Read Angami Naga Toukepra 12 Bible Online

Toukepra 12 - Angami Naga bible

Toukepra 12

¹Jihova Ijipt kijü nunu Mosa mu Aron unie ki:

²Nie la thekhrü hau bu thekhrüko donu kerieu chütuo; nieko la süu bu teicie nu thekhrü kerieu chütuo.

³Israel pete bu hau khrü zha ker nhie kikru puo tse nu tekuonuo puopuokecü selienu di Israel mechü kehouu ki pushücie.

⁴Mu mhanuü kikru kecü puoe tekuonuo puo u la zhathorta ro, mia puo kidepuo cülietie shikecü themia tsüphrü le di, puo ki khieki keba puo zanuou ze tekuonuou kerhelie.

⁵N tekuonuou bu kemesa puolie, cie puo keta puochü yopuo morosuo; tekuo donu morei temvü donu süyo pielie.

⁶No süyo hau zha keredia ketso khapie tha morosuo, sidi Israel pete vor kengukelie mechü kehou nhie theva ze uko kuonuoko dukhrituo.

⁷Süsie ukoe puo zie huo selie di, pie mhacüketuo kiu kikha conie mu kikha mho kiprü gei kenheshütuo.

⁸Uko süzhü tekuonuou chü cütuo; uko süu rielie di khreiü shükemo niekhrüda mu ga kepfhü sa di cütuo.

⁹Puo rei kerhei morei dzü pie cha di cü hie, derei puo tsü, puo phiko mu puo nounya pete mi nunu rie di cütuo.

¹⁰Siro yopuo rei peshapie ba khise tso hie, mu khise ketso baketa petekoe thewatuo.

¹¹Hakemhie di niekoe süu cütuo: nie chieca phapfü, nie phi gei phikou nyü, mu nie dzie nu kethe se, sidi nie rükri se di cütuo. Süue Jihova ciekevo-u zo.

¹²Kekreilamonyü ae süzhü Ijipt kijü pfüthe votuo, mu ae Ijipt kijü nu nuorie khe biekhriwatuo, themia mu khunuo rei, siro Ijipt rhuoko pete gei ae capi chüshütuo: Ae Jihova zo.

¹³Thezieue nie la zasi puo chütuo, nie keba kiko gei; mu ae thezie ngu ro, ae nie cie pratatuo, mu ae Ijipt vükeshü ki, thepetheruo nie gei tsu di nie pekawalie lho.

¹⁴Zha hau nie la kerükra teisozha puotuo; mu nie Jihova ki keshü nyi üdi se tuotuo; nie thephou pete nu süu pie thenyi zha puo chüwa di medzituo.

¹⁵Zha thenie nhie khreiü shükemo niekhrüda cütuo; zha therie nhie nie-e nie kiko nunu khrei chü kelhiwatuo, mhanuü mia kehoupuorei zha therie nhie mu zha thenie nhie ketso khreikeshü vie cü ro, themia süu Israel nunu dathewatuo.

¹⁶Zha therie nhie nie-e kemesa kehou puo chütuo, mu zha thenie nhie rei kemesa kehou puo pie batuo; teisozha süko nu mhapuorei chülie lho derei mia pete bu cü morokesuokoyo rübei kesetuo.

¹⁷Mu niekoe khreiü shükemo niekhrüda nyiu nyituo, kekreilamonyü ae teisozha hanhie Ijipt kijü nunu nieko krodi ze parlie: süla niekoe phou pete nu teisozha hanhie thenyi hau bu batuoü tholieketa hau kenyünyü seituo.

¹⁸Thekhrü therieu nu, zha keredia nhie thevatie, niekoe khreiü shükemo niekhrüda cütuo, si zo vo khrü zha mepfüepuo nhie thevatie tsotuo.

¹⁹Zha thenie we nie kiko nu khrei puorei bu balie lho; kehoupuorei khreiü keshü vie cü ro, Israel mechü kehou nunu süu dathewatuo, puo thuo chazoumia puo rei, morei khenu kelhoumia zorei.

²⁰Nie khreiü keshü vie puorei cülie lho; nie lhoukebachü pete nu khreiü shükemo niekhrüda cütuo.

²¹Süsie Mosae Israelmia phichüko pete kielie, di uko ki, “Nie thuo nie kikru la tekuonuo kedaliecie, sidi ciekevo kuonuou dukhrilie.

²²Siro hisop nhapfü phro puo selie di pie seikhou nu keba thezieu tshelie, sidi pie kikha mho kiprüu mu kikha conie vüshülie; nieko miapuorei bu teisolie kemochie puo kikhau ciepralie lho.

²³Kekreilamonyü Jihova Ijiptmiako dukhriketuo la tuo pfüthe votuo; süki puoe kikha mho gei kiprüu mu kikha conie gei thezie ngu ro, Jihovae kikha mho cie votatuo, mu kepekau bu nie dukhrituoü nie kinu lelie lho.

