Read Angami Naga Toukepra 7 Bible Online

Toukepra 7 - Angami Naga bible

Toukepra 7

¹Sitse Jihovae Mosa ki, “Mehoshüi, a Faro mhodzü ki n pie Ukepenuopfü tuoishütuo, mu n dzürieu Aron bu n siedzekesiu tuoi shütuo.

²A n ki pukeshü pete noe pushü morosuo, mu n dzürieu Aron Faro bu puo kijü nunu Israelmiako bu pratanucü pu morosuo.

³Derei a Faro nou chü perewatuo, mu a Ijipt kijü nu zasiko mu u ngoko chü phishü zoürei.

⁴Faro nieko pfhe rünyülie lho, sitse ae a dzie pie Ijipt kijü gei shütuo, sidi a Ijipt kijü nunu ketsokecü kere se di a krodiko, a themia Israel nuonuoko ze parshütuo.

⁵Sitse Ijiptmiakoe a Jihova zo ücü silietuo, a a dzie yhapie Ijipt gei shü di uko donu nu Israelmiako ze parlie ro” sishü.

⁶Sitse Mosa mu Aron unie sükemhie chülie unie-e Jihova unie ki diekhakeshü kemhie chülie.

⁷Siro unie-e Faro rüchükecü ki Mosae cie hiethethata mu Aron-e cie hiethethaeseta.

⁸Jihovae Mosa mu Aron unie ki,

⁹“Faro-e nnie ki, ‘Ungomhatho puo chüshü di nnie kevi pie a pesishüi’ iro, noe Aron ki, ‘N the pielie di kelhoupie Faro mhodzünu shücie, süu bu tinyhü chülieketuo la’ ” sishü.

¹⁰Süla Mosa mu Aron unie Faro mhodzünu vo di Jihova unie ki diekhakeshü kemhie chüshü; Aron-e puo theu kelhoupie Faro mu puo kituoko mhodzünu shüshü, sitse süu tinyhü chüta.

¹¹Sitse Faro rei puo themia mhakesitho mu themouko kieshü, mu Ijipt nu kemeduoko rei uko kepekhre do se di sükemhie chüshü.

¹²Uko pete rei u theu kelhoushü, mu süko tinyhü mevita.

¹³Sirei Faro meloue re ba zo, mu Jihova pukeshü tuoi di, puoe unie pfhe rünyü mvü ba zo.

¹⁴Sitse Jihovae Mosa ki, “Faro nou chü perewate, puoe themiako bu tuo mvü ba zo.

¹⁵Khise Faro ki vocie, puoe dzü nu voyacü la; kerükhie nu puo pfhethalie, siro n dzie nu kethe tinyhü mevikelieu se volie.

¹⁶Mu no puo ki, ‘Jihova, Ibriko Kepenuopfü, a ketsepie n ki shü di pucü, “A themiako bu tuotacie, uko bu rayha nu a liechüketuo la” isie. Derei no tsierei die süu ze mo ba zoluo.

¹⁷Jihova hakemhie puya, “Hageinu noe a Jihova zoücü silietuo.” Harie, a a dzie nu keba ketheu pie Nail rü nu dzüu vüshütuo, sitse süu thezie mevitatuo.

¹⁸Mu Nail rüu nu khuoko siatatuo, mu kerüu menachütatuo, tsiu Ijiptmiako Nail rüu nu dzü krie mecütatuo’ ” sishü.

¹⁹Jihovae Mosa ki, “Aron ki pushücie, ‘N theu pielie di n dzie yhase Ijipt dzüko mho, kerüko mho; dzüchako, dzükhouko, mu dzüthouko pete mhoshücie, di uko bu thezie mevitalie; sidi Ijipt kijü pete nu thezie batatuo, seikhouko nu rei mu ketsiekhouko nu rei,’ ” sishü.

²⁰Mosa mu Aron unie-e Jihova diekhakeshü kemhie chüshü; Faro mu kituoko mhingu ki nu puo theu yhapie Nail rüu nu dzüko vüshü, ru Nail rüu nu dzü pete thezie mevita.

²¹Sidi Nail nu khuoko siata, sitse Nail rüu mena phita; sidi Ijiptmiako bu Nail rüu nunu dzü krielie kenjüta, mu Ijipt kijü pete nu thezie tuota.

²²Derei Ijipt nu kemeduoko rei uko kepekhre doko se di sükemhie chüshü; süla Faro nou khrü ba zota, sidi puoe Jihova kepu mhiei di unie die rünyü mvü ba zota.

²³Faroe rüreilie di tuo puo kinu vota, mu puo hau rei pie puo nou shü mo zo.

²⁴Siro Ijiptmia pete dzü kekrie la Nail rüu khienu dzükhou ho, ukoe Nail rüu nunu dzü krielie kenjüketa la.

²⁵Jihovae Nail rüu vükeshü sie zha thenie vota.