Read Angami Naga Toukepra 32 Bible Online

Toukepra 32 - Angami Naga bible

Toukepra 32

¹Themiakoe Mosa kijüthou geinu ker menyhoketa ngushü tse, themiakoe vor Aron houpfülie, di puo ki, “Sier di terhuomia chüshü hieko tsüshülie, süko bu hieko mhodzü rieshüketuo la; Ijipt kijü nunu hieko zekepar themiau, Mosa ükecüu we, puo gei kikitie shi, hieko si mote” sita.

²Sitse Aron uko üse, “Nie nupfünuo, nie nuo thenu mu thepfuko nyieko geinu suna menyieko bielie di se a ki vorlie” sishü.

³Süla themia peteko u nyie gei keba sunako bielie, di se Aron ki vorshü.

⁴Sidi puoe uko dzie nunu sunako lielie, di sunako lho pekrupie thudonuo puo rhishü; sitse ukoe sie, “Harie Israel, hako Ijipt kijü nunu nieko ze parkeshü rhuoko we!” sita.

⁵Aron-e süu ngushü tse, puoe süu mhodzünu ruosuoba puo chülie; sidi Aron sie, “Sodu Jihova la thenyi puo batuo” idi pesishü.

⁶Mu uko süsieduü khiserüna sielie, di kethe ruosuo khashü, mu vitho ruosuo se vor; mu themiako keba mhacümhakrielie, di rüzhütuoü sielie.

⁷Sitse Jihova Mosa ki, “Kelie, no Ijipt kijü nunu ze kepar n themiako, uko thuo uko perhupfü baketa la;

⁸ukoe a uko bu zenu di diekhakeshü chau nunu tuo rürei mhai prate, ukoe uko thuo uko la thudonuo puo rhiliete, sidi süu rüsuo mu süu ki ruosuo chü ibate, sidi sie, ‘Harie Israel hakoha Ijipt kijü nunu nieko ze parkeshü rhuoko we’ ibate.”

⁹Siro Jihovae Mosa ki, “A themia hako ngushüte, mu harie, uko sü pietsümvükecü themia kro puo zo;

¹⁰süla tsie a keyhu sa hiecie, a noupfhü bu uko gei le sier di, uko the pejüwaketuo la; derei n la we a n chüpie seyie kezha puo chüshü zotuo” si.

¹¹Derei Mosae Jihova puo Kepenuopfü ki cha di sie, “He-i Jihova, kiüdi n noupfhü bu rüda sier di n themiako petsou bata ga? No n thuo kekuo kezha mu n dzie kekuo üse Ijipt kijü nunu uko ze parshü ze.

¹²Kidi Ijiptmiako bu, ‘Mha kesuo noule se di uko ze kepar zo, kijüthou geinu uko dukhriwatuoü, mu kijüu zie geinu uko the pejüwatuoü di’ ikecü putuo ga? N noupfhü kereu nunu rürei lalie, di n themiako gei mha kesuo kele hau nunu n nou rüditacie.

¹³N kituoko, Abraham, Isak mu Israel uko rükrashücie, no n thuo uko ki rüse zo di pukeshü, ‘A nieko nuosenuoyie chü pekrapie teigei themvüko tuoishütuo. Mu ae nieko ki phrakeshü kijü hau pete pie n nuosenuoyieko tsütuo, mu ukoe kechachie süu wetuo’ isishü” si.

¹⁴Sitse Jihovae puo themiako gei kepeka se vor shütuoü keba keleu nunu puo nou rüdita.

¹⁵Sitse Mosa rüreilie, mu dietseidiekho[42] tsiekranie pie puo dzie nu shülie di kijüthouu geinu kerta, mu tsiekranie puo zie lutsahatsa thu; tietsa puo mu kekreitsa rei thu.

¹⁶Mu tsiekra nie Ukepenuopfü mhatho, mu Ukepenuopfü thuo tsiekranie kepie thushü.

