Read Angami Naga Toukepra 22 Bible Online

Toukepra 22 - Angami Naga bible

Toukepra 22

¹Mia puo thudo puo morei tekuo puo rügulie, di süu dukhriwa morei zewa ro, puoe thudo puo la thudo pengou mu tekuo puo la tekuo dia pie sutuo.[24] Puoe thesu khashü zotuo; puoe mhapuorei jü ro, puo rügu la puo zewatuo.

²erügumia puoe mia ki rhie le ba ngulie, sidi puo vükhriwata ro, süu pie kedukhri tholie lho;

³derei niakiu thu parketa sieta ro, süu pie mia kedukhri thotatuo.

⁴Rügukelie khunuou puo dzie nu rhei ba ngulie ro, puo thuo thudo, morei gada, morei tekuo shierei, puoe puo de kenie pie sutuo.

⁵Mia puoe puo kiri bu lie morei khubelie puo cüwata, morei puo kiri phreishü di kekreimia puo lie cüwa ro, puoe puo lie morei puo khubelie kevithora nu thesu chü latuo.

⁶Mi tu par di zohunha pepfülie di telha repiekezhü morei telha puobo gei keba morei lie thewa ro, mi thukeshüu bu thesu chü tseituo.

⁷Mia puoe raka morei mhanya pie puo zanuou dzie nu banu di peleshü, mu themia süu kinu nu mia bu süu rügulieta di kerüguu ngulieta ro, süu bu süde kenie sutuo.

⁸Mhanuü kerüguu ngulie mota ro, ki niepu-ue Ukepenuopfü mhodzünu vor di puoe puo zanuou vieko bielieta mo mo shikecü pfhütuo.

⁹Kehoupuorei thedo nu thudo, gada, tekuo, pfhemenei la niepu kesuta morei mha pejükewa pevie di sie, “Hau a vie tou zo,” iphreta ro; unie nyie se Ukepenuopfü mhodzünu vortuo; Kepenuopfü puo pejoketau bu se kenie pie kekreiu sutuo.

¹⁰Mia puoe puo gada, thudo, tekuo morei khunuo kehoupuorei pie puo zanuou bu peri thanushü, mu miapuorei ngu mo di, süu siata morei rüzalie morei tepieta ro,

¹¹Jihova mhodzünu nu rüse puo pie ba di unie bu unie nyieu pepituo; sidi khunuo niepuue kekreiu rüse rünyülieta ro thesu khashü motatuo.

¹²Derei süu puo rügulieta ro, puoe thesu pie khunuo niepu-u tsütuo.

¹³Mhanuü khunuo bu kiri süu ciechücierhawata ro, puo bu zhapu la kesiachü süu pie vorlie, sitse ciechücierhakewau la puoe thesu sulie lho.

¹⁴Mia puo mia kiri puo thepulie, mu puo niepuu puo ze tuo mo di süu bie kerüzawa, morei pesiawa ro, puo bu thesu chü tseituo.

¹⁵Puo niepuu puo zetuo di ro, puo bu thesu chülie lho, puo khunuo süu nyie se ro, süu nyieu la we sushütuo.

¹⁶Mia puoe rüüphouse mia puo vakha moluo kecüpfü puo seketsilie, di puo ze zhüwa ro, puo bu süpfü la thema khashü di süpfü bu puo kimia chütatuo.

¹⁷Puo puoe süpfü khashü mvüta ro, puo bu rüüphousemia la thema zho de khashütuo.

¹⁸Nie bu themoumiapfü perhei pie tuolie lho.

¹⁹Kehoupuorei khunuo ze zhükecüu pie kesia nu shütuo.

²⁰Kehoupuorei Jihova rübei mo di terhuo kekrei ki ruosuo kechümia peka lotsowatuo.

²¹Nie donu lhoutuoketa chazoumia gei puotou kemo morei u pesekecü chü suo, nie rei Ijipt kijü nu chazoumia chü lhoukecü la.

²²Nie samimiapfü morei merünuomia pechüpenyü hie.

²³Nie uko pechüpenyü di uko a ki rükhruoshü ro, ae uko rükhruokeshü rünyü tou zotuo;

²⁴sidi a noupfhü tu partuo, mu a zhiecha pie nie dukhriwatuo, sidi nie nupfünuo bu samimia chütatuo mu nie nuonuo bu merünuomia chütatuo.

²⁵Nie raka pie a themia nie donu keba kejümia thepushü ro, no raka pie mia pecayakecümia tuoita hie, mu no puo ki puopra merü hie.

²⁶Thepu puo la n zanuou pfhe pielie üro, niaki le kemo nu pie puo tsü lawalie;

²⁷puo kewhe süyo zocü la. Puo mo wheketuo pfhedzie süyo zo üro süu dzie mo di kimhie zhülie ta? Mu puo a ki rükhruoshü ro, ae rünyü zotuo; ae a noushünouzhie nyicü la.

²⁸No Ukepenuopfü kerhie hie, morei nie kekhayakezhau rüse hie.

²⁹Noe n lieyie ketshukelhuo chü mu n khubedzü tshuzie keba nunu mha khashü menyhota hie. Noe n nuo thepfu nuorieu pie a tsütuo.

³⁰Noe n thudo mu n kuoko rei pie sükemhie chütuo; zha thenie puo bu puo krüpfü ze thalie; zha thetha nhie no pie a tsüwatuo.

³¹Nieko chü kemesapie a tsüwaketa themia kro puo chütuo; süla nieko khunuo bu terha nu ciechücierhawaketa chü puorei cülie lho, niekoe süu kelhoupie tefüko tsüwatuo.