Read Angami Naga Toukepra 38 Bible Online

Toukepra 38 - Angami Naga bible

Toukepra 38

¹Puoe kethe ruosuobau rei akasia pie chülie; puocha thu pengou, mu puo zha thu pengou; puocha puozha ketou, mu puo rükrie thu se.

²Puoe puoke diako la puo kiako chüshü, puo kiako puo ze chü puo chü, mu puoe merenyi pie süu dalie.

³Mu puoe ruosuobau nyako pete, liko nyothoukhouko, seikhouko, zohucieko, mu miyiekhouko chülie: Puo nya pete merenyi pie chülie.

⁴Mu puoe ruosuobau la merenyi pie dorü puo chülie, mu dorü süu pie kiphi kezhüu khro nu, puola ketou nu shülie.

⁵Puoe seizonie pelilieketuo la rohou dia chüpie merenyi dorüu kediako nu shülie.

⁶Puoe akasia pie seizo chülie, di merenyi pie sünie dalie.

⁷Mu puoe seizonie pie ruosuobau tsei nu rohou nu pelilie, sünie pie süu pieketuo la puo mela pie süu chü di chüpie kekouzuolie.

⁸Puoe thenumia kehou pfhekiu kikha nu lietho chükezhako khrüphiko geinu merenyiko biepie seikhouu mu puo kedoubau chülie.

⁹Siro puoe kitiezhau chülie; pekhrotsa la kitiezha keyapfheko linen puolo mese mu megeikecü pie chü, thu krie puo;

¹⁰uko co mepfü mu süko phitouko mepfü merenyi pie chü derei uko co cawiko mu rozoko rakachü pie chü.

¹¹Mu pesotsa la keyapfheko thu krie puo, süko co mepfü, süko phitouko mepfü merenyi pie chü, derei coko cawiko mu rozoko rakachü pie chü.

¹²Mu kisietsa keyapfheu thu hiepengou ba, uko co ker, mu uko co phitouko ker, co cawiko mu rozoko rakachü pie chü.

¹³Mu puo mhodzütsa, niathutsa la thu hiepengou.

¹⁴Careu tietsatiepuo la keyapfhe thu kerepengou, mu co se mu puo phitou se.

¹⁵Mu kekreitsatie la rei sükemhie; kitiezha care lutsahatsa rei keyapfhe thu hiepengou, co se mu phitou se ba.

¹⁶kitiezhau houkecü keyapfheu pete linen puolo mese mu megeikecü phre.

¹⁷Mu co phitouko merenyi pie chü, derei puo cawiko mu rozoko we rakachü pie chü; uko tsü kewheu rei rakachü mu kitiezhau coko pete rakachü rozo pie khe.

¹⁸Mu kitiezhau careu keyau thepre se thu di keloshü, teimezie, mu merieyharakecü se linen puolo mese mu megeikecü geinu puokhu thu; süu puocha thu mepfü mu puozha kezhau nu keyapfheko thu pengou rükrie.

¹⁹Mu uko co dia; uko phitou dia merenyi pie chü, uko cawiko rakachü pie chü, mu uko tsükewhe mu uko rozoko rakachü pie chü.

²⁰Mu rüsuopfhekiu mu kitiezhau la seizhieko merenyi pie chü.

²¹Hako, Mosae diekhakeshü geinu Levimiakoe Aron nuou Ithamar krüta khronu pfhüse kepar rüsuopfhekiu, süusü dietseidiekho-u[49] la rüsuopfhekiu la sekecü mhanyako.

²²Juda yiemia Hur nuou Uri, Bezalel nuo, Mosa ki Jihova diekhakeshü pete chülie;

²³mu puo ze mha chükecü Dan yiemia Ahisamak nuou Oholiab-e mhachü si, mha keloshü, teimezie, merieyharakecü, mu linen puolo mese mu megeikecü pie puokhu thu.

²⁴Mia khakeshü suna, mhatho la kemesachüu chükecü nu sekewa suna pete kesa talent mepfüethepfü, shekel krie thenie di ser, kemesachüu nu shekel-u se mejü sie ro.

²⁵Siro kehou nu phrülieketa tsüphrüko khakeshü rakachü talent krie puo, shekel nyie puo krie thenie di hietheniepengou, kemesachüu nu kese shekel pie mejükecü;

²⁶Cie mepfü mhoketako phrülieketa mia nyie krie sorou di se, thepfumia krie pengou di hiepengou, mia puo beka puopuo, (süu shekel tiepuo, kemesachüu nu kese shekel pie mejü sie ro) khakeshü nu.

²⁷Rakachü talent krie puoe kemesachüu phitou chükecü la, mu keyapfheu phitouko la; talent krie puoe phitou krie puoko la, puo phitou puo la talent puopuo.

²⁸Mu shekel nyie puo krie thenie di hietheniepengouko pie puoe co cawiko chülie, mu pie uko tsüko dalie siro se süko la rozoko chülie.

²⁹Mu merenyi khakeshüko talent hiethenie di shekel nyie kenie di krie dia.

³⁰Puoe süko pie kehou pfhekiu care phitouko, merenyi ruosuobouu mu süu la merenyi dorüu, mu ruosuobau la mhanya peteko,

³¹kitiezhau houkecü phitouko mu kitiezha care phitouko ruosuopfhekiu seizhieko, mu kitiezhau houkecü seizhie peteko chülie.