Read Angami Naga Toukepra 36 Bible Online

Toukepra 36 - Angami Naga bible

Toukepra 36

¹Bezalel mu Oholiab mu mhachü kesimia themia kehoupuorei Jihovae u bu kemesachüu chüketuo la mhachü kesi mu kemecie pie u tsükeshü pete Jihova diekhakeshü mhiei mhachütuo.

²Siro Mosae Bezalel mu Oholiab mu Jihovae mhachükesi pie u tsükeshü pete, kehoupuorei u nou u hükeshü pete bu vor mhachünu di kieshü.

³Mu uko Israelmiako kemesachüu chüketuo la u nei di mha khapie Mosa dzie nu keshü pete pielie. Siro themiakoe teisoduü mha se vor khashü ba zo.

⁴Sitse kemesachüu nu mha neiünei chü di, mhaca u tse chükebako vor,

⁵di sie Mosa ki, “Jihovae hie bu chünu di diekhakeshüu la se morokesuo ki kra phikecü themiakoe se vortazhie” sishü.

⁶Süla Mosae diekhashü mu die süu razhüchü pete nu pu keyie vota, “Thepfumia morei thenumia bu kemesachüu la khashütuoü di mhachü sa hietacie” sishü. Süla themiakoe mha se sa vor mota;

⁷uko mha se vorkeshüko mhatho-u chü tseilieketuo kezie baketa la.

⁸Siro mhakechüko donu mhachü kesithokoe keyapfhe ker pie rüsuopfhekiu chü; linen puolo mese mu megeikecü mu keloshü, teimezie, mu merieyharakecü pie chü, sidi menuo se di cherub miarhi rhikesimia bu puokhu thulie.

⁹Keyapfhe puo zocü puocha thu mepfüethetha, mu puo puozha thu dia; keyapfhe pete puo kemejü kemhie zo.

¹⁰Mu puoe keyapfhe pengou zu kesa, mu keyapfhe kekrei pengou rei zu kesalie.

¹¹Mu puoe keyapfhe zu kesakelie puokhietho-u mhougei keloshükecü se puo phrie chü di puo phrie pelepie rothou kro puo chülie, sümhiei zu kesakecü kenieu gei rei silie.

¹²Puoe keyapfhe puo gei rothou hiepengou chülie mu keyapfhe kenieu gei rei rothou hiepengou chülie, rothouko kemede phre.

¹³Mu puoe suna bekemakecü hiepengou chülie, mu bekemakecüko pie keyapfhenie bekemalie; sidi rüsuopfhekiu bu puo chülie.

¹⁴Puoe rüsuopfhekiu mho wheketuo la temvümie rübei pie keyapfhe kerepuo chülie.

¹⁵Keyapfhe puo puocha thu ser mu puo kezha thu dia; keyapfhe kerepuoko puo kemejü kemhie zo.

¹⁶Puo keyapfhe pengou zu kesalie, mu sorou zu kesalie.

¹⁷Mu puoe latsa puo keyapfhe puokhietho-u mhou gei rothou hiepengou chülie, mu keyapfhe kesakecü kekreiu mhou gei rothou hiepengou chülie.

¹⁸Mu puoe merenyi pie mhakekhakecü hiepengou chülie, pfhekiu teshü kesapie puo chülieketuo la.

¹⁹Mu puoe mvüdo zhü pie pfhekiu mho keya chülie mu süu mho keya la chüzhü kevipfü se chü.

²⁰Süsie puoe rüsuopfhekiu bu pedou thalieketuo la akasia pie puora chülie,

²¹puora puo puocha thu ker, mu puora puo puozha thu puo di puotie.

²²Puora puo gei puo phi kenie ba, kekhieketuo la; puoe rüsuopfhekiu rako pete rei hakemhie di chülie.

²³Rüsuopfhekiu rako la puoe hakemhie chülie; pekhrotsa la puora mepfü;

²⁴mu puoe puora mepfüko khro nu rakachü pie puo phitou hiedia chülie, puora puo khro puo phinie la puo phitou kenie, mu puora kekrei puo khro puo phinie la puo phitou kenie.

²⁵Mu rüsuopfhekiu khie kekreitsa mu pesotsa la, puoe puora mepfü chülie;

²⁶mu rakachü pie uko phitou hiedia chülie, puo phitou kenie pie puora puo phi kenie khro mu puo phitou kenie pie puora kekreiu phinie khro shüshülie.

²⁷Mu rüsuopfhekiu niakratsa la puoe puora sorou chülie.

²⁸Mu puoe ruosuopfhekiu sietsa puoke nu la puora kenie chülie.

²⁹Mu sünie puokhrotsa ketsieya, mu puo mhogei rohou kerieu nunu kesata; puoe puokenie la hakemhie kenie chülie.

³⁰Puora thethae puo phitou rakachü pie chü, phitou keresorou, puora puo khro puo phitou kenienie di.

³¹Mu puoe akasia pie kirie chülie, rüsuopfhekiu tietsa puorako la pengou,

³²mu rüsuopfhekiu kekreitsatie puorako la kirie pengou, mu rüsuopfhekiu kithotsa, kisietsa rako la seiphi pengou.

³³Mu puoe puo metsuo nu kirieu bu puorako puo la ketou nu puotie puo nunu vo kekreitsa keba rau ketou nu tso.

³⁴Mu puoe suna pie puorako dalie; mu suna pie kirieko la rohou kro puo chülie, mu suna pie kirieko dalie.

³⁵Siro puoe keyapfhe kelo keloshü, teimeziekecü, merieyharakecü mu linen puolo mese mu megeikecü pie dolie; di Cherub miarhi rhi menuopie puo geishülie.

³⁶Mu süu la puoe akasia co dia chülie, mu suna pie süko kenhelie mu puoe süko la rakachü pie puo phitou dia dalie.

³⁷Puoe pfheki kikhau la rei puo keya puo chülie, mha keloshü, teimezie, merieyharakecü mu linen puolo mese mu megeikecü pie chülie, mu thepre rhitho se puokhu thu;

³⁸siro puo co pengouko mu uko cawiko rei puokhu thu. Puo uko tsüko suna pie dalie, mu süko mvüdzeko suna pie chü, derei uko phitou pengouko we merenyi pie chü.