Read Angami Naga Toukepra 6 Bible Online

Toukepra 6 - Angami Naga bible

Toukepra 6

¹Derei Jihovae Mosa ki, “Tsiewe n bu a Faro gei kedipuo chüshütuo shi ngushütuo. Puoe puo dzie kuo di uko bu pratuo, u zo, puo dzie kuo phi di puoe puo kijü nunu uko whuo phrashütuo.”

²Siro Ukepenuopfüe Mosa ki, “A sü Jihova zo,

³Ae Abraham, Isak mu Jakob ki, Kekuotho Kepenuopfü üdi pie pengushü, derei a za Jihova ücü se uko pesishü mo.

⁴A uko ze dietseidiekho rei chü, uko rüsomia chü di lhouketuo Kanan kijüu pie uko tsütuoü di.

⁵Sizomonyü ae Israelko Ijiptmia diechü di meheimelokezhü pfhe sishüte, mu a a dietseidiekho-u rükraliete.

⁶Süla Israelmiako ki pushücie, ‘Ae Jihova zo, mu a Ijiptmia pieko khro nu nieko ze parlietuo, mu uko diekechü nunu nieko shüphralietuo, mu a a bou yhashü mu siazha kere phi se di nieko kelalietuo.

⁷Mu a nieko pie a themia chülietuo, mu a nie Kepenuopfü chütuo; sidi nieko ae Jihova, nieko Kepenuopfü, Ijiptmia thepie kemesiko nunu nieko ze parkeshü silietuo.

⁸Mu a kijü pie Abraham, Isak mu Jakob tsütuoü di rüsekeshüu nu nieko ze voshütuo; nie bu süu pie nieko vie chüketuo la khashü nieko tsütuo. Ae Jihova we,’ ” sishü.

⁹Mosae Israelko ki hakemhie pushü, derei uko Mosa pfhe rünyü mvüta, uko nou kemezhiekecü mu mia diechü di rethortacü la.

¹⁰Siro Jihovae Mosa ki,

¹¹“Le di Ijipt kediu Faro ki Israelmiako bu puo kijü nunu pratanu di pushücie.”

¹²Derei Mosa Jihova ki, “Harie, Israelmiako a pfhe rünyü mvüte; siüro Faro ki kidi puo tie metsokemo a tuoikecü puo pfhe rünyütuo ga?” sita.

¹³Derei Jihova Mosa mu Aron unie ki pu di unie bu Israelmiako Ijipt nunu ze pratatuoükecü dieu pie Israelmiako mu Ijipt nu kediu Faro ki pushü.

¹⁴Hako u puonuo kiko nu puo krüko: Israel nuorieu Reuben nuonuoko: Hanok, Palu, Hezron mu Karmi; hako Reuben kinumiako.

¹⁵Simeon nuonuoko: Jemuel, Jamin, Jakin, Zohar, mu Kananmiapfü puo unie nuo Shaul[4]; hako Simeon kinuko.

¹⁶Hako Levi nuonuoko u thuo u yieu medzi di: Gershon,[5] Kohat mu Merari, Levi kelhouzha cie krie puo di serethenie.

¹⁷Gershon nuonuoko: Libni mu Shimei, unie kinuko kekrei di.

¹⁸Kohat nuonuoko: Amram, Izhar, Hebron mu Uziel, Kohat kelhouzha cie krie puo di serese.

¹⁹Merari nuonuo: Mahli mu Mushi. Hako Levi kinuko u thuo u yieu medzi di.

²⁰Amram-e puo puo üpfü Jokebed lielie, di puoe Aron mu Mosa unie penuoshü, Amram kelhouzha cie krie puo di serethenie.

²¹Izhar nuonuo: Kora, Nefeg mu Zikri.

²²Mu Uziel nuonuoko: Mishael, Elzafan, mu Sithri.

²³Aron-e Aminadab nuopfü mu Nahshon üpfü Elisheba lielie: mu puoe Nadab, Abihu, Eliazar mu Ithamar penuoshü.

²⁴Kora nuonuoko: Asir, Elkana mu Abiasaf; Hako Kora kinumiako.

²⁵Aron nuou Eliazar-e Putiel nuo thenumia puo lielie; mu puoe Finehas penuoshü puo tsü. Hako Levi kinuko, u puonuo kiko nu puo krüko.

²⁶Jihovae, “Ijipt kijü nunu Israelmiako krodidi chü di ze partacie,” idi hako se Mosa mu Aron ki pushü.

²⁷Ijipt kediu Faro ki, Ijipt kijü nunu Israel themiako ze partatuoü di pukeshü sü, Mosa mu Aron unie zo.

²⁸Jihovae Ijipt kijü nunu Mosa rüchükecü nhie,

²⁹Jihovae Mosa ki, “A sü Jihova zo; Ijipt kediu Faro ki a n ki kepu peteko pushücie” si.

³⁰Derei Mosa-e Jihova ki, “Harie a sü a tie metso mo,[6] siro Faro kidi a pfhe rünyütuo mu” sita.