Read Angami Naga Toukepra 34 Bible Online

Toukepra 34 - Angami Naga bible

Toukepra 34

¹Jihovae Mosa ki, “Tsiekra kenie, kerienie tuoikecü phrolie, siro ae no tsiekra biephrowaketa nie gei thukeshü dieko se tsiekranie gei thu lashütuo.

²Khise dojülie, di Sinai kijüthou gei khorlie, di kijüthou mezü geinu n khapie a mhodzünu shülie.

³Miapuorei bu n ze khor hie mu kijüthou-u gei mia puo bu rei tuo di ngu hie, tekuo kro morei mithu kro puorei bu kijüthou süu mhodzünu nha pfhücü hie” sishü.

⁴Süla Mosae tsiekra kerienie tuoikecü kenie phrolie; mu puoe khiserüna sie di Sinai kijüthou gei kholie, Jihova puo ki diekhakeshü tuoi, mu puo dzie nu tsiekranie pietuo.

⁵Siro Jihovae kimhou nunu ker puo ze thalie di, “Jihova” icü thezau se pesishü.

⁶Jihovae puo mhodzünu pfüthe phi di pukeshü, “Jihova, Jihova, noushünouzhie kenyi mu mia ngukemezhie Kepenuopfü, puo noumeyie tho, rüdikemo kekhrie mu kemiatho puo tshu ba,

⁷Thephou nyienyie la rüdikemo kekhrie khapie baya, jokewa, moukewa mu phoumakewa vakeshüu, derei kejokechümia we khashü mvü beiyakecüu, sidi u krü kephouma la u nuonuo nuonuo gei, phou se phou dia ketso rei siazha khashüyakecüu” si.

⁸Sitse Mosae rükri nuke kijü tsu di rüsuota.

⁹Mu puo sie, “A tsie n mhiki n khriepfülieta üro, he-i Niepuu, a n ki chaya, Niepuu bu hieko ze vocie, hiekoe pietsümvükecü themia kro puo zo ürei mu hie kejo mu hie kephouma vashü, di n kayie la hieko zeliecie” sita.

¹⁰Mu puo sie: Harie, ae dietseidiekho puo chüshüzhie. Nie themia pete mhodzünu ae mha u ngokecü, kijü pete nu, mu seyie puo nu rei chüshü chiekemo chüshütuo; mu nie uko donu keba themia süko pete bu Jihova mhatho ngushütuo; ae nieko ze mha u ngo zokecü chüshüketuo la.

¹¹A thie n ki diekhakeshüu zeliecie. Harie, a n mhodzünu nu Amorko, Kananko, Hitko, Perizko, Hivko mu Jebusko whuowatuo.

¹²Kijü hau nu lhoukeba themiako ze dietseidiekho chü molieketuo le terliecie, süu nieko la ciephrie puo chütatuo mu.

¹³No uko ruosuobako biewatuo, mu uko coko bietshewatuo, mu uko Asherako wiwatuo,

¹⁴(Noe terhuo kekrei puorei rüsuolie lho, Jihova puo za sü Urokecüu, puo rokenyi Kepenuopfü puo zocü la).

¹⁵Noe kijü hau nu themiako ze dietseidiekho chülie lho zo, kekreilamonyü siümha ro, ukoe thethe lie di uko rhuoko rüsuo mu ruosuo chüpie uko rhuoko ketsü ki mia nie kie di nie bu uko ruotho muo-u cüwa rei si mocü la.

¹⁶Sitse nie uko nuopfüko liepie nie nuonuo thepfuko tsü mu uko nuopfükoe thethe lie di terhuo rüsuokecü ki nie nuo thepfuko bu rei uko ze thethe lietatuocü la.

¹⁷No n thuo n la terhuo miarhi chü hie.

¹⁸No khreiü shükemo niekhrüda nyiu nyituo. A n ki diekhakeshü tuoi Abib-u khrü puotei chiekeshü ki zha thenie khreiü shükemo niekhrüda cütuo; noe Abib-u khrü Ijipt nunu ta parkelie la.

¹⁹Penuo kerieu pete a vie, nie kirinuo donu puochü pete, mithu mu tekuo rei penuoshü kerieu.

²⁰Gada penuolie kerieu la no tekuonuo puo pie puo rhatuo, morei puo rha mo ro, puo vo bietshewatuo. N nuo thepfu penuolie kerie pete noe puo rha morosuo. Mu mia puo bu rei methuo di a ki vorlie lho.

²¹No zha sorou mhachütuo, derei zha thenie nhie noe rüleituo; khouhie teiki rei mu lieyie teiki rei noe rüleituo.

²²Mu noe zhadoudoko nyiu pie batuo, thoulha lieyie kerie nyiu mu teicie thela ki lieyie nyiu rei.

²³Cie puo nu va se n nuo thepfukoe Jihova nie Kepenuopfü, Israel Kepenuopfü mhodzü vortuo.

²⁴Ae n mhodzünu seyieko whuowatuo, di n kijürie chü kemeyashüketuo la; siro no cie puo nu va se Jihova n Kepenuopfü ki khokecü ki, mia puo bu rei n kijü mehoulie lho.

²⁵“No khrei sa di thezie ruosuo chüpie a tsülie lho; morei ciekevonyi ruotho-u rei khapie ba khise tsolie lho.

²⁶N lie nu puo si rüchükelie kerie kevitho-u se Jihova n Kepenuopfü ki vortuo. No temvünuo pie puo krü nudzü nunu chalie lho” si.

²⁷Mu Jihovae Mosa ki, “Die hako thuliecie, die hako geinu ae no mu Israel ze dietseidiekho puo chüwate” sishü.

²⁸Mu puo sünu teisozha hiedia mu teizeizha hiedia Jihova ze bata; puoe mha rei cü mo, dzü rei krie mo mu puoe tsiekranie gei dietseidiekho dieko, diekhakeshü kerko[43] thulie.

²⁹Mosa Sinai kijüthou geinu kerta. Mu puoe kijüthou geinu dietseidiekho[44] tsiekranie pie di kercü ki, puo zieu ziekruoi tuota. Sirei puoe süu si tuo mo, puoe Ukepenuopfü ze kerükecü la.

³⁰Derei Aron mu Israelmia pete Mosa ngu tse, harie, puo zie ziekruoi tuota, süla ukoe puo penuo phir michieta.

³¹Derei Mosa uko kieshü; sitse Aron mu kehou krüta pete puo ki vor, sidi Mosa uko ze kerüchü.

³²Mu kenuotsa Israelmiako pete puo penuo vor, sitse puoe Jihova Sinai kijüthou geinu puo ze kerüchü di diekhakeshü pete pie uko tsüshü.

³³Mu Mosa uko ki diepu tseiwa tse, puo zie keya puo pie puo zie yawa;

³⁴derei Mosa Jihova rüchütuoü puo mhodzünu kevo ki, puo zie kewheu biewaya, puoe la parta kemochie;

³⁵mu puoe la par di Israelko ki diekhakeshüko pu ro, Israelkoe Mosa zie ziekruoiketa nguya; mu Mosae puo zie keyau pie puo zie ya lalieya. Puoe Jihova ze kerüchütuoü di la le kemochie.