Read Angami Naga Toukepra 3 Bible Online

Toukepra 3 - Angami Naga bible

Toukepra 3

¹Siro Mosae puo meiu Jethro, Midianmiako Zievo-u kuo pfhetuo, sidi puo puo kuoko ze rayha kisietsa vo di, Ukepenuopfü kijüthouu, Horeb gei volie.

²Sitse Kepenuopfü dielieu seinyho geinu kepar miü puo nunu puo pengushü, mu puoe meho tharu, harie, seinyho-u tu ba, derei the pejüwa mo.

³Sitse Mosae sie, “A tuo rürei phi di mha kezha kengu hau mehoshütuo, kiüdi seinyho-u thewa mo shi” ita.

⁴Siro Jihovae puo mha hau mehotuoü rüreikeshü ngu tse, Ukepenuopfüe seinyho-u nunu puo kie di sie, “Mosa, Mosa!” si. Sitse puoe sie, “A haki bawe” sishü.

⁵Süsie puo sie, “Penuo phir hie, n phi geinu n phikou rhuowalie, no thakecü chüu mesakecü la” sita.

⁶Sidi puoe sie, “A n puou Kepenuopfü, Abraham Kepenuopfü, Isak Kepenuopfü mu Jakob Kepenuopfü zo” si. Sitse Mosae puo zie kevielie, puoe Kepenuopfü meho michieketa la.

⁷Sitse Jihovae sie, “Ae a themia Ijipt nu kebako kemezhiekecüko ngushüte, mu ukoe uko mhatho kepfheko la kemezhie di meheimelo keba sishüte;

⁸mu a Ijiptmia dzie nunu uko shüphralietuoü di kerwe, mu kijü süu nunu uko ze kijü kevi mu kemeya puo mithunudzü mu mepfhidzü krukezhü kijü puo nu pralieketuo la, kijü süu Kananko, Hitko, Amorko, Perizko, Hivko mu Jebusko kebachü.

⁹Mu tsiewe, harie, themiako mezhie si vor a tso bate, mu ae Ijiptmiako uko pesekecü ngushüte.

¹⁰Vorlie, a n ketsepie Faro ki shütuo, n bu a themia Israel nuonuoko Ijipt nunu ze parlieketuo la” sishü.

¹¹Derei Mosa sie Ukepenuopfü ki, “Faro ki vo di Ijipt nunu Israel nuonuoko ze parlieketuo, a sü supuo mu?” sita.

¹²Puoe sie, “Derei a n zetuotuo; mu a n ketseshüücü hau bu n la zasi chütuo; noe Ijipt nunu themiako ze parlie ro, niekoe kijüthou hau geinu Ukepenuopfü rüsuotuo” sishü.

¹³Sitse Mosae Ukepenuopfü ki, “Mhanuü a Israelmiako ki vo di uko ki, ‘Nieko puonuoko Kepenuopfü a ketsepie nieko ki shü’ mu uko a ketso di, ‘Puo za supuo ga?’ iro, a bu uko ki kedipuo pu ta?” sita.

¹⁴Ukepenuopfüe Mosa ki, “A SÜ A ZOKECÜU”[1] sishü, siro puoe sie, “Hau pie Israelmiako ki pushülie, ‘A ZO cüu thuo a ketsepie nieko ki shü ho!’ ” sishü.

¹⁵Ukepenuopfüe Mosa ki pu sa di sie, “Hau pie Israelmiako ki pushülie, ‘Jihova[2] nieko puonuoko Kepenuopfü, Abraham Kepenuopfü, Isak Kepenuopfü, mu Jakob Kepenuopfü, a ketsepie nieko ki shü ho’: Hau kechachie a za, mu hai di thephou pete nu a rükra tuotuo.

¹⁶Vo di Israel phichüko pfhü kengulie, di uko ki pushülie, ‘Jihova, nie puonuoko Kepenuopfü, Abraham, Isak mu Jakob Kepenuopfü, a pengushü di a ki: A nieko mehoshü mu Ijipt nu nieko gei kedipuo chüshü shi ngushüte.

¹⁷Mu ae kemezhiekecü Ijipt nunu nieko ze parshütuoü a die phrashü, sidi nieko ze Kanan kijü nu, Hitko, Amorko, Perizko, Hivko mu Jebusko kijü mithunudzü mu mepfhidzü krukezhü nu nieko ze voshütuoü shü,’ si.

¹⁸Mu ukoe n pfhe rünyütuo, siro no mu Israel phichüko vo di Ijipt nu kediu ki hakemhie putuo, ‘Jihova, Ibriko Kepenuopfü, hieko ze kesewate; mu tsie, hie n ki chaya, hieko bu rayha nu zha se tuo nu vocie, hie bu ruosuo chüpie Jihova hie Kepenuopfü tsülieketuo la.’

¹⁹Ijipt nu kediue thedzie kuo sekecü[3] puo bu puo kemvü chü zoshü kemosie nieko bu tuolie lhoükecü a si zo.

²⁰Süla a a dzie yhashütuo, sidi a sünu u ngokecüko chüshüketuoko pie Ijipt vüshütuo; süsienu puo nieko bu tuolietuo.

²¹Mu a themiako bu Ijiptmia mhingu nu thekhrie pfütuo; mu nieko tuokeshü ki, nieko bu methuo di tuolie lho,

²²derei thenumia kehoupuorei puo zanuopfü ki, mu puo sopfü ki rakachü, suna rütsonyieko mu pfhemenei chalietuo, di pie nie nuonuo thepfumia mu thenuko gei shülietuo; sidi nieko Ijiptpfümiako pekawatuo” sishü.