Read Angami Naga Toukepra 13 Bible Online

Toukepra 13 - Angami Naga bible

Toukepra 13

¹Jihovae Mosa ki:

²Nuorie khe chü kemesapie a ki shücie; Israelmiako donu, themia mu khunuo shierei; penuolie kerieu sü a vie.

³Sitse Mosae themiako ki, “Teisozha hau rükralie, Ijipt nu, kediechü keba kiu nunu tuo parkelie zhau, Jihova dzie kekuou thuo thechü hau nunu nieko ze parkelie la; khrei pie keshü niekhrüda puorei cülie lho.

⁴Thie Abib-u khrü, nieko tuo pralie morosuo.

⁵Siro Jihovae nieko ze Kananmiako, Hitmiako, Amormiako, Hivmiako mu Jebusmiako kijü nu, puoe nieko tsütuoü di nie puonuoko ki rüsekeshü, mithunudzü mu mepfhidzü krukezhü kijüu nu nieko ze vokeshü sie, niekoe thekhrü hau nu mhatho hau chütuo.

⁶Zha thenie niekoe khreiü shükemo niekhrüda cütuo, mu zha thenie nhie Jihova ki keshü thenyi puo batuo.

⁷Khreiü shükemo niekhrüda zha thenie cütuo; khreiü keshü niekhrüda bu nie kengu nu mu nie kijü nu kehourapuorei ba hie.

⁸Mu no sünhie sie n nuou ki, ‘A Ijipt nunu takepar ki Jihova a gei kedipuo chüshü shikecü la zo’ ikecü putuo.

⁹Jihova zho-u bu n tie nu balieketuo la, süu bu n dzie nu zasi puo tuoi mu n mhinie donu mha kerükra puo chütuo: Jihova thedzie kekuo se di Ijipt nunu n ze parkeshü la.

¹⁰Süla noe pethoshüketa hau teicie kepra puotei ki chütuo.

¹¹“Jihovae n ki mu n puonuo ki rüsekeshü tuoi, n ze Kananko kijü nu vorshü di, süu pie n tsüshü ro,

¹²noe penuo par kerie pete kha kreipie Jihova tsütuo. Nie kiri penuo kerie thepfu pete Jihova vie zotuo.

¹³Gada penuo kerie kehoupuorei noe tekuonuo puo pie puo rhatuo. Morei mhanuü no süu rhalie mota ro, siro süu vo bietshewa morosuo. N nuonuo thepfuko donu penuolie kerie kehoupuorei, noe rhatuo.

¹⁴Thiesie n nuo n ketso di, ‘Hau puoca kedipuotamu?’ iro, noe puo ki, ‘Jihova thedzie kekuo puo pie Ijipt nunu, mia diekechü kiu nunu uko ze parshü.

¹⁵Faroe puo nou re di hie bu tuo mvüketa ki, Jihovae Ijipt kijü pete nu nuorieu pete dukhriwa, themia nuorieu mu kiri nuorieu rei. Süla ae thepfu penuo par kerieu pie Jihova ki ruosuo chüya; derei a nuonuo kerieu we a rhalieya’ situo.

¹⁶Hau bu n dzie gei morei n mhinie donu zasi puo chütuo; kekreilamonyü Jihova thedzie kekuo puo pie Ijipt nunu u ze parkelie la” sishü.

¹⁷Faroe themiako bu tuokelie ki, Ukepenuopfüe uko ze Filistinko kijütsa vo mo, cha süu dzükuo zorei, Ukepenuopfüe sie, “Themiako terhü ngu tse u nou rüdita di Ijipt nu la vota rei silie lho mu,” ikecü la.

¹⁸Derei Ukepenuopfüe themiako chatha ze rayha cha ze whi di Kemerie Dzükezhatsa[10] vota. Mu Israelmiako Ijipt kijü nu tuo pracü ki terhü chüketuo la uko kesepfü pra zo.

¹⁹Siro Mosae Josef ruko ketapie tuo; kekreilamonyü Josef-e thethochü Israelko ki rüse di, “Ukepenuopfü nieko meho zotuo; siro niekoe hanu nu a ruko chüse nieko medzi morosuo” sishü.

²⁰Mu ukoe Sukot nunu tuoshü, di rayhau khie Etham nu vo thuselie.

²¹Siro Jihovae uko chathaketuo la khinhie gei kimhou co puo mu theva gei uko vapezieketuo la mi co puo chü di uko mhodzü tuotuo zo. Uko bu khinhie rei theva rei tuolieketuo la.

²²Khinhie gei kimhou co-u mu theva gei mi co-u themiako mhodzünu tuo mota.