Read Angami Naga Toukepra 30 Bible Online

Toukepra 30 - Angami Naga bible

Toukepra 30

¹Noe mharekethengu theketuo la ruosuoba puo chütuo; akasia pie no süu chütuo.

²Puocha thu puo, puozha thu puo tuo, süu tsei dia batuo, mu puo rükrie thu kenietuo; puo kiako puo sa puo chütuo,

³mu no suna ketho pie süu mho kenhetuo, puo mho mu puo tsei lutsahatsa rei mu puo kiako rei; mu no süu la suna pie puo toucha chü puo whituo.

⁴Siro no süu la suna pie puo rohou kenie chütuo, süko chüpie puo toucha khro lutsahatsa shütuo, mu süko bu ruosuobau pieketuo la puo khei chütuo.

⁵No akasia pie seizo chütuo, di suna pie sünu kenhelietuo.

⁶Mu no süu pie dietseidiekho-u mhogei keba ngukemezhie bau[37] mhodzünu dietseidiekhobouu[38] mhodzü keyapfheu khieki khapie batuo; a sünu n ze kesetuo.

⁷Aron-e sü geinu mharekethengu puore kevi thetuo; puo teisoduü mibouko ketsocü ki süu thetuo,

⁸Aron-e thevatie mibouko pie puo bako nu shü kevo ki, süu thetuo, nieko phou pete la Jihova mhodzünu süu chü seituo.

⁹Noe süu gei mha mesakemo puorei the suo, morei kethe ruosuo, morei lhacülhale ruosuo puorei khashü suo; no khubezu puorei la pie sügei shü suo.

¹⁰Aron-e cie puo nu va puo süu kiako geinu rhakelie ruosuo chütuo, puoe cie puo nu kephouma ruosuou zie se rhakelie ruosuo chütuo, mu nieko phou pete nu süu chütuo; hau Jihova la kemesatho-u zo.

¹¹Jihova Mosa ki:

¹²No Israelko phrükecü ki, kehoupuorei no u phrülieta ro puo thuo puo la puo rhakelie ma pie Jihova tsütuo, no uko kephrü ki uko donu thepetheruo ba molieketuo la.

¹³Nuolhoutsüphrüu phrülieketamia kehoupuorei hau chü morosuo: Kemesachü nu seyakecü shekel-u, (shekel puoe gera mepfü ba) shekel süu tiepuo pie Jihova ki khashü morosuo.

¹⁴Kehoupuorei themia kephrü nu phrülieketamia, u kelhouzha cie mepfü mu sümhoko, Jihova rüsuo morosuo.

¹⁵Nie thuo nie la rhakelie ruosuo pie Jihova tsükeshü ki, shekel tiepuou sie, kenyiu rei kha krashülie lho, mu kejüu rei kha tsashülie lho.

¹⁶Mu no Israelmiako kinu rhaketuo ruosuo la khakeshü rakako pielietuo, sidi süko pie kehou pfhekiu meza la khapie batuo; Jihova mhodzünu Israelmiako kerükrau vorlie di nie thuo nie rhalieketuo la.

¹⁷Jihovae Mosa ki:

¹⁸No mha kekhrü la merenyikhou puo chülie, puo kedouba rei merenyi pie chülie, mha khrüketuo la mu no süu pie kehou pfhekiu mu ruosuobau unie donu batuo, sidi dzü pie sünu shülietuo,

¹⁹sidi Aron mu puo nuonuoko bu uko phi u dzie khrütuo.

²⁰Ukoe kehou pfhekiu nu kevo ki, morei lietho chütuoü di kevor ki, mi pie mha the di ruosuo chüpie Jihova ki shütuoü di ruosuobau penuo kevor ki dzü pie uko khrütuo, uko siata rei si mokecü la.

²¹Ukoe uko phi mu uko dzie khrütuo, siata rei silie lho: mu hau uko la thezho puo chü seitatuo, puo la rei mu puo nuosenuoyie la rei thephou pete la.

²²Sizomonyü Jihovae Mosa ki:

²³Mha kethenguthoko sielie; puore kethengu puo dzü kechü shekel krie pengou, mu seichü puore kethengu süde tiepuo, süusü, shekel krie kenie di hiepengou, mu puore kethengu shekel krie kenie di hiepengou,

²⁴mu kasia shekel krie pengou, kemesachüu nu seyakecü shekel-u se di, mu oliv tier hin puo salie;

²⁵mu no hako pie mhare kethengu chüyakecümia mhatho tuoi, kenhekecü kemesa tier puo chülietuo; süu bu kenhekecü kemesa tier puo chütuo.

²⁶Mu no süu pie kehou pfhekiu mu dietseidiekhobouu kenhetuo,

²⁷siro mizhüu mu puo liko pete, mitubou bau mu puo liko, mharekethengu kethe ruosuobau,

²⁸mu kethe ruosuo kechü ruosuobau mu seikhou-u tsiu kedoubau kenhetuo;

²⁹no süko chü kemesatuo, uko bu kemesatho chülieketuo la; mha vo uko kenyü khe mesatatuo.

³⁰Siro no Aron mu puo nuonuoko kenhelietuo, di uko chü kemesatuo, uko bu zievo chü di a lie chüketuo la.

³¹No Israelko ki, “Nieko phou pete nu hau pie mha kenhekecü a tier kemesau chütuo.

³²Hau pie miahoumiaruomia gei rushülie lho, mu no hau kemhie di chükecü kekrei rei chülie lho; süu mesa, mu n la mha kemesa puotuo.

³³Kehoupuorei sütuoikecü morei süu pie kekreimia gei keshümia puo themiako ki nu puo dathewatuo” sishü.

³⁴Mu Jihovae Mosa ki: Mha kethenguko, stacte, onika mu galbanum, puore kethengu vieko mu cietha dzü kemesa sa (mhaca puotse kethede di selie),

³⁵sidi mharekethengu chüyakecümia mhatho tuoi mhakethengu chülie, di metsie huoyo pie valie, mu süu bu mesa tseilie,

³⁶mu no süu huoyo kepfhüshülie mu huoyo pie kehou pfhekiu nu dietseidiekho-u[39] mhodzünu, a n ze keseketuou nu shülie, süu n la kemesatho chütuo.

³⁷Siro no mharekethengu kereipie chükecüu kemhie di, n thuo n la chülie lho; süu n la Jihova mhodzünu mesatuo.

³⁸Kehoupuorei mharekethengu setuoü di sümhie chükecümia puo themiako kinu dathewatuo.