Read Angami Naga Toukepra 39 Bible Online

Toukepra 39 - Angami Naga bible

Toukepra 39

¹Mu ukoe kelo keloshü, teimezie, mu merieyharakecüko pie kemesachüu nu seketuo la pfhenei zivi sekecü chülie; ukoe Aron la kemesa pfheneiko chülie; Jihovae Mosa ki diekhakeshü mhiei.

²Mu puoe suna mu kelo keloshü, teimezie, merieyhara mu linen puolo kemese mu megeikecü pie zievo boulieu chülie.

³Mu puoe suna ketoudapie rüpfü selie di bepie kelo chülie, di pie keloshü, teimezie, mu merieyharakecüko sa do kesalie di se puokhu zivi sekecü pfhenei dolie.

⁴Uko zievo boulieu la puo bouka kerha chülie di puomhounie pie sügei zu kezalie.

⁵Mu boulieu mhogei chiepha chüketuo la do menuo di chükecüu puolo mu puo mhatho rei kemhie, suna mu kelo keloshü, teimezie, mu merieyharakecü mu linen puolo kemese mu megeikecü pie chü, Jihovae Mosa ki diekhakeshü mhiei.

⁶Siro zasikevü gei leshükhu kethu tuoi onix tsienie gei Israel nuonuo thepfuko za thulie di suna kechiepie sünie peralie.

⁷Mu puoe sünie pie zievo-u boulie bouka kerha gei shülie. Israel nuonuoko kerükra tsie chüketuo la; Jihova Mosa ki diekhakeshü tuoi.

⁸Puoe u merü keyau chülie, zievo boulieu kechü tuoi, suna, kelo keloshü, teimezie, merieyharakecü linen puolo mese mu megeikecü pie kemenuo rhitho chü di chülie.

⁹Süu puocha puozha ketou; u merü keyau kekhre, mu kekhreshü ro puocha puozha pfü puo phre.

¹⁰Mu ukoe sügei ketsie cha dia pie kulie. Siro karnelian,[50] krisolite mu emerald se cha kerieu chü.

¹¹Turkuoise, safir mu Moonston se cha kenieu chü.

¹²Jasinth, agat mu amethist se cha seu chü.

¹³Mu beril, onix mu jasper se cha diau chü, mu suna kechiepie süko zu kesalie.

¹⁴Israel nuonuo thepfuko za medzi di ketsie kerekenie tuo; zasikevü tuoi, puotse gei puo za thu, seyie kerekenieko la.

¹⁵Mu ukoe u merü kewheu gei suna ketho pie kero kepeü tuoikecü chülie;

¹⁶mu ukoe suna kechiekecü kenie mu suna rohou kenie chülie, di suna rohounie pie uko merü keyau mhounie gei shülie;

¹⁷mu ukoe suna ronie pie u merü keyau mhogei rohounie nu pelilie.

¹⁸Suna ronie tiepie suna kechiekecü gei khelie; sidi ukoe süu pie zievo boulieu mhodzütsa shü di u bouka kerhanie gei khelie.

¹⁹Siro ukoe suna rohou kenie chülie, di sünie pie u merü kewheu khienie nu shülie, zievo boulieu keku puonoutsa mhou gei.

²⁰Süsie ukoe suna rohou kenie chülie, di sünie pie zievo boulieu mhodzütsa bouka kerhanie pekhrotsa khelie, zievo boulie chiepha do menuokecüu mho kemethoukecü nu.

²¹Mu ukoe mha kepha puo pie rohouko nu shülie di u merü kewheu zupie zievo boulieu sa kesalie, sidi süu bu zievo boulie gei menuo di dopie keba chiephau gei balie, u merü keyau bu zievo boulieu geinu rülhe parta molieketuo la; Jihovae Mosa ki diekhakeshü tuoi.

²²Puoe kelo keloshü pie zievo boulie kerütshu dolie;

²³mu boulieu nu kechieu puo bu rürhata molieketuo la puo khie kemvü.

²⁴Boulieu chieca mhou gei, ukoe kelo keloshü, teimezie mu merieyharakecü mu linen puolo mese mu megeikecü pie turaü si kemhiecü rhi,

²⁵ukoe suna ketho pie thetsei rei chü di thetseiko pie boulieu chieca gei turaüsiko donu shü;

²⁶thetsei puo mu turaüsi puo, thetsei puo mu turaüsi puo idi lietho nu kese boulieu chiecha khie whi vo; Jihovae Mosa ki diekhakeshü tuoi.

²⁷Ukoe Aron mu puo nuo thepfuko la linen kemese dopie uko boulie chülie,

²⁸mu linen kevi pie tsüze mu tsüreko chülie, mu linen lo mese mu megeikecü pie pfhenei pekhroko dolie.

²⁹Mu chiephau linen lo mese mu megeikecü mu kelo keloshü, teimezie mu merieyharakecü thepre pie puokhu kalie; Jihovae Mosa ki diekhakeshü tuoi.

³⁰Siro ukoe suna ketho pie kemesa tsüreu gei keshü mekhou kemhieu chülie, di sügei zasi geikeshü khu tuoi di, “Jihova ki mesakeshü” icü thulie.

³¹Siro ukoe mhakepha keloshükecü pie süu khielie, pie pesogei tsüzeu gei pfüketuo la; Jihova Mosa ki diekhakeshü tuoi di.

³²Hamhie di ruosuopfhekiu tho pete chü tseilie, mu Jihovae Mosa ki diekhakeshü mhiei Israelkoe pete chülie; ukoe sükemhie chülie zo.

³³Siro ukoe ruosuopfhekiu se Mosa ki vor, pfhekiu, puo li peteko, puo cawiko, puorako, puo kiphiko, puo coko, mu puo phitouko;

³⁴tekuozhü rewaketa mu temvüzhü pie puo kewhekechüu rei mu puo keyapfheu,

³⁵dietseidiekhobouu[51] mu puo seizonie mu ngukemezhiebau rei;

³⁶Mizhüu mu puo nyako pete sa, ba seikecü niekhrüdau rei;

³⁷suna ketho pie chükecü mitubou bau, puo mitubouko mu mhanyako pete pie uko bako nu ba phrelie, mu kepetu tier rei;

³⁸suna ruosuobau, u kenhekecü tier-u mu mharekethengu; pfhekiu kikhau la keyapfheu;

³⁹Merenyi ruosuobau, mu merenyi dorüu, puo seizonie mu puo nyako pete; seikhou mu puo kedoubau;

⁴⁰kitiezhau keyapfheko, puo coko, mu puo phitouko, mu kitiezhau la keyapfheu, puo roko, mu puo seizhieko; mu rüsuopfhekiu nu liethoko la, mu kehou pfhekiu la mhanya pete;

⁴¹Kemesa thechüu nu lietho la pfhenei menuo di chükecüko, Aron zievo la kemesa pfheneiko, mu puo nuo thepfuko bu zievo kechü la uko pfheneiko.

⁴²Jihovae Mosa ki diekhakeshü pete mhiei, Israelmiakoe mhatho pete chülie.

⁴³Mu Mosae mhatho pete meho sie, ru harie, ukoe chülieta; Jihova diekhakeshü mhiei, ukoe sümhie chülie. Sitse Mosae japie uko tsüshü.