Read Angami Naga Toukepra 15 Bible Online

Toukepra 15 - Angami Naga bible

Toukepra 15

¹Süsie Mosa mu Israelmiako Jihova ki tsali hau chü di sie: “A Jihova ki kelishütuo, puoe kuo kemeyie philieketa la; gurau mu puo gei kebau puo thuo kelhoupie dzükezha nu shüwa.

²Jihovae a kekuo mu a tsali, mu puo a kelakelieu chüliete; hauha a Kepenuopfü, a puo tshe zotuo, a puou Kepenuopfü, a puo pie pezhatuo.

³Jihova terhümiaviu Jihovae puo zawe.

⁴“Faro gura gariko mu puo krodiko puoe kelhoupie dzükezha nu shüwate; mu puo krüta kevithoko bu Kemerie Dzükezha[12] nu rülete.

⁵Dzüdi thuo uko vulie; ukoe ketsie tuoi kesou nu rüle tsute.

⁶He-i Jihova, n dzie n zatsa, kekuo nu zayie kechüu, he-i Jihova, n dzie n zatsa, ngumvümia biewaya.

⁷N kekuo kezha nunu no n ngumvümia penyüwaya, no n noupfhü ketseshü ro, süue rügu tuoi uko the pejüwaya.

⁸N nyhüki nyhüpfhüshü ru dzüko ketoupfü sieta, dzüdiko pfhepfü thata; kesouko dzükezha metsuo nu meteitota.

⁹Ngumvüue sie, ‘A puo whuotuo, a puo tsolietuo, mhavakelieko kezatuo, uko geinu a kemenguu chü tseituo. A a zhiecha zupielietuo, a dzie thuo uko pekawatuo’ iba.

¹⁰Noe n teikhrie kerükhrieshü, dzükezha thuo uko vulie; Guli tuoi ukoe dzükezha nu rületa.

¹¹“He-i Jihova, terhuo donu suomia n mhie ga? supuo n mhie, kemesa nu kuo phi di, mhatho kevithoko nu u ngokecü chüya ga?

¹²No n dzie n zatsa yhashü ru, kijüu uko mezulie.

¹³“Noe rhakelie themiako la n kekhrie ketho se uko chathaliete, n kekuou se uko chatha ze n kemesachü nu voliete.

¹⁴Themiakoe si, ukoe peta; kelhokemezie thuo Filistia nu kelhouko teliete.

¹⁵Tsiewe Edom nu peyuko u ziekejü chü bate; Moab krütako pe rüsürüsa bate; Kanan nu lhou keba pete ze jüte.

¹⁶Kemichie mu kemeriekecü uko gei tsur bate; n bou kekuo kezha la, uko ketsie tuoi tsesei bate. N themiako philie kemochie, he-i Jihova, noe khrükelie n themiako philie kemochie.

¹⁷N thuo uko se vo di n kijüthou gei leishütuo, he-i Jihova, n kebachü chütuoü di chükelie thechüu gei, he-i Jihova, n dzie pie chükelie kemesachüu gei.

¹⁸Jihovae kechachie mu kechachie dituo,” ishü.

¹⁹Faro gurako mu gura gariko, puo gura keseko dzükezha nu tuo leta tse, Jihovae dzükezha nu dzüko se la vor uko geishüshü; derei Israelmiako bu we kijü so di dzükezha metsuo nu tuo philie.

²⁰Sitse Miriam, siedzekesipfü, Aron üpfü, übou puo pielie, mu thenumia pete übou pie nashü di puo siemedzi vota.

²¹Sitse Miriam uko ki kelishü: “Jihova ki kelishülie, puoe kuo pezha philiete eru; puoe gura mu puo gei kebau kelhoupie dzükezha nu shüwate,” si.

²²Sitse Mosae Kemerie Dzükezha[13] nunu Israelko bu tuoshülie nu pushü, sitse uko Shur rayha nu vorlie; ukoe rayha nu zha se tuo di dzü ngulie mota.

²³Ukoe Mara[14] nu vorlie ru, Mara nu dzüu kepfhü la krielie kenjüta; süla puo zapie Mara chü.

²⁴Sitse themiako Mosa gei panya di sie, “Uko kedipuo krie ta?” sita.

²⁵Sitse puoe Jihova ki melieshü; ru Jihova seico[15] puo thashü puo kie, ru puoe süu kelhoupie dzü nu shü, sitse dzüu mouta. Sünu Jihova thezho puo mu diekhakeshü puo chüshü, sidi puoe uko ketho di sie,

²⁶“Niekoe pecü di Jihova nie Kepenuopfü pfhe rünyü, puo mhingu ki mezhükecüko chü, mu puo zhoko zeya ro, a Ijiptko gei kechü khakeshüko puorei pie nieko gei shülie lho; Ae Jihova, nie chü keshürhokeshüu zo” sishü.

²⁷Süsie ukoe Elim nu vorlie, sünu dzüluo kerekenie ba mu kukuobopfü hiethenie ba, mu ukoe sünu dzü khieki nu uko kebachü chülie.