Read Angami Naga Toukepra 16 Bible Online

Toukepra 16 - Angami Naga bible

Toukepra 16

¹Israelmia kro-u pete Elim nunu tuoshü, sidi uko Ijipt kijü nunu tuokeshü sie khrü kenieu khrü zha kerepengou nhie Sin rayha, Elim mu Sinai unie donu kebau nu vorlie.

²Mu Israelmia kro-u pete rayha nunu Mosa mu Aron unie gei panyata.

³Sidi unie ki, “Hie bu Ijipt nu themuo li khieki ba di niekhrüda cü pevü ba di Jihova dzie nu siaketau vikuo, derei nnie hie ze par rayha hau nu shüshü di themia kro-u pete bu khe siatatuoüzhie” silie.

⁴Süsie Jihova Mosa ki, “Harie, ae teigei nu nieko la niekhrüda perüshütuo; sidi themiako bu teisonhie pra di khunhie khunhie va touu pfhü kengutuo, ukoe a thapie kiekeshüu nu tuotuo mo shikecü a bu uko rüli silieketuo la.

⁵Zha sorou nhie, ukoe se kevorko pie mha kesekecü ki, ukoe teisozha kekreiko nu dekenietatuo” sishü.

⁶Süla Mosa mu Aron unie Israelmia peteko ki, “Ijipt kijü nunu nieko ze parkeshüu Jihova zoücü niekoe thevatie silietuo,

⁷mu niekoe khise Jihova zapuzayieu ngulietuo, kekreilamonyü puoe nieko Jihova gei panya bakecü site. Nieko hienie gei panya ba zorei, hienie sü kedipuomu?” ishü.

⁸Mu Mosa lasie, “Jihovae thevatie nieko bu cüketuo la, themuo mu khise ro niekhrüda pie nie tsüshü ba, kekreilamonyü Jihovae nieko panya di puo petsou keba site. Hienie sü kedipuomu? Nieko panya keba ha hienie petsou ba mo derei Jihova petsou ba zo” sishü.

⁹Siro Mosae Aron ki, “Israelmia mechü kehou pete ki, ‘Jihova mhodzünu penuo vorlie, puoe nieko panya keba siwaketa la’ ishülie” sishü.

¹⁰Siro Aron-e Israelmia mechü kehou ki pushü, mu ukoe rayhatsa mehoshü, ru Jihova zapuzayieu kimhou geinu ngu par.

¹¹Sitse Jihova Mosa ki pu di sie,

¹²“A Israelko panya keba sishüte; uko ki pushülie, ‘Teizei merü keler ki nie themuo cü pevütuo mu khise gei nie niekhrüda nie kelhuo ngulietuo; sitse nie-e a Jihova nie Kepenuopfü ücü silietuo,’ ” sishü.

¹³Thevatie ler tse vüpfhi vor razhüchüko tshulie, mu khise gei thezei thuo razhüchüu houpfü zhülie.

¹⁴Siro thezeiu soketa ki, rayha mhogei mha kememhie puo kijü mhogei thezei kemhiei zhülie.

¹⁵Israelmiakoe süu ngu tse, ukoe huoniehuo ki, “Hau kedipuo ga?”[16] ita. Ukoe süu kedipuo shikecü sikemo la. Süla Mosae uko ki, “Hauha Jihova nie bu cünu di khakeshü niekhrüdau we.

¹⁶Jihovae hakemhie di diekhashü: ‘Süu kengulie, nie kehoupuorei puo thuo cülie kevide le di; puo pfheki nu keba themia tsüphrü medzi di mia puo la omer puopuokecü kengulie,’ ” sishü.

¹⁷Israelmiako sükemhie chülie, ukoe huomia tsa huomia kra idi kengulie.

¹⁸Derei uko omer se süu mejü sie ru, pakengu krakelieu rei tshu kezie chü mo, mu kengu petsakecüu rei tsokemo chü mo; mia puo puo thuo cülie kevide kengungu zo.

¹⁹Sitse Mosae uko ki, “Mia puo bu rei süu yopuo rei khapie ba khise tso hie” sishü.

²⁰Derei uko Mosa die rünyü mo; sidi huomia süu huo khapie ba khise tso, sitse sünu pesa leta di suota; sidi Mosa bu uko gei puo nei mota.

²¹Teisoduü ukoe mia puopuo thuo cülie kevide pakengu; derei niaki le parta ro, süu zetataya.

²²Zha sorou nhie ukoe vakenie ca kengulieya, mia puo la omer kenienie; mu mechü kehou nu krütako vor di Mosa ki pu,

²³sitse puoe uko ki, “Jihova diekhakeshüue hakemhie: ‘Sodu kerüleizha ketho puo, Jihova la sabat kemesau; no rie nyü kebau rielie mu cha nyü kebau chalie, mu sükezieko khapie ba khise tsolie,’ ” sishü.

²⁴Süla ukoe Mosa uko ki kepu tuoi khapie ba khise tso; mu süu suota mo mu pesa leta mo.

²⁵Mosa sie, “Thie we hau cülie, thie Jihova la sabat puokecü la; nieko thie lie nu hau ngulie lho.

²⁶Zha sorou nieko hau patuo; derei zha thenie sabat nhie, puo rei bu balie lho,” sishü.

²⁷Zha thenie nhie themia huo pakengutuoü pra, mu puo rei ngulie mo.

²⁸Sitse Jihova Mosa ki, “Nieko kichiepuo a diekhakeshüko mu a pukeshüko ze mvü batuo mu?

²⁹Mehocie! Jihova sabat pie nie tsüshü; süla zha sorou nhie puoe zha kenie ca pie nie tsüshüya; nie kehoupuorei nie chü nu balie, mia puo bu rei zha thenie nhie puo chü nunu pra hie,” sishü.

³⁰Süla themiako zha thenie nhie rüleilie.

³¹Siro Israel kinuko süu za pie manna tholie, süue koriander tsia mhiei, kra, mu süu cüsie ro mepfhidzü pie kechü niekhrüdapfü puo mhiei.

³²Siro Mosae sie, “Jihova diekhakeshü hamhie: ‘Hapfü omer puo pie nie thephou pete nu khapie tuolie, sitse ukoe a Ijipt kijü nunu nieko ze kepar ki a rayha nunu se nie vakechü niekhrüdau ngulieketuo la’ ” sishü.

³³Siro Mosae Aron ki, “Lipfhü puo pielie, di manna pie sünu shülie, sidi pie Jihova mhodzünu balie, nie thephou pete nu pie tuoketuo la” sishü.

³⁴Jihova Mosa ki diekhakeshü mhiei Aron-e khrukhre di süu khapie baketuo la, süu khapie dietseidiekho-u[17] mhodzünu shüshü.

³⁵Mu Israelkoe cie hiedia manna cü, ukoe themia lhoulie kevi kijü nu vor tsolie kemochie, ukoe Kanan kijürie nu vorlie kemochie, ukoe mannau cü.

³⁶Omer puoe efa za ker chü di za puo.