Read Angami Naga Toukepra 17 Bible Online

Toukepra 17 - Angami Naga bible

Toukepra 17

¹Israelmia mechükro-u pete Jihova diekhakeshü kize, Sin rayha nunu rülili di rüyie vor Refidim nu uko razhüchü chülie; derei sünu themiako bu krieketuo dzü ba mo.

²Süla themiakoe Mosa gei panya di, puo ki, “Dzü krieketuo khashü hie tsücie,” ita. Süla Mosae sie uko ki, “Kiüdi nieko a pejoya ga? Kiüdi nie Jihova medophiya ga?” sishü.

³Derei themiakoe sünu terhü di dzü krie nyülie, sidi Mosa gei panya di sie, “Kiüdi no Ijipt nunu hieko ze par di, hieko nuonuoko mu hieko khuriko bu terhü di siatatuoüya ga?” silie.

⁴Süla Mosae Jihova ki shie di sie, “A bu themia hako pie kedipuo chüta? Uko ketsie pie a va kemoyo zote;” sishü.

⁵Sitse Jihova Mosa üse, “Israelmia phichüko huo zelie di themiako mhodzütsa philie; mu n dzie nu no kethe se Nail rü vükeshüu theze selie.

⁶Harie, a Horeb nu tsiekrieu gei n mhodzünu thatuo. Noe tsiekrieu vüshütuo mu süu nunu dzü partuo, themiako bu krielieketuo la” sishü. Ru Mosae Israel phichüko mhingu ki nu sükemhie chüshü.

⁷Mu puoe thechüu pie Massa[18] Meriba,[19] chülie, kekreilamonyü Israel nuonuokoe mia gei panyapara mu ukoe “Jihova u donu tuo mo me?” idi Jihova medophikecü la.

⁸Süsie Amalekko vor di Refidim nu Israelko ze kegei.

⁹Sitse Mosae Joshua ki, “Uko la themia kedalie, sidi pra Amalekko ze kegeilie; sodu a a dzie nu Kepenuopfü theu selie di kijükhru-u tsüle gei thalietuo” sishü.

¹⁰Süla Joshua Mosa puo ki kepu mhiei chülie, di Amalekko ze kegei; siro Mosa, Aron, mu Hur uko kijükhru-u tsüle gei kholie.

¹¹Mosae puo dzie yhapie ketha ki, Israelko kuolie mu puo puo dzie pie kerünuoketa ki Amalekko kuolie.

¹²Derei Mosa dzie mezieta; süla ukoe ketsie puo pielie di süu pie puo khro shüshü, mu puoe sügei balie, siro Aron mu Hur unie mia puo puo dzie tietsa puopuo mengu pielie, sidi niaki kele ketso puo dzie bu metei balie.

¹³Sidi Joshua bu zhiecha süu pie Amalek mu puo themiako penyüwa.

¹⁴Siro Jihova Mosa ki, “Rükra tuolieketuo la hau thupie leshüda puo nu shülie sidi Joshua kesi ki nu phrüshülie; Amalekko kerükra ae teikhro bie pejü lotsowatuo” sishü.

¹⁵Sitse Mosae ruosuoba puo chülie di süu za pie, Jihovae a pfhelhau, idi tholie,

¹⁶puoe pu di, “Jihova pfhelhau la thedzie puo ba! Jihova thephou pete nu Amalek ze kegeituo” sishü.