Read Angami Naga Toukepra 24 Bible Online

Toukepra 24 - Angami Naga bible

Toukepra 24

¹Mu puoe Mosa ki, “Jihova ki kholie, no mu Aron, Nadab mu Abihu, siro Israel phichüko mia hiethenie, sidi pecie nunu rüsuocie.

²Mosa rübei Jihova penuo phirlie, mu themiako bu puo ze khor hie,” sishü.

³Mosa vor di themiako ki Jihova dieko mu thezhoko chükeshü pete pushü; mu themiakoe pfhe puo chü di sie, “Jihova pukeshü dieko pete hie-e chülietuo” si.

⁴Siro Mosae Jihova pukeshü dieko thulie. Mu puo khiserüna sielie di kijüthou phi nunu rüsuoba puo chülie mu co kerekenie selie, Israel seyie kerekenie tse.

⁵Siro puoe Israelmiako donu khriesamia kerekenie ketseshü di uko bu kethe ruosuo khashü mu thudo vitho ruosuo chüpie Jihova kishü.

⁶Mu Mosae chüzieu tietsa pie seikhouko nu shülie, mu chüzieu tietsa kegepie ruosuobau vashü.

⁷Süsie puoe dietseidiekho leshüdau chüpielie di themiako kesi kinu phrüshü; mu uko sie, “Jihova pukeshü pete hie chülietuo, mu hie dieze chütuo” sishü.

⁸Sitse Mosa thezieu pielie di süu kegepie themiako gei shüshü, di sie, “Harie Jihovae die hako pete medzi di nie ze dietseidiekho chükelie zieuwe” sishü.

⁹Süsie Mosa mu Aron, Nadab mu Abihu, tsiu Israel phichüko mia hiethenie keze kho,

¹⁰mu ukoe Israel Kepenuopfü ngu; mu puo phinie khro safir tsie pie khrakecü mhiei; teigei kemesa mhie zo.

¹¹Mu puoe puo dzie pie Israelko donu kezhako gei shü mo; uko rei Ukepenuopfü ngu, sidi mhacümhakrie.

¹²Jihovae Mosa ki, “Kijüthou gei a ki khorlie, di sünu pfhe balie, siro ae thezho mu diekhakeshüko uko kepetha la thukelie, ketsie tsiekranie pie n tsüshütuo” sishü.

¹³Süla Mosa puo kekhruohiu Joshua ze sa di Ukepenuopfü kijüthouu gei kho.

¹⁴Mu puo phichüko ki, “Hanu nu hienie pfhe balie, hienie nieko ki la vor kemochie; Aron mu Hur nieko ze batuo; kehoupuorei dienya huo nyita ro, se unie ki volie” si.

¹⁵Süsie Mosae kijüthou gei khota, mu kimhou shü vor kijüthou zepfülie.

¹⁶Jihova zapuzayieu Sinai kijüthou gei ba di, kimhouu nunu zha sorou süu zepfü bata; mu zha thenie nhie puoe kimhouu donu nu Mosa kie.

¹⁷Israelko mhingu ki we Jihova zapuzayieu sü kijüthou tsüle gei mha the pejüwalie kevi mi puo keba tuoi zo.

¹⁸Mosae kimhou nu le di kijüthou gei kho. Mosae teisozha hiedia mu teizeizha hiedia kijüthou gei bata.