Read Angami Naga Toukepra 1 Bible Online

Toukepra 1 - Angami Naga bible

Toukepra 1

¹Hako Israel nuo thepfuko Jakob ze Ijipt nu ketsurko za, u kinumia u thetse sa:

²Reuben, Simeon, Levi mu Juda,

³Isakar, Zebulun mu Benjamin,

⁴Dan mu Naftali, Gad mu Asher.

⁵Jakob nuosenuoyie pete kesa mia hiethenie. Josef we uko mhodzü Ijipt nu tuota.

⁶Süsie Josef siata, puo siezedzürieko rei mu phou süu pete rei.

⁷Derei Israel nuosenuoyie we kruo philie mu zha philie; uko kra philie di kuo phita; sidi lhou kijü süu tshuta.

⁸Sükisü Ijipt mho kedi kesa Josef sikemo puo sier.

⁹Mu puoe puo themiako ki pu di sie, “Harie, Israelko ha u ki krathor mu kuothorte.

¹⁰Vorlie, úko uko gei u do vilie khe, uko kra philieta rei si momu, sidi terhü puo vor ro, uko u ngumvümia zeta di u perhie phir di u rüna nunu tata rei si momu.”

¹¹Sidi thepie kemesi khapie uko gei shü di uko bu kemezhieketuo la uko mhatho niepumia khapie bawa, sidi uko Faro la mha khapie baketuo nadi Pithom mu Ramese chü.

¹²Derei uko pese kra mu uko kruo miemieta mu uko kezapie meya miemie prata. Süla Ijiptmiakoe Israelmiako la merie bata.

¹³Süla uko Israelko bu mhatho kere chü,

¹⁴mu uko bu nyorietsie chü tsiu lie nu mhatho neiüko chü di lhou kemezhie phita, tsiu mhatho pete nu uko bu mhatho keretho chü.

¹⁵Sitse Ijipt nu kediue Ibrimia nuoze kethekepfünie, miapfü puo za Shifra mu kekreipfü za Pua, ki pu di sie,

¹⁶“Nnie Ibripfüko nuoze thekecü ki, nuokezechü nunu uko mehoshü di, thepfunuomiata ro uko dukhriwalie, derei thenunuomiata ro, perheishülie” sita.

¹⁷Derei nuoze kethekepfünie Ukepenuopfü khrüprei, süla Ijipt nu kediu unie ki diekhakeshü mhiei chü mo, sidi thepfunuoko rei perheishüshüta.

¹⁸Süla Ijipt nu kediu nuoze kethepfünie kielie di unie ki, “Nnie thepfunuoko bu rei rheilie keba hau kedipuo chü bata ga?” si.

¹⁹Sitse nuoze kethekenie-e Faro ki, “Kekreilamonyü Ibrimiapfü sü Ijiptmiapfü mhie mo, ukoe mecamekhrocü la nuoze kethekemia kevor mhodzü unuo zelietaya” sishü.

²⁰Süla Ukepenuopfüe nuoze kethekenie gei vishü, sidi themiako kruolie mu kuo philie.

²¹Siro nuoze kethekenie Ukepenuopfü preicü la, puoe unie bu unie kikru nyilie.

²²Süsie Faro puo themia peteko ki die hau khashü, “Ibrimia thepfunuomia penuokelie pete kelhoupie Nail rüu nu shüwalie, derei thenunuomia we pete perheishülie” si.