Derei Haman-e kra chakhrie puo tsü dzelie di rükri puo kinu vota.

¹³Haman-e puo kimia Zeresh ki tsiu puo zemia pete ki, puo gei mhachüketa pushü. Sitse puo themia mhakesiko mu puo kimia Zeresh sie, “No puo mhodzü tetsutakezhüu, Mordekai-e Judamia liro, no puo mho kuolie lho zo, derei puo mhodzü tetsu tatou zotuo” sita.

¹⁴Mu uko puo ze kerüchü baluokecünu, kediu liethokoe Haman ze Esther kesepiekeba theheu nu puo ze votuoü vorta.