²⁴Nie mha hau nie la mu nie nuonuo la rei thashüwaketa puo üdi kechachie kenyütuotuo.

²⁵Siro niekoe Jihova phrakeshü tuoi, puoe pie nie tsütuoükeshü kijüu nu vorlie ro, nie mhatho hau chüshütuo.

²⁶Mu nie nuonuoe nieko ki, ‘Mhatho hau ca kedipuo ga?’ idi ketso ro,

²⁷nie-e uko ki, ‘Hauha Jihova ciekevo ruotho-u we, puoe Ijipt nu Israelmia kiko cie vota, Ijiptmiako dukhricü ki derei uko kiko we lhieshücü la’ isituo” sishü. Sitse themiako u tsü tsünge tsu di rüsuota.

²⁸Sitse Israelko vo di sükemhie chülie; Jihova Mosa mu Aron unie ki diekhakeshü mhiei, uko chülie.

²⁹Theva khisoteiluo Jihovae Ijipt kijü nu nuorieko pete dukhriwa, Faro kediba gei keba nuorieu nunu vo kediebou kesou nu kebau nuorieu ketso, khurinuo nuorieko pete sa.

³⁰Faroe theva gei sielie, puo mu puo kituoko pete, siro Ijiptmiako pete rei, sidi Ijipt kijü nu kra bouübita, ki puo nu rei siakemo jükecü la.

³¹Siro Faroe teizei geinu Mosa mu Aron unie kie, di unie ki, “Sielie, di a themiako donu nu tuotalie, no mu Israelmiako rei; volie, di nie kepu tuoi, Jihova rüsuoliecie!

³²Nie kuoko mu nie thukroko ze pratalie, nie kepu tuoi, sidi tuotalie; mu japie a rei tsücie” sita.

³³Siro Ijiptmiakoe themiako gei u nouselie, rünau nunu uko ketse pawatuoü di; ukoe sie, “Uko pete sia phreta zotuo” ibaketa la.

³⁴Süla themiakoe uko thou nepie kebako khreiü shükemo nu chüpielie, uko thou kene khouko pie uko pfhe nunu kezipie uko bouka gei shülie.

³⁵Israelmiakoe Mosa uko ki pukeshü tuoi chü salie, ukoe Ijiptmia kinu rakachü mu suna rütsonyieko mu pfhemeneiko chalieketa la;

³⁶mu Jihovae themiako bu Ijiptmiako mhingu ki uko khrie pfülie, süla ukoe chakeshü pete pie uko tsüshü. Sükemhie di ukoe Ijiptmiako vie ketalie.

³⁷Israelkoe Ramese nunu Sukot ketso tuo volie, uko thepfumia mia nyie krie sorou mese u phi pie tuo, sizomonyü thenuthenuo rei sa.

³⁸Siro themia kekreikecü krodi puo rei uko ze vo, mu kiri kekra sa, tekuokro mu mithukro rei.

³⁹Mu ukoe Ijipt nunu se kepar khreiü shükemo thou ne seketuoko rielie, süu khrei pie shükemo la, kekreilamonyü Ijipt nunu pfhe balie lho di uko ne phrawaketa la, mu uko bu u la kecüca puorei keselie mokecü la.

⁴⁰Israelko Ijipt nu lhoukecü cie kriedia di ser.

⁴¹Siro cie krie dia di ser tsei touketa nhie, Jihova krodi pete Ijipt nunu tuo prata.

⁴²Uko ze Ijipt nunu parkelie la, teizeizha süu pie Jihovae pfhe pecü bakeshü teizei puo chü; süla Israelmia thephou pete nu hazhü pie pfhe pecükecüu teizeizha puo chü di zeya.

⁴³Siro Jihovae Mosa mu Aron unie ki, “Hauha ciekevo nyi la thezhoko: seyie kekreimia bu süu cülie lho;

⁴⁴derei raka pie khrülieketa kedieu we puo zhürewaketa sie süu cülie vi.

⁴⁵Kediemia morei zhakhrü ze ketuomia puorei süu cülie lho.

⁴⁶Ki puo nu süu cütuo; nie themuo süu puo rei pie kiu cielie lho; mu nie puoru puorei bietshelie lho.

⁴⁷Israel mechü kehou pete süu ze morosuo.

⁴⁸Mu solhimia puoe vor n ze ba di Jihova ciekevonyi nyi nyü ro, puo kiünuomia thepfumia pete bu u zhü rewalie, süsie puoe penuo vor di süu ngulie vi; puoe khenu kelhoumia puo tuoitatuo. Derei u zhü rekemomia puo bu rei süu cülie lho.

⁴⁹Khenu kelhoumia mu solhimia nie donu kelhoumia la thezho puo batuo” sishü.

⁵⁰Israelko pete sükemhie chülie, Jihova Mosa mu Aron unie ki diekhakeshü mhiei, ukoe chülie.

⁵¹Mu sünhie Jihova Israelko Ijipt kijü nu krodi krodi chü di ze parlie.