Read Angami Naga Toukepra 5 Bible Online

Toukepra 5 - Angami Naga bible

Toukepra 5

¹Kenuotsa Mosa mu Aron unie Faro ki vo di sie, “Jihova Israel Kepenuopfü, hakemhie puya, ‘A themiako bu tuotaliecie, uko bu rayha nunu a la thenyi puo nyiketuo la!’ iya” sishü.

²Derei Faro sie, “Jihova supuo di a bu puo pfhe rünyü di Israelko bu tuotatuo ga? A Jihova si mo, mu sizomonyü a Israelko bu tuotalie lho,” sita.

³Sitse unie puo ki, “Ibriko Kepenuopfü, hienie ze kesewate, hienie n ki chaya, hieko bu tuotacie, hie bu zha se tuo nu vo di rayha nunu Jihova hie Kepenuopfü ki ruosuo chücie, si mo ro, hie thesa nunu morei zhiecha nunu kata rei si momu” sishü.

⁴Derei Ijipt kediu unie ki, “Mosa mu Aron, kiüdi nnie themiako mhatho nunu uko zetatieya mu? Nie mhatho nu la voliecie.”

⁵Siro Faro sie, “Harie, ukoe kijü hau nu themiako ki krakuote mu nnie uko bu u mhathoko nu rüleitatuoüzhie!” sita.

⁶Siro sünhie teiso nu Faroe themia mhathoniepuko mu kemehoko ki pu di,

⁷“Nieko hadzü tuoi chüketuo la rügu khapie themiako tsü sa hie; uko bu u thuo vo rügu pfhü kengutalie.

⁸Derei uko bu hadzü chüyakecü de chü zotuo, nieko süu chü petsawa mo zolie, uko mhachü mecükecü la; süla ukoe sie, ‘Hieko bu vo di ruosuo chüpie hieko Kepenuopfü tsücie,’ iba.

⁹Mhatho rekuocü pie themiako gei shülie, uko bu süko chü di mhakese dieko rünyü motalieketuo la” sishü.

¹⁰Süla mhatho niepuko mu themia kemehoko pra di themiako üse, “Faroe hakemhie puya, a rügu pie nieko tsülie lho.

¹¹Nie thuo vo di ngulie kevira nu süu pfhülie; derei nieko mhatho we yopuo rei petsawalie lho,” si.

¹²Süla themiakoe vo rügu sou nu rügudo pfhü di Ijipt kijü pete nu cüre tuota.

¹³Siro mhatho niepukoe kenouse di sie, “Nie mhatho chü tseiwalie, nieko khunhie tho-u rügu kebaki tuoi zotuo” ita.

¹⁴Siro Faro mhatho niepukoe Israelmia krütako, uko thuo kedapie themia kemeho chükeshüko vü di uko ki, “Kiüdi thie nieko bu nyorietsie chünukeshüko thiedzü tuoi pete chüshü mota ga?” ita.

¹⁵Sitse Israelmia krütakoe Faro ki vor di puo ki, “No kiüdi n kituoko gei hakemhie chüya mu?

¹⁶Rügu puorei khapie n kituoko tsü mo, sizoürei ukoe hieko bu, ‘Nyorietsie chüshülie’ si. Mu harie, n kituoko vütaya, derei kejo-u n themiako tsü gei zo” sishü.

¹⁷Derei puo uko ki, “Nieko mhachü mecü rei mecüthor; süla niekoe sie, ‘Hieko bu vo ruosuo chüpie Jihova tsücie’ iya.

¹⁸Tsie volie, di mhachülie; rügu pie nieko tsülie lhoketa la, sizorei nietho bu nyorietsie chünukeshü de chü zotuo” sita.

¹⁹Israelmia krütakoe, “Nieko bu khunhie nyorietsie chünukeshüko petsawalie lho” idi pukecü sikeshü ki ukoe puotei kesuo puo nu baketa ngulie.

²⁰Ukoe Faro ki nunu par ru Mosa mu Aron unie uko pfhe tha di selie;

²¹Sitse uko unie ki, “Jihova bu nnie meho di capi chülie, kekreilamonyü nnie hieko bu Faro mu puo kituoko mhodzünu ngukemecüko chüwate, mu hieko dukhriketuo la zhiecha pie uko dzie nu shüwate,” sita.

²²Sitse Mosae rürei Jihova kitsa valie di sie, “He-i, Jihova, no kiüdi themia hako gei mha kesuo chüshü ga? No kiüdi a ketse rei shü ga?

²³Ae n za nunu Faro ki dieputuoü vorkecü ze puoe themia hako gei mha kesuo chü ba zote, mu no n themiako shüphralie mo zo” sishü.