Read Angami Naga Toukepra 4 Bible Online

Toukepra 4 - Angami Naga bible

Toukepra 4

¹Sitse Mosae sie, “Derei harie, ukoe a pelelie lho morei a pfhe rünyülie lho, ukoe, ‘Jihovae n pengushü mo’ itatuocü la” sita.

²Jihovae puo üse, “N dzie nu kebau kedipuo ga?” si. Puoe sie, “Kethe puo” sishü.

³Sitse Puoe sie, “Kelhoupie kijü shücie” si. Süla puoe süu kelhoupie kijü shüshü ru süu tinyhü puo chüta, sitse Mosa süu ki nu tata.

⁴Derei Jihovae Mosa ki, “N dzie yhashü di puo meiu thezelie” sishü, süla puoe puo dzie yhashü di süu thezelie, ru süu puo dzie nu kethe puo chü lata.

⁵“Uko bu Jihova, uko puonuoko Kepenuopfü, Isak Kepenuopfü mu Jakob Kepenuopfü n pengukeshü silieketuo la” sishü.

⁶Süsie rei Jihovae puo ki, “N dzie pie n pfhe khro shüshülie” si, süla puoe puo dzie pie puo pfhe khro shüshü, sidi puo dzie se la par ru, harie, puo dzie gei mpa kechü bata, krapie pekrie tuoita.

⁷Sitse Ukepenuopfüe pu la di, “N dzie pie n pfhe khro shü lashücie,” süla puo puo dzie pie puo pfhe khro shü lashü; di puo süu se la par tse, harie, süu puo chü kekreiko kemhie lata.

⁸Ukepenuopfüe lasie, “Ukoe n pele mo, morei zasi kerieu pie mhaümo rei, zasi kenuou we uko pelelietuo.

⁹Mhanuü uko zasi hanie rei pele mo, morei n pfhe rünyü mo ro, no Nail rü nunu dzü huoyo thoulie di süu lapie kijü keso gei shücie, sitse no Nail rü nunu dzü thoukelieu kijü keso geinu thezie chütatuo” sishü.

¹⁰Derei Mosae Jihova ki, “He-i a Niepuu, a we hamhodzütsa rei mu no n kituou ki diepukeshü sie rei diepu meto mo, derei dieputho, mu a meü meduo” sishü.

¹¹Süsie Jihova puo ki, “Supuo themia tie chüshü ga? Supuonie puo chüpie liehuo, morei puo nyie rüvü, morei mhangulie, morei puo mhiciekecü chüshüya ga? Süu A, Jihova thuo moü me?

¹²Süla tsie volie, a thuo n tie ze tuotuo, sidi n bu kedipuo pu morosuo shikecü se n pethashütuo” sita.

¹³Derei puo sie, “He-i a Niepuu, n pezie rei kekreimia ketsewacie,” si.

¹⁴Sitse Jihova Mosa gei puo nou meyieta di sie, “Aron, n dzürieu, Levi-u rei ba mo me? Puoe diepu si phikecü a si ba; mu harie, puo n ze kesetuoü vorzhie, mu puo n ngulie tse puoe puo nou puo neituo.

¹⁵Mu noe puo ki dieputuo mu dieko pie puo tie nu shütuo, mu a n tie mu puo tie ze tuotuo, sidi n bu kedipuo chü morosuo shikecü se pethashütuo.

¹⁶Puoe n la themiako ki diepushütuo, mu puoe n tie chülietuo, mu noe puo la Kepenuopfü tuoituo.

¹⁷Mu noe n dzie nu kethe hau pie tuotuo, sidi se zasiko chütuo” sita.

¹⁸Süsie Mosae puo meiu Jethro ki la vo di puo ki, “A n ki chaya, a bu Ijipt nu la vo di a kicükinumiako rhei ba zoluo momo shicü mehoshücie,” si. Sitse Jethro puo ki, “Keviu chülie,” sishü.

¹⁹Sitse Jihova Midian nu Mosa ki, “Ijipt nu la volie, n kerheiro pfhüketuoko pete siate mu” si.

²⁰Süla Mosae puo kimia, mu puo nuo thepfuko zelie di uko pie gada gei shülie, sidi Ijipt kijü nu la vo; mu Mosae puo dzie nu Ukepenuopfü theu setuo zo.

²¹Sitse Jihovae Mosa ki, “No Ijipt nu la vo ro, ae n bu chülie kevi kekuo pie n tsüwaketa ungomhathoko Faro mhodzünu chüshücie; derei a puo nou chü perewatuo, sitse puoe themiako bu tuolie lho.

²²Siro noe Faro ki putuo, ‘Jihovae hakemhie puya: Israel-e a nuo nuorieu,

²³mu a n ki puya, “A nuo bu a lie chüketuo la tuotacie,” mhanuü no puo bu tuo mvüta ro, harie, ae n nuo nuorieu dukhriwatuo’ ” si.

²⁴Cha nu razhüchü puo nu Jihovae puo ze keselie di puo dukhriwatuoüta.

²⁵Sitse Ziporae tsiekhrü puo chülie, di puo nuou zhürewa, di süu pie Mosa phi bieshü, di puo ki, “No ha a la we thezie nupfu puo zo!” sita.

²⁶Süla puoe puo khashüwa. Zhükereu la puoe, “No ha thezie nupfu puo zo” idi pukeshü zo.

²⁷Jihovae Aron ki, “Rayha nu volie Mosa ze keseketuo la” sishü. Süla puo Ukepenuopfü kijüthouu gei vo puo selie, sidi puo meboshü.

²⁸Sitse Mosae Jihova die se puo pesekeshüko pete mu puo bu zasi chüshünukecü peteko pie Aron ki pushü.

²⁹Sitse Mosa mu Aron unie vo di Israelmia phichüko pete pfhü kengulie.

³⁰Mu Aron-e Jihova Mosa ki pukeshü dieko pete pushü, sidi themiako mhodzünu zasiko rei chüshü.

³¹Sitse themiakoe pelelie; mu ukoe Jihova Israelko ki vor di uko kemezhiekezhüko ngu ba ükecü silie tse, uko tsu Ukepenuopfü rüsuota.