Read Angami Naga Toukepra 29 Bible Online

Toukepra 29 - Angami Naga bible

Toukepra 29

¹No tsie hakemhie di uko chü kemesatuo, uko bu a zievo chüketuo la, thudonuo puo mu mvüdo rhu mo zokecü kenie selie,

²mu khreiü shükemo niekhrüda tier pie nekecü, mu khreiü shükemo niekhrüda rüpfükecü tier salie. Thou memhiekecü pie hako chülie.

³Siro no süko pie merha puo nu shülie di merha nunu süko pie vorlie.

⁴No Aron mu puo nuonuoko ze kehou pfheki kikha nu vorlie, sidi dzü pie uko khrüwalie.

⁵No pfheneiko selie di boulieu mu zievo boulie kerütshuu mu zievo boulieu, tsiu puo merükeyau pie Aron gei shülie, di zievo boulieu chiepha do menuokecüu pie puo chiephashülie;

⁶mu no tsüzeu pie puo tsü gei shülie, sidi kemesa keditsüreu pie tsüzeu gei shülie.

⁷No kenhekecü tier-u selie, di rupie puo tsügei shü di puo kenhelie.

⁸Süsie no puo nuonuoko ze vorlie, di boulie pie uko gei shülie,

⁹siro terha[36] pie uko chie phashülie, di tsüze pie uko rhashülie, mu uko bu zievo kechü hau pie kechachie zho puo chütatuo. Hakemhie di no Aron mu puo nuonuoko rühe khashü uko tsütuo.

¹⁰Süsie no thudo-u ze kehou pfhekiu mhodzünu vortuo. Aron mu puo nuonuokoe u dzie pie thudo-u tsü gei shütuo,

¹¹mu no Jihova mhodzünu thudo-u dukhrituo, kehou pfhekiu kikha ki nu,

¹²sidi n dziekinuo se thudo-u zie huo pie ruosuoba kiako gei vashütuo, mu thezie keshako lapie ruosuobau phi nu shüwatuo.

¹³Siro no puorieko gei ketuo puoshuo pete, puo se gei rhüpfüketuou, mu puo mecünie shuo sa selietuo, sidi ruosuobau geinu süko thewatuo.

¹⁴Derei thudo-u chü, süu zhü, mu süu buo, noe razhüchü khieümhou nu mi pie thewatuo; hau we kephouma ruosuo zokecü la.

¹⁵Süsie no tekuochünie puo selietuo, mu Aron mu puo nuonuokoe u dzie pie mvüdo-u tsü gei shütuo.

¹⁶Sidi no mvüdo-u dukhrilietuo, di puo zie kelhoupie ruosuobau khieümhou vatuo.

¹⁷Süsie no tekuochüu khrie petselietuo, di puo rieko mu puo phiko khrüwatuo di süko pie puo khrieko mu puo tsü ze kesawatuo.

¹⁸Sidi tekuochüu pete ruosuobau geinu thetuo, hau Jihova ki keshü kethe ruosuo puo; hau puore kevi puo, mu mi pie Jihova ki keshü ruosuo khakeshü puo zo.

¹⁹No tekuochü kekreiu selietuo; tsiu Aron mu puo nuonuoko u dzie pie tekuochüu gei shütuo.

²⁰Mu no tekuochüu dukhrilietuo, mu puo zie huo se Aron puo nuonuoko nyietshe thezatsa vashütuo di uko dzie thezatsa u dzie krüko vashütuo, mu uko phi uko zatsa phikrüko vatuo; sidi thezie keshako kegepie ruosuobau gei lutsahatsa vatuo.

²¹Süsie no ruosuobau gei keba thezie huo mu kenhekecü tier-u selie di kegepie Aron mu puo pfheneiko gei, puo nuonuoko pfheneiko gei shütuo, sidi puo mu puo pfheneiko, puo nuonuoko mu puo nuonuoko pfheneiko puo ze di mesatatuo.

²²No mvüdo-u shuo, mu puo meiu shuo, puo rierhuoko, puo se gei rhüpfüketuou mu puo mecünie shuo sa, mu puodo puo zatsa (süue mvüdo kedalieketa puocü la.)

²³Mu Jihova mhodzünu khreiü shükemo niekhrüda pie merha nu keba nunu niekhrüda puo, tier sakecü niekhrüda puo, mu niekhrüda kerüpfü puo selietuo;

²⁴sidi no hako pete pie Aron mu puo nuonuoko dzie nu shütuo, sidi Jihova mhodzünu kegekecü ruosuo puo la süko kegeshütuo.

