Read Angami Naga Toukepra 18 Bible Online

Toukepra 18 - Angami Naga bible

Toukepra 18

¹Jethro, Mosa meiue Midian zievo-u Ukepenuopfüe Mosa mu puo themia Israelko gei mhachükeshü, kikemhie di Jihova Ijipt nunu Israelko ze parlie shikecü pete sishü.

²Mosa meiu Jethroe Mosa kimiapfü Zipora, Mosa puo ketsekewapfü,

³mu puo nuonie zelie, mia puo za Gershom (puoe “A mia rüna nu chazoumia puo chü,” idi pukecü la.)

⁴Mu kekreiu za Eliezer[20] (Puoe, “A puo Kepenuopfü sü a kekhruohiu, sidi Faro zhiecha nunu a shüphralie” idi pukecü la.)

⁵Mu Mosa meiu, Jethro süu nuonie mu puo kimia ze di rayha nu Mosa ki vor, puoe Ukepenuopfü kijüthou khieki nu razhüchü nu vor.

⁶Puoe dielie ketsepie Mosa tsü di, “A n meiu Jethro a n kimia mu n nuonie ze di n ki vorzhie,” sishü.

⁷Mosae puo meiu ze kesetuoü pa, sidi puo nuketsu puo kelu di puo meboshü; siro unie huoniehuo rüli ketso, sidi pfhekiu nu leta.

⁸Sitse Mosae puo meiu ki Jihova Israel la Faro gei mu Ijiptmiako gei kedipuo puo chüshü shikecü, mu cha nu uko mhakere dzükelie nu, kimhie di Jihovae uko shüphralie shikecü pete pushü.

⁹Mu Jethroe Jihova Israel gei mha kevi pete chükeshü, süusü puo Ijiptmiako dzie nunu uko shüphrakeshü la puo nei phita.

¹⁰Sitse Jethroe sie, “Jihova tsheliecie, Ijiptmia dzie nunu mu Faro dzie nunu nieko shüphrakeshüu.

¹¹Tsiewe a Jihova terhuo kekrei pete ki zhakuokecü siliete, kekreilamonyü puoe Ijiptmiako[21] uko gei u nou re phi keba nunu uko ze parlieketa silie.”

¹²Sitse Mosa meiu Jethroe kethe ruosuo puo mu ruotho chüpie Ukepenuopfü tsü; siro Aron-e Israelmia phichü pete ze vo Ukepenuopfü mhodzünu Mosa meiu ze niekhrüda cü.

¹³Süsie nhie Mosae capi chü themiako nyie kecütuoü di balie, mu themiakoe khise nu vo thevatie ketso Mosa houpfü tha tso.

¹⁴Mosa meiue puoe themiako la mha chü keba pete ngushü tse, puoe sie, “No themia hako la mha chükeba hau kedipuomu? No kiüdi n rübei ba, mu themiako pete bu khise nunu vo thevatie ketso n houpfü thaya mu?” sita.

¹⁵Sitse Mosae puo meiu ki, “Themiako Ukepenuopfü ki mha ketsotuoü di a ki voryacü la;

¹⁶uko dienya puo ba ro, uko a ki vorya mu ae mia puo mu kekreiu unie donu theca chüya, sidi ae Ukepenuopfü zhoko mu puo mharhüko se uko pesishüya” sishü.

¹⁷Mosa meiu puo ki, “No chü kebau vi mo.

¹⁸No mu n ze keba themiako nieko thuo nieko bie pelhowatuo, mhatho hau n la mesithor; n rübei hau chükeliepfü mo.

¹⁹Tsie a pfhe rünyülie; a mharhüshü n kietuo, mu Ukepenuopfü bu n ze balie! Noe themiako sou nu Ukepenuopfü mhodzü thalie, sidi uko bu u dienyako se Ukepenuopfü ki vorlie;

²⁰noe thezhoko mu mha pepikelieko pie uko pethashülie, di uko bu medzi morokesuoko chau mu chü morokesuou silie.

²¹Sizomonyü themia pete donu mha selie kevi, süu Ukepenuopfü kepreimia, pelelie kesümia mu theso rütseyakecümia kedalie; di themia süko pie themiako mho shü di uko bu mia nyie puo, krie puo mu mia ker kekhakecü chülie.

²²Sidi uko bu puotei pete nu themia nyie kecütalie; thenyie kereko uko bu se n ki vorlie, derei thenyie kerüüko uko thuo pepiwalie, sitse süu n la rüükuotuo, mu ukoe n ze thepieu pfülietuo.

²³No hau chülie, mu Ukepenuopfü rei diekhashü n tsü ro, noe hielietuo, mu themia pete rei unou mene di u thuo u chü nu votatuo” sishü.

²⁴Süla Mosae puo meiu pfhe rünyülie, puo pukeshü pete chülie.

²⁵Mosae Israel pete nunu themia mha selie kevi kedalie, di uko pie themiako mho kezha chüshü, mia nyie puo, krie puo, hiepengou mu mia ker kekhakecü chüshü.

²⁶Mu uko puotei pete nu mia nyie kecü; ukoe thenyie kereko se Mosa ki vor, derei thenyie kecü pete uko thuo pepiwaya.

²⁷Süsie Mosae puo meiu bu tuota, mu puoe tuo puo ra la vota.