Read Angami Naga Toukepra 23 Bible Online

Toukepra 23 - Angami Naga bible

Toukepra 23

¹Noe kethokemo dieyie pu keza hie. Noe kerüzhümia puo ze kedzieselie di, kelhiecü zhapu chü hie.

²Noe mha kesuo chütuoü di themia krodi siemedzi hie; morei dienya nu kekrükecü krodiu medzi di kemezhüu bie kediwatuoü zhapu chü hie;

³morei dienya nu kejümia yapie pekrei hie.

⁴Noe n ngumvüu thudo morei gada yotazhü di ngulie ro, no süu ze la vor puo tsü morosuo.

⁵Noe n ngumvüyakecümia puo gada puo bu puo krapfüzhü di ngulie ro, no puo bu sizhü di kha zowa suo, no puo khruohi di puo phoushü morosuo.

⁶Noe kejüu dienya nu puo mezhüu bie kerüpfhiwa suo.

⁷Ketijü ze kepecietuolie, siro kejokejüu mu kemezhüu dukhri hie, ae kerüzhüu khawalie lhocü la.

⁸Mu noe theso lie lie lho, thesoe mhakesimia mhi bie peciewaya mu kemezhü nu ketuoko nyie bie ketsürüwayakecü la.

⁹N donu lhou keba solhimia pese hie, nie solhimia nou sü si eru, nie rei Ijipt kijü nu solhimia chükecü la.

¹⁰Teicie sorou noe n lie nu tsiavatuo mu puo chiebie se vor kengutuo;

¹¹derei cie thenie-u ro no süu bu rüleituo mu puo bu kro zhütuo, nie themia kejüko bu u va ngulieketuo la; mu uko peshakeshüko nhanu khunuoko bu rei cütuo. N khubelie mu n Oliv zieu rei pie no sükemhie chütuo.

¹²Zha sorou n mhatho chütuo, derei zha thenie nhie no rüleituo; n thudo mu n gada bu rüleilieketuo la; siro n diepfü nuou, mu solhiu bu rei u keleilieketuo la.

¹³A n ki pukeshü pete le menuolie, sidi terhuo kekrei za puorei se cha hie, morei sikecü nie tie nunu pu par rei hie.

¹⁴Niekoe teicie puo nu va se a za nu thenyi nyipie a tsütuo.

¹⁵Nie khreiü shükemo niekhrüda nyiu nyituo; a nie ki diekhakeshü tuoi, noe Abib-u khrü puotei chiekeshü mese ki zha thenie la khreiü shükemo niekhrüda cütuo, nie süu khrü Ijipt nunu parkelie la. Miapuorei dziethuo di a mhodzü ki vorlie lho.

¹⁶Nie nie lie nu ciekeshü, n mhatho si vüshü n tsükerieu, vate nyiu nyituo. Nie teicie thela ki vate nyiu nyituo, no n lie nunu n mhatho siu pfhü kengukelie ki.

¹⁷Cie puo nu va se nie thepfumiako Ukepenuopfü Jihova mhodzünu vor pengutuo.

¹⁸Nie khreiü keshü niekhrüda se a ruotho zie salie lho, morei a nyiu nu chüshuo bu ba khise tsolie lho.

¹⁹Nie lie nu kepar puo si kerietho-u se Jihova nie Kepenuopfü kiu nu vortuo. No temvü nuonuo pie puo krü nudzü nunu chalie lho.

²⁰Harie, a teigeidieliemia puo ketsepie nie mhodzünu shüzhie, nie cha nu nie pfhe ze vo nie la thechü kesepie kebau nu shülieketuo la.

²¹Puo sanyü di puo pfhe rünyülie, puo petsouta hie, nie vajokewa puoe vashü nie tsülie lhokecü la; a zae puo gei tuotacü la.

²²Derei nie menuo di a pfhe rünyülie di a kepu pete chülie ro, süsie ae n ngumvüu ngumvütuo mu n keperhieu perhieshütuo.

²³A dielieu nie mhodzü rie di, n ze Amorko, Hitko, Perizko mu Kananko, Hivko, mu Jebusko ki voshü tse, a uko bie pejüwatuo,

²⁴nie-e uko rhuoko mhodzünu nuketsulie lho, morei uko rüsuolie lho, morei uko mhathoko tuoicü chülie lho, derei niekoe uko penyü tseiwatuo mu uko coko bietshe bietshawatuo.

²⁵Nie Jihova nie Kepenuopfü rüsuotuo, sitse ae nie niekhrüda mu nie dzü mhogei jashütuo; mu ae nie donu kechükenyü chü kelhiwatuo.

²⁶Nie kijü nu miapuorei puo nuo krüta morei nuojü chülie lho; ae nie teisozhako chü pevi tseishütuo.

²⁷Ae kemeriekecü puo ketse pie nie mhodzünu shütuo di nie-e vo zekesekelie pete, nie petsou kevor pete bie kebvüwatuo, mu ae n ngumvümia pete bu n mhodzünu nu rürei pesie latatuo.

²⁸Mu ae thepetheruo ketsepie nie mhodzü shütuo, sidi süko bu nie mhodzünu Hivko, Kananko, mu Hitko whuowatuo.

²⁹Mu ae cie puo nu nieko mhodzü uko whuowalie lho, siüro kijüu bu mekriemeza mota mu nhachü kra par di n petsouta molie kevi la.

³⁰Rülili di ae nie mhodzünu nu uko whuotuo, nie krasier kijüu pebalie kemochie.

³¹Mu ae Kemerie Dzükezha[25] nunu Filistinko dzükezha ketso, mu rayha nunu vo Eufrat ketso pie n kijürie chütuo; ae rünau nu kelhouko khapie n dzie nu shüwatuo, mu nie mhodzünu nu uko whuowatuo.

³²Nie uko morei uko rhuoko ze dietseidiekho puorei chülie lho.

³³Uko bu nie kijü nu balie lho, ukoe nie chüpie nie bu a gei kephouma chüta rei silie lhomu; nie uko rhuoko lie chüta ro, süusü nie malieketuo ciephrie puota zotuo.