¹⁷Siro Joshuae themiako melie keba sishü tse, puoe Mosa ki, “Razhau nu terhü pfhe puo si bate” si.

¹⁸Derei puoe sie, “Süu kuokeliemia pfhe mo, morei kaketamia pfhe rei mo, derei a kehuükecü pfhe si bate” si.

¹⁹Siro puo razhüchüu penuo vor thudonuo-u mu nashükecü ngushü mumetha Mosa nouyieu lepie rüdata, sidi puoe puo dzie nunu tsiekranie kelhoushü di kijüthou phi nunu sünie vaphrowa.

²⁰Mu puoe uko thudonuo chüse kebau se vo di mi pie thewa, mu getshiebawa, di kelhoupie dzü mho kezawa, mu Israelko bu süu krielie.

²¹Siro Mosae Aron ki, “Themia hako kedipuo chüshü di no kephouma kezha haikecü se vor uko gei shüshü ga?” sita.

²²Sitse Aron sie, “A niepuu nouyieu bu rüda sieta hiecie, no themiako si ba zeru, ukoe kesuotsa va beikecü no si ba.

²³Ukoe a ki, ‘Hie mhodzü tuoketuo la terhuomia chüshü hieko tsücie, Ijipt nunu hieko ze parkeshü themiau Mosa we kite shi, hieko si mote’ ite.

²⁴Süla a uko ki, ‘Kehoupuorei suna kenyimia phreshülie’ sishü, mu uko rei süko pie a tsüshü, mu a süu pie mi nu shüshü ru thudonuo hayo parlie” sishü.

²⁵Mu Mosae themiako ta nyanyaketuo ngushü, (Aron-e uko bu u ngumvümia krenyü chütuoü uko bu ta nyanyaketuo chüshüwaketa la.)

²⁶Süsie Mosae razhüchü kharu nu thalie, di sie, “Suomia Jihova kitsatuo ga? A ki vorlie” isishü, siru Levi nuonuo thepfuko pete puo ki vor kengulie.

²⁷Ru puoe uko ki, “Israel Kepenuopfü Jihova hakemhie puya, ‘Themia kehoupuorei puo zhiecha pie puo tsei ki shülie di razhüchüu nunu tuo kharu puo nu kharu kekreiu nu vo di, puo siezeu, puo zeu, mu puo zanuou shierei pete dukhriwalie’ ” ishü.

²⁸Mu Levi nuonuoko Mosa kepu kemhie chüshü, mu sünhiesü themiako donu mia nyie se mese dukhriwa.

²⁹Mu Mosae sie, “Thie niekoe Jihova lietho chüketuo la nie thuo nie chü kemesaliete, puo bu thie japie nie tsüketuo la kehoupuorei puo thuo puo nuo mu puo siezedzürie khashü di” sishü.

³⁰Sünhie Mosae themiako ki, “Nieko phouma madi phoumawate, derei tsie a Jihova ki khotuo, ae nieko kephouma vakelie chülie rei si mo” si.

³¹Süla Mosae Jihova ki la vo di hakemhie pushü, “Chülie ho! Themia hako phouma madi phoumawate, ukoe uko thuo u la suna pie terhuomia chülie.

³²Derei tsie no n medotuo üro uko kephouma vawacie, mu moro, no n leshüda thulieketau nunu a za vawalie” sita.

³³Derei Jihovae Mosa ki, “Kehoupuorei a gei phoumawaketau ae leshüdau nunu puo za vawatuo.

³⁴Derei tsie vo di themiako chatha ze a n ki pukeshü thechüu nu volie; harie, a dielieu n mhodzünu tuotuo, sirei siazha teisozha kevor nhie uko kephouma la siazha chüpie uko gei shü zotuo” si.

³⁵Mu Jihova thepe kere puo ketsepie themiako gei shü, ukoe thudonuo puo rhikecü la, Aron thuo chükeshüu.