Read Angami Naga Toukepra 14 Bible Online

Toukepra 14 - Angami Naga bible

Toukepra 14

¹Süsie Jihovae Mosa ki:

²“Israelmiako bu rürei tsiesie la di Pi-hahirot mhodzünu, Migdol mu dzükezha unie donu Baal-zefon rütsie nu balienu shülie, nieko süu rütsietsa dzükezha khie balie.

³Faroe Israelmiako pu di, ‘Ukoe kijüu bu uko mapfüliete; rayha thuo uko khapieliete’ isituo.

⁴Mu a Faro nou chü pereshütuo, sidi puoe uko whuo votuo mu a Faro mu puo krodi pete mho zayie chütuo; mu Ijiptmiako bu a Jihova zoücü silietuo,” si. Mu ukoe sükemhie chülie.

⁵Themiako tataücü kediu ki pushü tse, Faro mu puo kituoko nou rüdita, sidi ukoe sie, “Israelko bu uko liekechü nunu tuotakecü, uko kedipuo chüwata mu?” silie.

⁶Süla puoe puo gura gariko keselie mu puo rüpfhünuoko zelie,

⁷Mu gura gari kevitho kedakecü krie sorou mu Ijipt nu gura gari kekrei pete, süko mho kezhako ze di.

⁸Mu Jihovae Ijipt nu kediu Faro nou chü perewa di puo Israelmiako mha rünyü mo di tuokezhüko whuo vo.

⁹Ijiptmiakoe uko whuo vo Faro gurako mu gura gariko pete, puo gura keseko mu puo rüpfhünuoko, di uko dzükezha khie Pi-hahirot khie, Baal-zefon mhodzütsa vakecü ki uko tsolie.

¹⁰Faroe uko penuo vorliecü ki, Israel nuonuokoe meho sie ru, harie, Ijiptmiakoe uko sie vorkezhü ngushü. Sitse Israelkoe michie phi di shiepie Jihova ki shüta.

¹¹Ukoe Mosa ki, “Ijipt nu mekhruchü jütaü di no rayha nu hie pesiatuoü hie ze par me? Ijipt nu hie ze parkeshü ha no mha kikecü puo chüpie hie gei shüwata ga?

¹²Hieko Ijipt nu rei, ‘Hie khapie hie bu Ijiptmia lie chü batacie’ idi n ki pu mo me? Ijiptmia lie chü baketau we rayha nunu siakezhüu ki hie la vikuo” sita.

¹³Sitse Mosae themiako ki, “Michie hie, tha meteilie, sidi Jihova kelakelie, puoe thie nie la chüshüketuou mehoshücie, kekreilamonyü nieko thie Ijiptmia ngu kethako, nieko mhakipuorei uko ngu salie lhote.

¹⁴Jihova nie la kegeituo, mu nie-e kemekrie balie ro si zo” sishü.

¹⁵Jihovae Mosa ki, “Kiüdi a ki shiezhü ga? Israelko bu tuo zozhülie nu pushülie.

¹⁶N theu pie sieshülie, mu n dzie yhapie dzükezha mho shü di süu khokezawalie, Israel nuonuoko bu dzükezha pfüthe di kijü keso nu philieketuo la.

¹⁷Siro a Ijiptmiako nou bie perewatuo, sitse ukoe uko siewhuo zo votuo mu a Faro, puo krodiko puo gura gariko mu puo gurakeseko mho zayie ngulietuo.

¹⁸Sidi Ijiptko bu ae Jihova zo ücü silietuo, ae Faro, puo gura gariko, mu puo gura keseko mho zayie ngulieta ro,” sishü.

¹⁹Sitse Ukepenuopfü dielieu Israel krodiko mhodzünu ketuou, tuo se uko sietsa vota; mu kimhou co-u uko mhodzütsa nu rüdi se uko sietsa vota.

²⁰Sidi vo Ijipt krodiko mu Israel krodiko donu thata. Sitse kimhou mu kezeiu bata. Sidi miapuorei kekreiu penuo mo di teizeizha pete vota.

²¹Süsie Mosae puo dzie yhapie dzükezha mhogei shü; ru Jihova niathutsa teikhrie re sekecü puo bu teizeizha pete dzükezhau whuo pesieshü, sidi dzükezhau pie kijü keso chüshü, sitse dzüko kezapfü bata.

²²Sidi Israelmiako bu kijü so di dzükezha metsuo nu philie, dzüko thuo uko zatsa mu uko vitsa sozha puo tuoita.

²³Ijiptmiako uko whuo zo dzükezha metsuo nu leta, Faro gurako, puo gura gariko mu gura keseko pete.

²⁴Mu teiso varüpar ru mico-u mu kimhou co-u nu ketuo Jihovae Ijiptmia krodiko meho tsu di uko bie kemide phiwa,

²⁵Uko gura gari thuoko bie pethowa[11] di uko bu re phi di süko shüsiepfü; sitse Ijiptmiako sie, “Úko Israel mhodzü ki nu tata khe, Jihova uko yapie di Ijiptko ze kegeizhüta zo” sita.

²⁶Sitse Jihovae Mosa ki, “N dzie yhapie dzükezha mho shüshücie, dzü bu Ijiptmiako, uko gura gariko, mu uko gura keseko mhogei vorlieketuo la” sishü.

²⁷Süla Mosae puo dzie yhapie dzükezha mhogei shü ru teiso par tse dzükezhau puo thuo puo dzüthou chü la vo hadzü de sou lata; mu Ijiptmiako süu mhodzünu tasie, sirei Jihova Ijiptmiako kelhou pie dzükezha nu shüwa.

²⁸Dzükoe la vor di gura gariko, gura keseko mu Faro krodiko pete uko medzi dzükezha nu kele pete vupfülie. Uko miapuorei peshashü mo.

²⁹Derei Israelmiako we kijü so di dzükezhau pfüthe philie, dzüko thuo uko zatsa mu uko vitsa sozha puo tuoilie.

³⁰Hamhie di Jihovae sünhie Ijiptmiako dzie nunu Israel kelalie; mu Israel-e Ijiptmiako dzükezha khie siakezhü ngushü.

³¹Israel-e Jihova Ijiptmiako petsou di mhatho kezha chükeshü ngushü, tsiu themiakoe Jihova preilie mu puo kituou Mosa pelelie.