Read Angami Naga Toukepra 19 Bible Online

Toukepra 19 - Angami Naga bible

Toukepra 19

¹Israelko Ijipt nunu praketa sie khrü seu va, Sinai rayha nu vorlie.

²Mu ukoe Refidim nunu tuoshü di Sinai rayha nu vorlie tse, ukoe kijüthou-u mhodzütsa nu razhüchü chülie.

³Mosae Ukepenuopfü ki kho, mu Jihova kijüthou geinu puo kie, di sie, “No Jakob kinuko ki hakemhie pushücie, mu Israelmiako ki pushülie.

⁴A Ijiptmia gei kedipuo chüshü shikecü, mu a kikidi tsüüra shü geinu nieko pfü a ki vorlie shikecü niekoe ngushüte.

⁵Süla tsie, nieko a pfhe rünyü mu a diekhakeshüko zetuoü ro, themiako pete donu niekoe a vie chü pekreilietuo; kekreilamonyü kijü pete a vie,

⁶mu nieko a la kedi zievoko mu kemesa seyie puo chülietuo. Die hako noe pie Israel nuonuoko ki pushülie” sishü.

⁷Süla Mosae vor di themiako donu phichüko kielie, di Jihova puo ki diekhakeshü dieko pete pie uko mhodzünu shü.

⁸Mu themia peteko keze di, “Hie Jihova pukeshü pete chütuo” idi pushü. Sitse Mosae themiako die pie Jihova ki pushü.

⁹Mu Jihovae Mosa ki, “Harie, a kimhou shüdekecü puo nunu n ki vorzhie, themiako bu a n rüchükecü silie di kechachie n pelelieketuo la” sishü. Sitse Mosae themiako dieko pie Jihova ki pushü,

¹⁰ru Jihova Mosa ki, “Themiako ki vo di uko bu thie mu sodu uko chü kemesalie, mu uko bu uko pfheneiko menyiwalie,

¹¹mu zha se nhie dojülie; zha se nhie Jihovae themia pete mhingu nu Sinai kijüthou gei tsurketuo la.

¹²Mu no themia lutsahatsa kebako la riehou puo chülie, di uko ki, ‘Kijüthou gei kho molieketuo morei puokhie bie molieketuo la menuoliecie; kehoupuorei kijüthou-u kebiemia sia zotuo.

¹³Ketsie pie puo va morei theü pie pekhriwatuo; khunuo morei themia shierei, puo bu rheilie lho’ si, ketsüu khou petoshü tse, uko bu kijüthou-u gei khorlie” sishü.

¹⁴Süla Mosae kijüthou geinu themiako ki kerlie, sidi u chü kemesalie; mu uko bu u thuo u pfheneiko menyiwa.

¹⁵Siro puoe themiako ki, “Zha se nhie la dojü balie; vo thenumia penuo hie,” sishü.

¹⁶Zha se duü teise, teimela, mu kimhoushü soukecü puo kijüthou zepfü bata, siro ketsü puo khou peto se sashü tse, themia razhüchü nu keba pete peta.

¹⁷Süsie Mosae Ukepenuopfü ze keseketuo la razhüchü nunu themiako ze par; mu ukoe kijüthou phinu thalie.

¹⁸Mu Sinai kijüthou-u mikhu thuo puo zepfülie, Jihova mi nunu sügei kercü la; mu mikhu süu miphu puo nunu mikhu khu kesie tuoi, khurüdzi sieta, mu kijüthou pete rünieta.

¹⁹Siro ketsü pfhe meyie miemieketa kize Mosa diepushü, mu Ukepenuopfüe teikese nunu puo die kelashü.

²⁰Mu Jihovae Sinai kijüthou gei tsur; mu Jihova Mosa bu kijüthou tsüle gei khonu di puo kie, mu Mosae sügei kho.

²¹Sitse Jihovae Mosa ki, “Tsu di themiako tarhowalie, ukoe Jihova mehotuoü vaphapfü le di mia kekra siata rei si mo mu.

²²Siro zievoko Jihova penuo vorketuoko bu rei u chü kemesalie, si mo liro Jihova uko gei rei phituo” sishü.

²³Sitse Mosae Jihova ki, “Themiakoe Sinai kijüthou gei khorlie kenjü, kekreilamonyü no n thuo hie ki diekhashü, di sie, ‘Kijüthou gei puo riehou chüwa di se kemesalie’ ite,” sishü.

²⁴Mu Jihova puo ki, “Kelie, di Aron bu n ze khorlie; derei zievoko mu themiako bu Jihova ki khotuoü pfüpha ler hie, puo uko gei phita rei silie lhomu” sishü.

²⁵Süla Mosa ke di themiako ki pushü.