Read Angami Naga Toukepra 28 Bible Online

Toukepra 28 - Angami Naga bible

Toukepra 28

¹Süsie no Israelko donu n dzürieu Aron, mu puo nuonuoko ze n khieki vorlie, uko bu zievo chü di a lie chüketuo la, Aron mu Aron nuonuoko, Nadab mu Abihu, Eleazar mu Ithamar.

²Mu no n dzürieu Aron la kemesa pfhenei chülie, mesü mu ziviketuo la.

³Siro no themia mhachükesimia ae kele kevi pie u tsükeshüko pete rüchüpie uko bu Aron pfheneiko chütuo, puo chü kemesapie a zievo chüketuo la.

⁴Pfhenei hako uko bu chütuo: U merükewhepfü, zievo boulie, boulie kerütshupfü, boulie puokhukethupfü, tsüze mu chiepha; uko bu n dzürieu Aron mu puo nuonuoko bu zievo chü di a lie chüketuo la uko la kemesa pfheneiko chütuo.

⁵Ukoe suna, kelo loshü, teimezie, mu merieyharakecü ngulietuo.

⁶Siro ukoe suna, keloshü, teimezie, merieyhara; linenlo kemese mu megeikecü pie kemenuo rhitho se zievo boulieu chütuo.

⁷Puo mhounie nu u bouka kerha kenie ba di shükesatuo.

⁸Mu puo gei kemenuo tho se chiepha kechüu rei suna mu puolo teimeziekecü krümeleikecü mu merieyharakecü, linenlo mese mu megeikecü pie puo mhatho zho puo chütuo.

⁹Siro no onix tsieko pielie di sügeinu Israel nuonuoko za thutuo.

¹⁰Uko mia sorou za pie ketsie puo gei, mu kekrei sorouko pie ketsie kekreiu gei idi uko kepenuozha medzi di thu kesiesotuo.

¹¹Mhachükesimia zasikechü gei leshükhu thuyakecü tuoi, no ketsienie gei Israel nuo thepfuko za thutuo; suna kechiepie sünie peralietuo.

¹²Mu no ketsienie pie zievo boulieu bouka kerhanie gei shütuo, Israel nuo thepfuko kerükra tsie chüketuo la; la; mu Aron-e Jihova mhodzünu rükraketuo la uko zako pie puo bouka geinu toupfütuo

¹³Mu no suna pie kechiekecü kenie chütuo.

¹⁴mu suna ketho pie kero kepeü tuoicü kenie chütuo; sidi peükelie ronie pie kechiekecünie nu khetuo.

¹⁵Siro no capi la n merü kewhe puo, kemenuo rhitho se chütuo; zievo boulieu kechü mhiei di chütuo, suna mu puolo keloshü, teimezie, mu merieyharakecü, mu linen mese mu megeikecü se chütuo.

¹⁶Süu puocha puozha ketou mu kemhosetuo, puocha pfü puo mu puozha pfü puotuo.

¹⁷Mu noe ketsie cha dia pie süu kutuo, karnelian,[35] krisolite mu emerald cha puo pie puo cha kerieu chütuo,

¹⁸mu cha kenieu Turkuios, safir, mu Moonston pie chütuo;

¹⁹mu cha seu Jacint, Agat, mu Amethist tuo,

²⁰siro cha diau Beril, Onix, mu Jasper pie chütuo, suna kechiekecü pie süko peratuo.

²¹Ketsie kerekenie gei Israel nuonuoko za thupie batuo, ukoe zasi tuoi zotuo, puotse gei puo za thutuo, seyie kerekenieko la.

²²Noe u merü kewheu la suna rübei se kero kepeü tuoikecü chütuo;

²³mu no umerü kewhe la suna rohou kenie chütuo, di rohounie pie umerü kewhe khienie nu shütuo.

