Read Angami Naga Toukepra 37 Bible Online

Toukepra 37 - Angami Naga bible

Toukepra 37

¹Bezalel-e akasia pie dietseidiekhobou chülie; puocha thu kenie di puotie, puozha thu puo di puotie, mu puo rükrie thu puo di puotie.

²Mu puoe puo noukou rei mu puo mho rei suna ketho pie dalie, mu suna pie puo toucha puo chüpie puo whilie.

³Mu puoe süu la suna rohou dia chülie, puoke diako la. Puo khie tietsa puo la rohou kenie mu puo khie kekreitsa la rohou kenie.

⁴Mu puoe akasia pie seizo kenie chülie, di suna pie sünie dalie,

⁵sidi seizonie pie dietseidiekhobou khie nu pelilie, dietseidiekhobou pieketuo la.

⁶Mu puoe suna ketho pie ngukemezhie ba[45] puo chülie; puocha thu kenie di puotie, mu puozha thu puo di puotie.

⁷Mu puo suna ketou pie cherub kenie chülie, tsievütsie pie ketou di pie ngukemezhie bau[46] tienie gei shülie,

⁸Cherub puo puotie tietsa puo, mu cherub puo puotie kekreitsa; ngukemezhie bau ze chü puo chü di puoe cherubnie chüpie puotienie gei shülie.

⁹Cherubnie unie tie pie kepetsou di unie shü kelhapie ngukemezhie bau[47] whe; cherubnie zie pie ngukemezhie bautsatie[48] va.

¹⁰Puoe akasia pie mizhüu rei chülie, puocha thu kenie, puozha thu puo; mu puo rükrie thu puo di puotie,

¹¹mu puoe suna ketho pie süu dalie, mu puoe suna ketho pie puo toucha puo chüpie süu whilie.

¹²Mu puoe puokhie keya puozha u dziezhüde puo chüpie puo whilie, di suna pie puo toucha puo chüpie puokhieu whilie.

¹³Puoe süu la suna rohou dia chülie, di rohouko pie puoke diako nu puophi diako gei shülie.

¹⁴Mizhüu pieketuo la seizonie se pelilie kevi rohou diako pie mizhükhie keyau kepenuo ki shü,

¹⁵mu puoe akasia pie seizonie chülie di suna pie dalie.

¹⁶Mu puoe suna se mizhü gei khapie baketuo mhakhouko mu mharekethengu kethe khouko, puo hieko mu ruosuo zu rushüketuo chülie.

¹⁷Puoe mitubou bau rei suna kethopie chülie, süu ketoupie mituboubau phi mu puo co-u chü; puo hieko, puo tsüko, mu puo pou kreko puo ze kesa chü puo zo.

¹⁸Mu puotsei nunu puo co sorou pra, mituboubau co se puotsei tietsa, mu mituboubau co se puotsei kekreitsa idi.

¹⁹Tehie se, ciehu puo phro tuoi, puoco puo gei puo pou keze kre mu puo nou kre sa phre, mu puoco kekreiu gei tehie se, ciehu puo phro tuoikecü puo pou keze kre mu puo nou kre sa phre, sümhie mituba geinu kepra puoco kekrei sorouko tse gei.

²⁰Mu mitubau gei zokecü tehie dia chüpie ciehu si tuoikecü puo tshü mu puo pouko, sa di ba,

²¹mu puoco sorouko donu kenie kekhekhekecü khro nu puo tshü puo sa chü puo zokecü puo ba.

²²Uko shüko mu uko coko puo ze chü puo zo; pete suna ketho pie chü puo chü di tsievütsie se ketou di chü.

²³Mu puoe süu la mitubou thenie, puo kebeko mu puo khouko suna ketho pie chülie.

²⁴Puoe suna ketho talent puo pie hau mu puo khou puo hie pete chülie.

²⁵Puoe mharekethengu ruosuobau akasia pie chülie, puocha thu puo, mu puozha thu puo; puocha puozha ketou mu puo rükrie thu kenie; mu süu geinu puo kiako dulie.

²⁶Puoe suna ketho pie süu dalie, puomho, puo khieko mu puo kiako rei, siro puoe suna pie puo toucha puo chüpie süu whilie.

²⁷Mu puo toucha khro nu suna rohou kenie chüpie lutsahatsa shülie; seizonie pie pelilie di süu pielieketuo la.

²⁸Mu puoe akasiau pie seizonie chülie, di suna pie süu dalie.

²⁹Puoe kenhekecü kemesa tier-u rei chülie, mu mharekethengu kemesau rei, tier kethengu kechümia mhatho tuoi di chülie.