Read Angami Naga Toukepra 40 Bible Online

Toukepra 40 - Angami Naga bible

Toukepra 40

¹Jihovae Mosa ki:

²Khrü kerieu zha puo nhie noe rüsuopfhekiu pethoulie morosuo.

³Mu no dietseidiekhobou[52] pie sünu batuo, mu no keyapfhe pie süu yatuo.

⁴Mu no mizhüu se ler di mha khapie sügei ba touwatuo; mu noe mituboubau se ler di mitubouko pie puobako nu shülie morosuo.

⁵Mu noe mharekethengu kethe la suna ruosuobau pie dietseidiekhoubou,[53] mhodzünu shülietuo, mu rüsuopfhekiu kikha la puokeya lhawatuo.

⁶Noe kethe ruosuo kechü ruosuobau pie rüsuopfhekiu kikha mhodzünu shülietuo,

⁷di seikhou pie kehou pfhekiu mu ruosuobau unie donu shütuo, di dzü pie sünu shülietuo.

⁸Mu noe kitiezhau keselietuo, mu kitiezhau careu la keyapfhe lhawatuo.

⁹Süsie noe kenhekecü tier-u selie di rüsuopfhekiu mu puo nu keba mha pete kenhewatuo, di süu mu puonyapuora pete chü kemesawatuo; sitse süu mesatatuo.

¹⁰No kethe ruosuo kechü ruosuobau rei mu puo nyako pete rei tier pie kenhewatuo; di ruosuobau bu kemesatho chütatuo.

¹¹Noe seikhouu mu puo kedoubau rei tier pie kenhetuo, di süu chü kemesalietuo.

¹²Süsie Aron mu puo nuo thepfuko ze kehoupfhekiu kikha nu vor di dzü pie uko khrüwatuo,

¹³di Aron gei kemesa pfheneiko khashütuo, mu noe tier pie puo kenheshü di puo chü kemesalietuo, puo bu zievo chü di a lie chüketuo la.

¹⁴Noe puo nuo thepfuko rei ze vor di boulie pie uko gei shütuo,

¹⁵di tier pie uko puou kenhekecü tuoi uko kenhetuo, uko bu zievo chü di a lie chülieketuo la; mu uko kenhekewau la mu uko nuosenuoyie bu kechachie zievo chülieketuo pie uko tsüwatuo.

¹⁶Mosae hakemhie chülie, Jihovae puo ki diekhakeshü pete kemhie di puoe chülie.

¹⁷Mu cie kenie cie khrü kenieu nu, khrülhou zha kerie nhie rüsuopfhekiu pethoulie.

¹⁸Mosae rüsuopfhekiu pethoushü; puoe puo phitouko khapie balie, di puorako doulie, mu puo seizoko pie pelilie; di puo coko doulie;

¹⁹di puoe dzüpfheu pie rüsuopfhekiu mho whelie, di pfheki kewheu pie sügei shülie, Jihovae Mosa ki diekhakeshü tuoi di.

²⁰Siro puoe thezho-u[54] pie dietseidiekhobou nu shülie, di seizonie pie dietseidiekhobouu gei shülie mu ngukemezhie bau[55] pie dietseidiekhobou mhogei shülie;

²¹Mu puoe dietseidiekhobou pie rüsuopfheki nu se lerlie, di keyapfheu lhalie, di keya pfheu pie dietseidiekhobouu[56] yawa; Jihovae Mosa ki diekhakeshü tuoi di.

²²Puoe mizhüu pie kehou pfhekiu nu, rüsuopfhekiu pesotsatie, keyapfheu chazoutsa shülie,

²³di niekhrüdau pie süu mho menuo di Jihova mhodzünu balie, Jihovae Mosa ki diekhakeshü tuoi.

²⁴Puo mitoubou bau pie kehou pfhekiu nu, rüsuopfhekiu pekhro tsatie mizhüu rütsietsa shülie,

²⁵mu mitubouko pie Jihova mhodzünu shülie; Jihova Mosa ki diekhakeshü tuoi.

²⁶Puoe suna ruosuobau pie kehou pfhekiu nu keyapfheu mhodzünu shülie,

²⁷di sügei nu mharekethengu puore kevi theshü, Jihova Mosa ki diekhakeshü tuoi.

²⁸Puoe rüsuopfhekiu kikha la keyapfheu pie puochü nu lhalie.

²⁹Siro puoe kethe ruosuo kechü ruosuobau pie kehou rüsuopfhekiu kikha ki balie, di sügei kethe ruosuo mu telha ruosuo khashü; Jihovae Mosa ki diekhakeshü tuoi.

³⁰Puoe seikhouu pie kehou pfhekiu mu ruosuobau unie donu shülie, di u kekhrü la dzü pie sünu shülie,

³¹süu pie Aron mu puo nuo thepfuko bu u dzie metei mu u phi khrü, ukoe kehou pfhekiu nu kele ki,

³²mu ukoe ruosuobau penuo kevo ki, ukoe u khrü, Jihova Mosa ki diekhakeshü tuoi.

³³Puoe rüsuopfhekiu mu ruosuobau khieümhou kitiezhau chülie di kitiezha careu keyapfheu khapie balie. Sidi Mosae mhatho-u chü tseilie.

³⁴Süsie kimhou puo thuo ker kehou pfhekiu zelie, mu Jihova zapuzayieu thuo rüsuopfhekiu tshulie.

³⁵Ru Mosae kehou pfhekiu nu lelie kenjüta, kimhou-ue sügei baketa la mu Jihova zapuzayieu thuo rüsuopfhekiu tshuketa la.

³⁶Uko rüve pete nu, rüsuopfhekiu mhonu kimhouu sesieta ro Israelmiakoe tuoshütuo;

³⁷derei kimhouu sieta mo ro, ukoe tuoshü mo zo ba süu sesieketa tsoya.

³⁸Uko rüve pete nu Israel kinumia peteko mhingu nu khinhie gei ro Jihova kimhoue rüsuopfhekiu mhogei ba, mu theva gei ro kimhou süu nu mi tu batatayakecü la.