²⁴Mu no suna ronie pie umerü kewheu khie rohounie nu pelietuo;

²⁵uronie tie pie kechiekecünie nu khetuo, sidi zievo boulieu bouka kerhanie gei khepie u dzütsa shütuo.

²⁶Mu no suna rohou kenie chütuo sidi sünie pie umerü kewheu khie nu shütuo, puo noutsa, zievo boulieu kekutsa khie nu.

²⁷Siro no suna rohou kenie chütuo, di pie u mhodzütsa zievo boulieu bouka kerhanie pekhrotsa khetuo, boulieu kepha do menuokecüu mho kemethoukecü ki.

²⁸Mu uko mha kepha keloshükecü puo pie umerü kewheu rohouko mu zievo boulieu khe kesatuo; sidi umerü kewheu bu kemenuo rheitho sekechü zievo boulie kephau gei zhülie, zievo boulieu bu rülhe parta molieketuo la.

²⁹Sidi Aron-e kemesa thechüu nu kele ki, Israel nuonuoko za pie capi la umerü kewheu nu shü di puo melou mho gei pfütuo, Jihova mhodzünu uko rükra la seilieketuo la.

³⁰Mu capi la umerü kewheu nu Urim-u mu Thumim-u khashütuo, di Aron-e Jihova mhodzünu kele ki sünie bu Aron melou gei zhatuo; sidi Aron-e Jihova mhodzünu Israelko capiu pie puo melou gei zha seituo.

³¹Mu no zievo boulie kerütshuu pfhe keloshükecü pie chü phretuo.

³²Süu gei u tsü la kecie puo batuo, pfhenei kekreiko mhie di, boulieu kechie nu puo bu rürhata moketuo la puokhie kemvütuo.

³³Süu mei gei keloshü, teimezie, mu merieyharakecü pie turaüsi kemhie chüpie pfeneiko khie whituo, puo doko nu suna thetsei khashütuo,

³⁴suna thetsei nu turaüsiu, se di pfheneiko khie whituo.

³⁵Süu pie Aron gei shütuo, puo lietho chükecü ki, sidi puoe Jihova mhodzünu kele ki mu kepar ki süu pfhe seituo, puo bu siata kelho la.

³⁶Siro suna ketho pie mekhou puo chütuo, zasi kethu mhiei, süu gei leshükhu “Jihova ki Mesakeshü” idi thutuo.

³⁷Mu no tsüzeu gei pfhenhie keloshücü puo kheshütuo; süu bu tsüzeu mhodzütsa batuo.

³⁸Süu pie Aron teikhie gei shütuo, mu Israelmiakoe kemesa ruosuo khakeshü ki kekrükecü huo chüwa zorei kejo pete Aron-e puo thuo pfütuo, süu puoe puo teikhie gei ba seituo, ruosuo khakeshü pete Jihova mhodzünu lielieketuo la.

³⁹Siro no boulieu linen kemese pie puorhie chü di dotuo, mu no linen kemese pie tsüze puo chütuo, mu no thepre pie puo khu ka di chiepha puo chütuo.

⁴⁰Siro Aron nuonuoko la no boulie, chiepha mu tsüre chütuo, uko bu mesü mu ziviketuo la.

⁴¹Sidi no süko pie n dzürieu Aron mu puo nuonuoko gei shütuo, mu tier pie uko kenhelie sidi uko chü kemesatuo, uko bu a lie chüketuo la.

⁴²Mu no uko mo kemethuo wheketuo la linen pie philie chütuo; uchieca nunu tsu udo tsotuo.

⁴³Mu süko pie Aron gei mu puo nuonuoko gei shütuo, ukoe kehou pfhekiu nu lekecü ki morei kemesa thechü nu lietho chütuoü di ruosuobau penuo kevo ki; si moro kejo pie uko thuo uko gei shülie di siata rei silho mu. Hau puo la mu puo sie puo nuosenuoyieko la kechachie thezho puo chütuo.