Read Angami Naga Toukepra 10 Bible Online

Toukepra 10 - Angami Naga bible

Toukepra 10

¹Sitse Jihova Mosa ki, “Faro ki volie; ae a zasi hako pie uko pekieshütuoü di, puo mu puo kituoko nou chü perewatakecü la.

²Sidi nie bu nie nuonuo mu nie tsunuoko kesikengu ki nu ae Ijiptmiako pie kethekrekeshü mu uko donu zasi kikecü kro puo chüshü shikecü pu tuotuo; nie bu ae Jihova zoücü silieketuo la.”

³Süla Mosa mu Aron unie Faro ki vo, di puo ki, “Jihova, Ibriko Kepenuopfü, hakemhie puya, ‘Kichiepuo no a mhodzü ki n thuo n bie kerünuoshü mvü ba zotuo ga? A themiako bu tuoliecie, uko bu a rüsuoketuo la.

⁴Mhanuü noe a themiako bu tuo mvüta ro, harie, sodu, a kuprie se vor n kijü nu shütuo.

⁵Mu ukoe kijüu zie zepfülietuo, sidi mhapuorei bacü ngu motatuo. Mu ukoe prü bu va kepeshako cülietatuo, mu ukoe nie lie nu keba seiboko pete cülietuo.

⁶Siro ukoe n kiko nu, n kituoko pete kiko nu, mu Ijiptmia pete kiko ketshu chülietuo, nie puonuoko, nie puotsanuoko kijü nu lhou vor tse nunu vor thie ketso ngukemo chüshütuo’ ” sishü. Süsie puo rüreilie di Faro ki nunu tuo prata.

⁷Sitse Faro kituoko puo ki, “Kichiepuo themia hau bu u la kebie puo mhiei ba zotuo mu? Uko bu tuotacie, Jihova uko Kepenuopfü rüsuolieketuo la; no tsierei Ijipt pekawaketa si moluo me?” sita.

⁸Süla Mosa mu Aron unie ze la Faro ki vor; ru puoe unie ki, “Volie, di Jihova nie Kepenuopfü rüsuolie; derei nieko suomia bu votuo ga?” sita.

⁹Sitse Mosa sie, “Hieko phichünhicu ze votuo; hie hie nuonuo thenuthepfu rei mu hie kuokro mu hie thukro rei ze votuo, thenyi puo nyipie Jihova ki shü morokesuo la” sishü.

¹⁰Sitse puoe unie ki, “Mhanuü ae nie nuoko bu nie ze votuoücü siewe, Jihova nie ze tuotie. Nie nou mha kesuo rhü bata tou zeru.

¹¹Mo, lho zo, nie donu thepfumiako vo di Jihova rüsuolie, nieko kemengu süu ze di” si, sidi Faro mhodzünu nu unie whuowa.

¹²Sitse Jihova Mosa ki, “Kuprieko la n dzie yhapie Ijipt kijü mhodzü shücie, uko bu Ijipt kijü pete nu vo di prü bu va kepesha nha pete cülieketuo la,” sishü.

¹³Süla Mosae puo theu yhapie Ijipt kijü mho shü, mu Jihovae kijüu mho niathu teikhrie puo se vor di sünhie zhate mu teizeizha pete rükhrie bata, sidi teiso vor tse niathu teikhrieue kuprie hepfü vorshü.

¹⁴Mu kupriekoe Ijipt kijü pete mho vor di Ijipt rüna pete nu bata, kuprieko krakrapie thiedzü mu thiesie rei süde ngulie kelho parta.

¹⁵Sükoe kijü pete zepfülie, sidi kijü bu zeibouita, mu sükoe kijü nu nhako pete mu seiboko gei nhasi pete prü va peshakeshüko cülie, Ijipt kijü pete nu nha kepejo yopuo rei tuo mota, seibo morei lie nu nhabo rei.

¹⁶Sitse Faroe Mosa mu Aron unie kie rükrishü, di unie ki, “Ae Jihova nnie Kepenuopfü mu nnie mhodzü phoumawate.

¹⁷A kephouma tsieu va la vashücie, sidi Jihova nnie Kepenuopfü bu a kinu kesia vie hau setaketuo la chashücie” sita.

¹⁸Süla puo Faro mhodzü prata; di Jihova ki chashü.

¹⁹Sitse Jihovae niakra teikhrie re sekecü puo chü kerükhrieshü di süu bu kuprieko he se vo Kemerie Dzükezha[9] nu shüwa, sidi Ijipt kijü pete nu kuprie yopuo rei tuo mota.

²⁰Derei Jihova Faro nou chü perewa, mu puoe Israel nuonuoko bu tuo mota.

²¹Süsie Jihova Mosa ki, “N dzie yhapie teitsa vashücie, Ijipt kijü mho zeibouikecü bu bataketuo la, zeipie bielie kevi chü zokecü puo,” sishü.

²²Süla Mosae puo dzie yhapie teitsa vashü, ru Ijipt kijü pete mho zha se zeibouita.

²³Uko huoniehuo ngulie kenjüta, mu zha se we miapuorei puo ba nunu sie rei mota; derei Israelko ba nu we zie ba zo.

²⁴Sitse Faroe Mosa kieshü di, “Volie, di Jihova rüsuolie, nie nuonuo rei nie ze volie vi; nie kuokroko mu nie thukroko rübei khapie bawalie” sishü.

²⁵Derei Mosae sie, “No hie bu Jihova hie Kepenuopfü rüsuolieketuo la ruosuo mu kethe ruosuo khashülie kevi chü morosuo.

²⁶Hie kiri bu rei hie ze vo morosuo, puomou kepfü puorei khawalie lho, Jihova hie Kepenuopfü rüsuoketuo la süko ze vo morosuo, mu hie sünu vo tsolie kemochie kedipuo se Jihova rüsuolietuo shikecü si mo,” sishü.

²⁷Derei Jihova Faro nou chü perewa, di uko bu tuo mvüta.

²⁸Sitse Faroe puo ki, “A kinu nu tuotalie, n thuo menuolie; a zie ngu la sa hie; no a zie ngu lakecü nhie no siatuokecü la” sita.

²⁹Mosa sie, “N kepu mhiei, a n zie ngu lalie lho” sishü.