Read Angami Naga Toukepra 25 Bible Online

Toukepra 25 - Angami Naga bible

Toukepra 25

¹Jihova Mosa ki,

²Israelko ki pushücie, uko bu a la mha khashünu di; themia kehoupuorei puo nou nu chü nyü di khakeshü sephra pielie.

³Mu no uko kinu mha khakeshü hako pielie: Suna, rakachü, mu merenyi,

⁴kelo loshü, teimeziekecü, mu merieyharakecü, mu linen lo mese mu ze kemegeikecü, temvümie,

⁵tekuochü zhü rewaketa, chüzhü kevi, akasia sei,

⁶mibouko la tier, u kenhekecü tier nyako mu mharekethengu nyako,

⁷Onix tsie, mu zievoko boulie gei mu uko merü keyau gei kuketuo tsieko.

⁸Mu uko bu a la kemesachü puo chüshülie, a bu uko donu balieketuo la.

⁹A puorhi thapie n kiekeshü tuoi rüsuo pfhekiu rei, mu puo nya puorako rei chü phreliecie.

¹⁰Uko bu akasia pie dietseidiekhobou chülie puocha thu kenie di puotie, puozha thu puo di puotie mu puo rükrie thu puo di puotie.

¹¹Mu no suna ketho pie puo nukou rei puo mho rei dalie, mu suna pie puo toucha puo chü puo houlie.

¹²Mu no suna pie riehou dia chülie di pie puo phi diako nu shülie, kenie tietsa puo mu kenie pie kekreitsa shülie.

¹³Noe akasia pie seizo chülie di suna pie sünie dalie.

¹⁴Sidi uko bu dietseidiekhobouu pieketuo la seizonie pie dietseidiekhobouu khie rohouko nu pelielie.

¹⁵Seizo nie pie dietseidiekhobouu rohouko nu pie ba zolie; sünu nu thapie parwa hie.

¹⁶Noe a khapie pie n tsüketuou pie dietseidiekhobouu[26] nu batuo.

¹⁷Mu no suna ketho pie ngukemezhie ba[27] puo chütuo; puocha thukenie di puotie mu puozha thu puo di puotie.

¹⁸No suna ketou pie cherub kenie chülie, sidi khapie ngukemezhie bau gei puotsei lutsahatsa chülie.

¹⁹Cherub puo chüpie puotsei puo tsa mu puo pie kekreitsa shü di sünie bu ngukemezhie bau[28] ze kematuo.

²⁰Cherubnie bu unie shü kelhapie ngukemezhie bau whetuo; Cherubnie zie bu kepetsou di ngukemezhie bau[29] mehotuo.

²¹No ngukemezhie bau pie dietseidiekhobouu mhogei shütuo; mu dietseidiekhobouu nu ae se n tsüshüketuo dietseidiekho-u khapie batuo.

²²Sünu nu a n ze kesetuo, süu ngukemezhie bau mhogei; dietseidiekho-u keba dietseidiekhobouu[30] gei ketha Cherubnie donu nu ae Israelmiako la diekhashüketuo pete pie n ki pushütuo.

²³Siro noe akasia pie mizhü puo chülie; puocha thu kenie, puozha thu puo, mu puo rükrie thu puo di puotie.

²⁴No suna ketho pie süu dalie, mu suna pie puo toucha puo chü puo whilie.

²⁵Mu no puokhie keyau dziezhü de zhakecü puo chüpie whikecü ki suna pie puo toucha puo chü pie süu whilie.

²⁶Siro no süu la suna rohou dia chülie, di rohouko pie puo phi diako gei puoke diako nu khelie.

²⁷Rohouko bu puokhie keyau khieki batuo, seizonie pie süko nu shülie di mizhüu pielieketuo la.

²⁸No akasia pie seizonie chülie di suna pie unie da phrelie, sidi hanie pie mizhüu pietuo.

²⁹No süu la puo khouko mu mharekethengu kethe khouko, süu süko mu khubezu rushüketuo tehieko la chülie, süko suna ketho pie chülie.

³⁰Sidi noe mizhüu gei baya zokecü zasi niekhrüdau pie a mhodzünu ba seituo.

³¹Siro no suna ketho pie mituba puo chülie. Süu ketoupie Mitubau phi mu puo cau chülie, puo hieko, puo tsüko, mu puo pouko puo ze kesacü puotuo.

³²Mu süu tsei nunu puoco sorou partuo, mitubou co se bu puotie puo nu pratuo, mu mituba co se bu puotie kekreitsa pratuo;

³³puoco puo gei tehie se chüpie ciehu pou tuoituo, puo thetse gei puotsü mu puopou batuo; mitubou bau geinu puoco sorou prakecü pete gei sükemhie batuo.

³⁴Mu mitubou bau gei zokecü tehie dia chüpie ciehu pou tuoikecü, uko tsü mu puo pou sa di.

³⁵Siro puoco sorouko donu kenie kekhekhekecü khro nu puo tsü puo zokecü puo sa batuo.

³⁶Uko tsüko nu uko coko süu ze puo chütuo, pete suna ketho pie chütuo süu ketou di chütuo.

³⁷Mu no süu la mitubou thenie chütuo; mu mitubouko bu puo mhodzütsa va pezielieketuo le di khapie ba morosuo.

³⁸Mitu kepemhe nyako mu puo khouko suna ketho pie chütuo.

³⁹Süu mu suna khouko suna ketho talent puo se chütuo.

⁴⁰Mu no kijüthou geinu n pekieshükecü rhi kemhiei di süko chülie morosuo.