Read Angami Naga Toukepra 31 Bible Online

Toukepra 31 - Angami Naga bible

Toukepra 31

¹Jihovae Mosa ki:

²Mehoshü, ae Juda yiemia Hur nuou Uri, süu nuou Bazalel kedaliete;

³mu a Ukepenuopfü ruopfüu pie puo tsüwate, mha chülie kevi mu kemecie, mhasi mu mha kechü do pete,

⁴mhachü kezivi sikecü, suna, rakachü mu merenyi se mhachükecü nu rei,

⁵ketsie phro mu sei kepie mhakechü nu rei, mhathomhachü pete.

⁶Mu harie, ae Dan yieu, Ahisamak nuou Oholiab rei puo sa kedaliete; mu mhachülie kevi pie mhachükesiko pete puo tsüwate, uko bu a n ki diekhakeshü pete chülieketuo la:

⁷Kehou pfhekiu, dietseidiekhobouu mu süu gei keba ngukemezhie bau,[40] mu pfhekiu nu mhanya pete,

⁸mizhüu mu puo liko, mu mituba kemesau mu puo li pete, mharekethengu kethe ruosuobau,

⁹mu kethe ruosuobau mu puo li peteko, mu seikhou mu puo kedoubau,

¹⁰tsiu pfhemenei chü kemenuokecüko, Aron zievo-u la kemesa pfheneiko mu puo nuo thepfuko zievo kechü la uko pfheneiko,

¹¹mu kenhekecü tier mu kemesa thechüu la mhare kethenguko. Ae n ki diekhakeshü pete tuoi noe chülie morosuo.

¹²Mu Jihova Mosa ki:

¹³Israelko ki pushülie, “Niekoe sabatko pie ba morosuo, hau a mu nieko phou pete donu zasi puo zo, nie bu a Jihova nie chü kemesakeshü silieketuo la.

¹⁴Nieko sabat pie batuo, kekreilamonyü süue nie la mesakecü la; kehoupuorei süu perhukecüu pesiawatuo, kehoupuorei sünhie mhachükecüu, puo themiako donu nu puo dathewatuo.

¹⁵Zha sorou mhachütuo, derei zha thenie nhie we rülei pecükecü zha, Jihova kitsa mesakecü zha; kehoupuorei kerüleizha nhie mhachükecüu pesiawatuo.

¹⁶Süla Israelko sabat pie ba morosuo, kechachie dietseidiekho puo la thephou pete nu sabat zetuo.

¹⁷Süue Jihova zha sorou donu tei mu kijü chülie di zha thenie nhie puo rüleilie di puo keleilieücü zasi puo, a mu Israelko donu kechachie tuoketuo zasi puo zo” sishü.

¹⁸Siro puoe Sinai kijüthou geinu puo ze kerüchü tseiwa tse dietseidiekho[41] tsiekranie pie Mosa tsüshü, Ukepenuopfü dziekinuo se thukecü tsiekranie.