Read Angami Naga Toukepra 35 Bible Online

Toukepra 35 - Angami Naga bible

Toukepra 35

¹Mosae Israelko kehou pete kie kengulie di uko ki, “Hako Jihovae nieko bu chünu di diekhakeshüko.

²Zha sorou mhachü morosuo, derei zha thenie nhie se pekreikecü sabat puo chü di, Jihova la rüleituo, kehoupuorei sünhie mhachükecüu bu siatuo.

³Nie sabat nhie nie kebachüko nu mi puorei chülie lho” sishü.

⁴Mosae Israelmia kehou pete ki pu di: Jihova diekhakeshü hauha:

⁵Nieko thuo nieko donu nu mha se Jihova tsüketuoko se vorlie; kehoupuorei puo nou mephruokecüu, puo bu Jihova la se vor khashülie; suna, rakachü mu merenyi rei;

⁶mha keloshü, teimeziekecü, merieyharakecü mu linen puolo mese mu megeikecü, temvümie,

⁷tekuozhü rekewa, mu temvüzhü, akasia sei,

⁸kepetu la tier, u kenhekecü tier-u la mu mhaketheu la mha kethenguko,

⁹mu zievo boulieu mu umerükeyau la onix tsie mu ketsie keziviko.

¹⁰Siro nieko donu mhachülie kevimia kehoupuo bu rei vor Jihova diekhakeshü pete chüshücie; ruosuopfhekiu,

¹¹pfhekiu mu puo kewheu, puo cawiko mu puo roko, puo kiphiko, puo coko mu puo phitouko;

¹²dietseidiekhobouu mu puo seizonie, ngukemezhie bau, mu keya pfheu la pfhe;

¹³Mizhüu mu puo seizonie mu puo mhakhou pete, mu ba seiketuo niekhrüdau.

¹⁴Mha va pezieketuo mitubouko, mu süu mhakhouko mu puo mitubouko, petu pezieketuo la tier;

¹⁵mu mharekethengu kethe ruosuobau mu puo seizonie, kenhekecü tier-u mu mharekethengu kethenguu, ruosuopfhekiu kikha keya pfheu,

¹⁶kethe ruosuo la ruosuobau mu süu la merenyi pie kechü dorüu, puo seizonie, puo mhakhouko pete, seikhouu mu puo kedoubau;

¹⁷kitiezhau la keya pfheko, puo coko mu puo phitouko, mu kitiezhau care keyapfheu;

¹⁸rüsuopfhekiu seizhieko mu kitiezhau seizhieko, mu uroko;

¹⁹kemesachüu nu lietho chüketuo la pfhenei menuo di chükecüko, Aron zievo-u la kemesa pfheneiko, mu puo nuo thepfuko zievo chükecü la uko pfheneiko.

²⁰Süsie Israelmia kehou pete Mosa mhodzünu nu tuota.

²¹Mu kehoupuorei unou nu chünyü parkeliemia mu u melou u hükecümia kehoupfhekiu nu seketuo pete mu kemesa pfheneiko la Jihova tsütuoü di mha khashü.

²²Sidi uko thenumia rei mu thepfumia rei vor; u nou u neikecümia kethuo, menyie mu zasikevü thuo, suna se kechü nya kekreikreicü pete se vor, di u thuo u suna pie Jihova tsü.

²³Mu kehoupuorei mha keloshü, teimeziekecü, morei merieyharakecü, morei linen puolo memhiekecü, morei temvümie morei tekuozhü morei temvüzhü rekewa kenyimia süko se vor Jihova tsü.

²⁴Kehoupuorei rakachü morei merenyi khashülie kevimia süu se vor Jihova tsü; mu kehoupuorei puo ki akasia pie mha chülie kevi kebamia süu se vorshü.

²⁵Mu thenumia kehoupuorei mha chülie kevimia u dzie pie kelo ze mu uko zekelieko, keloshü, teimeziekecü mu merieyharakecü mu linen puolo mese mu megeikecü se vor,

²⁶thenumia mhachükesi kehoupuorei unou mecakeliemia temvümie zepie kelo chü.

²⁷Mu krütakoe zievo boulieu la mu merükeyau la onix tsie mu ketsie kezivi se vor,

²⁸mu kepetu la, kenhekecü tier-u la mu kethengu ketheu la mha kethengu mu tier se vor.

²⁹Israelmia pete, thenu rei thepfu rei, Jihovae Mosa ki chünu di diekhakeshü la u noumecakelie khe u nei di mha se vor Jihova tsü.

³⁰Süsie Mosae Israelko ki pushülie: Mehoshüi, Jihovae Juda yiemia, Hur nuou, Uri ükecü nuou Bezalel za kie di puo kedaliete,

³¹mu puoe Ukepenuopfü ruopfüu, mha chükesi, kemecie, mhasimhale, mu mha pete chükesi pie puo ketshu chüshüwata.

³²Puo bu mha chü kezivilieketuo mhasi pie puo tsüshüte, suna, rakachü mu merenyi pie mhachükecü,

³³ketsie phropie rütsonyie chükecü, mu sei kepie mhachükecü, mu mhachükesi mhathoko pete chüketuo la.

³⁴Siro puo mu Dan yiemia Ahisamak nuou Oholiab unie bu mia pethakesi do pie unie tsüwate.

³⁵Puoe unie bu mhaca kehoupuonurei mhachükesimia, mharhikesimia, mha keloshü, teimezie, morei merieyharakecü gei morei linen puolo mese mu megeikecü gei terheichükesimia mhatho, morei pfhe dokesimia mhatho, mhachükesimia morei mharhikesimia mhatho pete chülieketuo pie unie tsüwate.