Read Angami Naga Toukepra 2 Bible Online

Toukepra 2 - Angami Naga bible

Toukepra 2

¹Siro Levi kinumia puo pra di Levi nuomiapfü puo lielie.

²Thenupfüe nuonipfülie di thepfunuomia puo penuolie; mu hapfüe unuoyo zivikecü ngulie tse khrü se puo keviese bata.

³Sidi puo kevie salie kenjüta tse, puo la tekhrierha puo pfhülie, di alakatar mu seitsa pie süu nyhülie; sidi unuoyo pie sünu shülie di süu pie kerükhie tekhrie donu shüwa.

⁴Mu puo pie kedipuo chüwatuo shikecü sishütuoü di puo üpfü bu kepecie nu tha.

⁵Süki Faro nuopfüe dzü rülutuoü kerü nu tsur, mu puo liethopfüko kerükhie rühou tuo; ru puoe tekhrieko donu merhau zhükecü ngulie di süu chüpie phirnu di puo liethopfü ketseshü;

⁶sidi puoe süu hieshü ru unuoyo ngulie; mu harie; unuoyo sü krazhü. Sitse puoe unuoyo ngu puo noumezhielie di sie, “Hayo sü Ibrimia nuoyo puote,” si.

⁷Sitse puo üpfü Faro nuopfü ki, “A bu vo unuoyo thekepie n tsüketuo la Ibrimiapfü donu nuozemiapfü puo kie ze vortieya me?” ishü.

⁸Sitse Faro nuopfüe puo ki, “Vocie,” si. Süla thenupfü vo unuoyo zuo kieshü.

⁹Sitse Faro nuopfüe puo ki, “Nuo hayo ze volie, di puo thekepie a tsücie, siro a n zha chüshü n tsütuo” si. Süla thenupfü u nuoyo zelie di puo thekelie.

¹⁰Mu unuoyo memielie, sitse puoe unuoyo ze Faro nuopfü ki vorshü, ru puoe pie puo nuo chüta; mu puoe puo zapie Mosa chü, mu puoe sie, “Kekreilamonyü a dzü nunu puo shüparkelie la” ita.

¹¹Mosa-e phichülie tse, khunhie puo puo themiako ki kho di uko pie kemesiko mehoshü; mu puoe Ijiptmia puoe puo themia Ibrimia puo vüketha ngu.

¹²Puoe lutsahatsa mehoshü, mu miapuorei ngu mo ru puoe Ijipt-u dukhriwa; di theshünyo nu puo keviewa.

¹³Süsienhie puoe re pra ru; harie, Ibrimia kenie keze keshü tha; ru puoe kekrükecüu ki, “No kiüdi n ze Ibriu vüya ga?” sishü.

¹⁴Sitse puoe sie, “Supuonie n bu hie mho kedi mu capimia chüshü ga? No Ijipt-u dukhrikewa tuoi a dukhriwa nyüya me?” silie. Sitse Mosae michie di, “Mha hau mia si toute” icü lelieta.

¹⁵Siro Faroe süu sishü tse, Mosa dukhrikewa leta. Derei Mosae Faro kinu nu tata di Midian kijü nu bata; mu puoe dzükhou puo khieki balie.

¹⁶Siro Midian nu zievo-u puo nuo thenumia thenie ba; mu uko vor di dzüü, siro uko puou kuoko bu krieketuo la dzü pie dzükriebouko nu rei shüshü.

¹⁷Sitse Tekuokepfheko vor di uko whuowa; derei Mosae siethalie di uko khruohishü, di dzü pie uko kuoko tsüshü.

¹⁸Ukoe uko puo Reuel ki vor tse, puoe sie, “Kimhie di thie nieko vor zi haita ga?” si.

¹⁹Sitse uko sie, “Ijiptmia puo tekuokepfheko dzie nunu hieko shüphrashülie, mu hieko la dzü rei üshü di hieko kuoko dieshü.”

²⁰Sitse Puoe puo nuopfüko ki, “Siro puo kirapuo ba ga? Nieko kiüdi themiau khawa ga? Puo kieshülie, puo bu niekhrüda cülieketuo la” sita.

²¹Mu Mosa rei themiau ze baketuo puo neilie, mu puoe puo nuopfü Zipora pie Mosa tsüshü.

²²Puoe thepfunuomia puo penuoshü, puo za thopie Gershom chülie, kekreilamonyü puoe sie, “Ae mia kijü nu rüsomia chü di lhou” ikecü la.

²³Zha kekra sie Ijipt kediu siata. Siro Israelmiakoe mia diechü di meheimelozhü zo, sidi kekhruohi cha, sitse uko kediekechü la rükhruokeshüko Ukepenuopfü tsolie.

²⁴Siro Ukepenuopfüe uko meheimelokeshüko sishü tse, Ukepenuopfüe Abraham, Isak mu Jakob ze dietseidiekhopie ketuou rükralie.

²⁵Siro Ukepenuopfüe Israelko mehoshü, sidi Ukepenuopfü uko rüli leshü.