Read Angami Naga Toukepra 27 Bible Online

Toukepra 27 - Angami Naga bible

Toukepra 27

¹No akasia pie ruosuoba puo chütuo, puocha thu pengou mu puozha thu pengou di puocha puozha ketoutuo, mu puo rükrie thu se tuo.

²Mu no puoke diako puokia chütuo; puo kiako puo ze puo tuo, mu no merenyi pie puo mho datuo.

³No puo migeko khashüketuo la liko chütuo, mu puo nyopfhükhouko, seikhouko, zohucieko mu miyiekhouko chütuo; mhanyako pete mese pie chütuo.

⁴Noe merenyi pie dorü puo rei chütuo; mu dorüu ke diako nu rohou dia chütuo.

⁵Mu no süu pie ruosuoba kiphi kezhie khro nu shütuo, sidi dorüu bu ruosuoba ketou nu balietuo.

⁶Siro no ruosuoba la seizo chütuo, akasia se chütuo, mu merenyi pie sünie mho datuo;

⁷mu seizonie pie rohouko nu pelituo, sidi seizonie bu ruosuobau piekecü ki puokhie lutsahatsa batuo.

⁸No mela pie süu chütuo, sidi chüpie keku zotuo; kijüthou geinu tha n kiekeshü mhiei süu chüpie sümhie zotuo.

⁹No rüsuopfhekiu kitiezha chütuo. Kitiezha pekhrotsa linen puolo mese mu megeikecü thu krie puo chakecü pie tietsa puo lhatuo;

¹⁰uko co mepfütuo mu uko phitou mepfütuo, mese pie hako chütuo, derei coko gei cawiko mu puo kewhiko rakachü pie chütuo.

¹¹Mu sükemhie puocha pesotsa la thu krie puo chakecü pie lhatuo, uko coko mepfü mu uko phitouko mepfü mese pie chütuo, derei coko gei cawiko mu puo kewhiko rakachü pie chütuo.

¹²Siro kitiezha niakratsa puozhau la keyapfhe thu hiepengou batuo, puoco ker mu puo phitouko ker batuo.

¹³Kitiezhau mhodzünu nu vo niathutsa ketso puozhau bu thu hiepengoutuo.

¹⁴Careu khie tietsa pie lhaketuo la keyapfhe bu thu kerepengoutuo, puoco se mu phitou se satuo.

¹⁵Kekreitsa la keyapfhe thu kerepengoutuo, puoco se mu puo phitou se satuo.

¹⁶Kitiezhau careu la puo keya thu mepfü chakecü, puolo keloshü, teimeziekecü mu merieyharakecü, mu linen puolo mese mu megeikecü pie chükecü mu thepre pie puo khu katuo; süu puoco dia mu puo phikhra dia batuo.

¹⁷Kitiezhau houkecü pete rakachü rozo pie zotuo; uko cawiko rakachü mu uko phitouko merenyi pie chütuo.

¹⁸Kitiezhau puocha thu krie puo tuo, puozha thu hiepengou mu puo rükrie thu pengou, linen lo mese mu megeikecü pie lha mu puo phitouko merenyi pie chütuo.

¹⁹Ruosuopfhekiu la li pete, puo kezhie pete mu kitiezhau nu kezhie pete merenyi pie chütuo.

²⁰No Israelmia bu mi petuketuo la Oliv gepie tier chükelie kemesatho se vornu pushülie, mitu puo petupie sei balieketuo la.

²¹Kehou pfhekiu nu, dietseikho-u[34] mhodzünu keyapfheu sie, Aron mu puo nuonuoko bu thevatie nu vo khise ketso Jihova mhodzü süu mehotuo. Hau Israelko la thephou pete nu zetuo morokesuo thezho puo chütuo.