²⁵Süsie no süko uko dzie nunu pielietuo, mu no kethe ruosuou sa di süko ruosuoba geinu süko thewatuo, Jihova mhodzünu puore kevi puo chülietuo, Jihova ki keshü kethe ruosuo puo zocü la.

²⁶Siro no Aron keda pekreikeshü mvüdo-u puo khouzü chüpielie di Jihova mhodzünu kegekecü ruosuo chü di kegeshütuo; mu süu n ya chütuo.

²⁷Mu no kegekecü ruosuo nu kese puo khouzüu, zievoko yachükeshü puodo, Aron mu puo nuonuoko zokecü chü kemesalietuo.

²⁸Hau Israelko bu pie Aron mu puo nuonuoko yachü seitatuo, kekreilamonyü hau we Israelko vitho ruosuo nunu khashüketuo zievoko yau zo; haue Jihova ki khakeshü uko ruosuo zo.

²⁹Aron pfhenei kemesako, puo sie puo nuonuoko la zotuo, süko nunu tier pie uko kenhe mu uko keda pekreituo.

³⁰Puo nuo puo sou nu zievo chüketuou bu zha thenie süko setuo, puo kemesa thechüu nu lietho chütuoü di kehou pfhekiu nu kevor ki.

³¹Noe keda pekreikeshü nu mvüdo-u selie, di puo chü se vo kemesa thechüko nunu chalietuo;

³²siro Aron mu puo nuonuoko kehou pfhekiu kikha kinu mvüdo-u chü mu merha nu keba niekhrüdau cütuo.

³³Ukoe keda pekrei mu chü kemesapie rhakelie ruosuo nu sekecüko cütuo, derei kekreimia bu we süko cülie lho, sükoe mesakecü la.

³⁴Mu mhachü kemesakecü la sekecü themuo morei niekhrüda huo peshapie ba khise tso ro, no mi pie pesha kebako thewatuo; süu cü lalie lho, süu mesakecü la.

³⁵A n ki diekhakeshü mhiei di noe Aron mu puo nuonuoko gei chüshütuo; zha thenie no uko chü kemesatuo,

³⁶siro teisonhie no thudo puo pie rhalieketuo la kephouma ruosuo khashütuo. Süsie rei no ruosuobau chü kemesakecü ki, süu la kephouma ruosuo puo chütuo, di süu chü kemesaketuo la tier pie süu kenhetuo.

³⁷Ruosuobau la noe zha thenie chü kemesaketuo tho chütuo, di süu chü kemesawatuo, sitse ruosuobau bu kemesatho chütatuo; mha kehoupuorei ruosuobau nyükecüu mesatatuo.

³⁸Siro noe ruosuoba gei hakemhie di khashütuo, teicie puo keta tekuonuo kenie khashü seituo.

³⁹Tekuonuo puo noe khise khashütuo, mu tekuonuo kekreiu thevatie tuo.

⁴⁰No mu tekuonuo kerieu nu thou kevithopfü mhakemejü ker chü di za puo mu tier thekelie hin puo za dia chü di za puo sa di khashütuo, mu khubezu hin puo za dia chü za puo pie nanyü chü di rushütuo.

⁴¹Mu no tekuonuo kekreiu mu khubezu rei sa khakeshü khise gei thou rei mu khubezu rei sa khakeshü mhiei di khashütuo, mi nunu mha pie Jihova ketsü puore kevi puo chülieketuo la.

⁴²Hau n nuosenuoyie pete bu kehou pfhekiu kicie ki nu Jihova mhodzü ruosuo chü seiketuo puo chütuo, a sünu n ki die puketuo la n ze kese setuo.

⁴³Sünu nu Israelmiako ze kesetuo, mu a zapuzayieu thuo thechü süu bie kemesawatuo.

⁴⁴Ae kehou pfhekiu mu ruosuobau chü kemesashütuo; Aron mu puo nuonuoko rei a chü kemesashütuo, uko bu a zievo chü di a lie chüketuo la.

⁴⁵Mu a Israelko donu lhoutuo, mu ae uko Kepenuopfü chütuo,

⁴⁶mu ukoe a Jihova uko Kepenuopfü, uko donu lhouketuo la a thuo Ijipt kijü nunu uko ze parkeshü silietuo; a sü Jihova uko Kepenuopfü zo.