Read Angami Naga Toukepra 33 Bible Online

Toukepra 33 - Angami Naga bible

Toukepra 33

¹Jihovae Mosa ki, “Tuoshülie, thechü hanu nu tuoshülie, no mu Ijipt kijü nunu ze parkelie themiako pete, sidi ae Abraham, Isak mu Jakob ki rüse di, ‘Ae süu pie n nuosenuoyieko tsütuo’ isi piekezhü kijüu nu volie.

²Mu a teigeidieliemia puo bu n mhodzü tuo votuo, mu a Kananko, Amorko, Hitko, Perizko, Hivko mu Jebusko whuowatuo.

³Mithunudzü mu mepfhidzü krukezhü kijü nu volie; derei a we nieko ze volie lho; niekoe pietsümvükecü themia kro puo, a cha lanu nieko bie pejüwa rei si mo mu” sishü.

⁴Themiakoe dielie kere hako sishü tse, ukoe krata, mu miapuorei puo rütsonyie se mota.

⁵Jihovae Mosa ki, “Israelko ki pushücie, ‘Niekoe pietsümvükecü themia kro puo zo; mhanuü a doyopuo zorei nieko zetuo ro, a nieko bie pejüwatuo, süla tsie nie geinu nie rütsonyieko rhuowalie, sidi a bu nieko gei kedipuo chüshütuo shi pepilieketuo la’ ” sita.

⁶Süla Israelkoe Horeb kijüthou yawinu nu uko rütso nyieko se sa mota.

⁷Siro Mosae dzüpfhekiu pielie di se pra razhüchüu khie nu pethoushüshüya, razhüchü ze kepeciekecü nu; sidi puoe süu üse kehou pfhekiu üdi kie. Mu kehoupuorei Jihova kepfhümia kehou pfhekiu, razhüchüu khie kebau nu voya.

⁸Mosae kehoukipuorei pfhekiu nu vo vo, themia peteko siethalie, di u thuo u kicie ki nu Mosa pfhekiu nu leta kemochie puo meho thaya.

⁹Mosa pfhekiu nu lelie ro, kimhou co-u thuo ker pfhekiu kicie nu thalieya, sidi Jihovae Mosa ze kerüchüya.

¹⁰Mu kehoupuorei kimhou co-u pfhekiu kicie ki tha di ngu ro themia pete u thuo u kicie ki tha di nuketsuya.

¹¹Hamhie di Jihovae mhotsou di Mosa ze kerüchüya, themia puo puo zemia rüchükecü tuoi. Mosae tuo razhüchüu nu la vo zorei, puo kekhruohiu Joshua Nun nuou, khriesau zo we pfhekiu tsetaya mo.

¹²Mosae Jihova ki, “Harie noe a ki, ‘Themia hako ze parliecie’ ishü. Derei no supuo pie a sa ketseshütuo shi se a pesishü mo ze. Sirei no sie, ‘A n za rei si ba, mu no a mhingu ki a khriepfüliete’ si.

¹³Süla tsie, a n ki chaya, a n mhiki n khriepfülieta üro, tsie n chako pie a pekieshücie, a bu silie mu n khriepfülieketuo la. Siro seyie haue n themia kro puo zocü rei le sashücie” sishü.

¹⁴Mu puo sie, “A n ze seituo zotuo, mu a kerülei pie n tsütuo” sishü.

¹⁵Sitse puoe puo ki, “No hieko ze seituolie lho üro, hanu nu hieko bu tuo sa kho hiecie,

¹⁶kekreilamonyü no hieko zetuo kemosie kimhie di a mu n themiako, n mhingu ki n khriepfülietaücü silietuo ga? A mu n themiako ha kijü zie gei themia peteko ki kreikhroükecü silie kevi, noe hie zetuokecüu nunu mo me?” sishü.

¹⁷Sitse Jihovae Mosa ki, “No pukeshü hau a chüshü zotuo; noe a mhinguki a khriepfülietakecü la, mu a n za rei sicü la” si.

¹⁸Mosa sie, “A n ki chaya, n zapuzayieu pie a pekieshücie” si.

¹⁹Sitse puo sie, “A a kevi pete bu n mhodzünu phishütuo, mu n mhodzünu a za ‘Jihova’ ikecüu pu pesishütuo; mu a puo gei tseishüketuomia gei tseishütuo, mu ngumezhieshü ketuomia ngumezhieshütuo.

²⁰Derei puo sie, “No a zie we ngulie kenjü; themia a zie ngu di rheilie kenjükecü la” sita.

²¹Mu Jihovae sie, “Harie, a n bu a khieki thechü puo keba tsiekrieu gei thalietuo;

²²mu a zayieu phikezhü ki, a n pie tsiekrie kerüko nu shüwatuo, di ae süu pfüthelie kemochie, a dzie pie n yalietuo;

²³süsie a dzie teshülietuo, mu no a chie ngutuo; derei a zie we ngulie lho” sishü.