Read Angami Naga Toukepra 8 Bible Online

Toukepra 8 - Angami Naga bible

Toukepra 8

¹Sitse Jihovae Mosa ki, “Faro ki vo di puo ki, ‘Jihova hakemhie puya: A themiako bu tuotacie, uko bu a lie chüketuo la.

²Derei mhanuü noe uko bu tuo mvüta ro, harie, a guorünuo pie n rüna pete pelhashütuo.

³Nail nu guorünuo thuo tshutatuo, di süko u kinu lertuo, n zhübou nu mu n zhü gei votuo, siro n kituoko mu n themia[7] kiko nu, n miphuko nu mu thoukenekhouko nu rei votuo.

⁴Guorünuokoe n gei mu n themiako tsiu n kituoko pete gei vortuo’ ” sishü.

⁵Siro Jihovae Mosa ki, “Aron ki pushülie, ‘N dzie nu n theu yhapie kerüko mho dzükhouko mho, mu dzüthouko mho shülie, sidi guorünuo chüpie Ijipt kijü pete mho shüwalie!’ ” sishü.

⁶Süla Aron Ijipt dzüko mho puo dzie yhashü; sitse guorünuoko par Ijipt kijü ketshu chülie.

⁷Derei kemeduoko rei uko kepekhre doko se di sükemhie chülie, sidi guorünuoko ze vor Ijipt kijü nu shü.

⁸Sitse Faroe Mosa mu Aron kieshü di unie ki, “Jihova bu a kinu mu a themiako kinu guorünuoko setanu di chashücie; sitse themiako bu vo Jihova ki ruosuo chüketuo la a uko bu tuolietuo,” sishü.

⁹Mosae Faro ki, “N la mu n kituoko la mu n themiako la, n gei mu n kiko nunu guorünuoko bie pejüwa di uko bu Nail rüu nu rübei batanukecü, kicükipuo chashü ro n nei shi, pushülie,” si.

¹⁰Puoe sie, “Sodu” sishü. Mosae sie, “Süu bu n kepu mhieliecie, sidi n bu Jihova hie Kepenuopfü tuoikecü miapuorei bakemo silieketuo la.

¹¹Guorünuoko n gei mu n kiko nunu tsiu n kituoko mu n themiako ki nu tuotatuo, ukoe Nail rüu nu rübei bacü zotatuo,” sishü.

¹²Süla Mosa mu Aron Faro kinu tuo prata, sidi Mosae guorünuoko la Jihova ki chashü, puoe Faro ze kepfhekhokeshü tuoi di.

¹³Siro Jihovae Mosa die kemhie chüshü; guorünuokoe kiko nu, phetsuoko nu mu lieko nunu siata.

¹⁴Sidi uko süko pfhü kengupie pfhepie zhüwa mu kijü mena phita.

¹⁵Derei Faroe rüü lakelie ngushü tse, puo nou re lata di unie die rünyü mvüta; Jihova pukeshü mhiei.

¹⁶Sitse Jihovae Mosa ki, “Aron ki pushülie, ‘N theu yhapie kijü nu nyopheko vüshüi, uko bu Ijipt kijü pete nu zieko-mimhienuo chülieketuo la’ ” sishü.

¹⁷Sitse unie sükemhie chüshü; Aron-e puo dzie nu ketheu yha se kijü nu nyophe vüshü, ru zieko-mimhienuo themia mu khunuoko gei vorta; Ijipt kijü nu nyophe pete zieko-mimhienuo chüta.

¹⁸Siro kemeduoko rei uko kepekhre doko se di zieko-mimhienuo se parshütuoü di thehie chü, derei chülie kenjüta. Sidi zieko-mimhienuo themia gei mu khunuo gei tshuta.

¹⁹Sitse kemeduokoe Faro ki, “Hau we Ukepenuopfü dziekinuoute” sita. Derei Faro nou chü perewa, sidi puoe unie die rünyü mvüta; Jihova pukeshü mhie.

²⁰Süsie Jihova Mosa ki, “No khiserüna sielie, di Faro kerü nu vokecü ki puo ze kesecie, sidi puo ki, ‘Jihova hakemhie puya: A themiako bu tuotacie, uko bu a lie chüketuo la.

²¹Morei, mhanuü no a themiako bu tuo mvü ro, harie, a teizie krodi ketsepie n gei mu n thekeko gei mu n themiako gei mu n kiko nu shütuo; siro Ijiptmia kiko nu mu uko keba pheko nu rei teizie bu tshutatuo.

²²Derei sünhiesü a Goshen kijü, a themia bayakecüu kho pekreishütuo, sidi sünu teizie krodi puorei bu balie lho, n bu kijü hau nu a Jihova zoücü silieketuo la.

²³Sidi ae a themiako mu n themiako kho kekreishütuo.[8] Zasi hau sodu batatuo” sishü.

²⁴Mu Jihovae sü kemhie chüshü; teizie krodidi chü Faro kinu mu puo kituoko kinu vorta, mu Ijipt kijü pete nu teizie la kijüu bie pesuowa.

²⁵Süsie Faro Mosa mu Aron unie kielie di sie, “Volie, di kijü hau nunu nie Kepenuopfü ki ruosuo chüliecie” sita.

²⁶Mosa sie, “Süu sidi chükecü puo toulie lho; hie-e Jihova hie Kepenuopfü ki ruosuo kechü Ijiptmiako mhodzü mha kerütse kro puo zotuocü la. Mhanuü hie Ijiptmiako mhingu nu chüshü ro, uko ketsie pie hieko vatalie lho me?

²⁷Hieko rayha nu zha se tuo nu vo di Jihova hie Kepenuopfü hie ki diekhakeshü tuoi ruosuo chü morosuo bei zo” sishü.

²⁸Süla Faro sie, “A nie bu vo rayha nu Jihova nie Kepenuopfü ki ruosuo chüketuo la voketuo khashütuo, tuou tuo pecieta hie; a la nie Kepenuopfü ki chashücie” sita.

²⁹Süsie Mosae sie, “Harie, a n ki nu tuo patazhie mu a teizie krodiko bu Faro ki nu, puo kituoko kinu mu puo themiako kinu sodu tuotaketuo la Jihova ki chashütuo. Faro bu cürü lata hie, themiako bu vo Jihova ki ruosuo chüketuo khashü mvü lata di,” sishü.

³⁰Süla Mosae Faro ki nu prata di Jihova ki chashü.

³¹Siro Jihovae Mosa chakeshü tuoi chüshü, sidi teizie krodiko Faro gei, puo kituoko kinu, mu puo themiako kinu yopuorei ba sa mota.

³²Derei tsieu va rei Faro puo nou re lata, sidi themiako bu tuo mvüta.