Read Angami Naga Toukepra 9 Bible Online

Toukepra 9 - Angami Naga bible

Toukepra 9

¹Süsie Jihova Mosa ki, “Faro ki vo di pushücie, ‘Ibriko Kepenuopfü Jihova hakemhie di puya: A themiako bu tuotacie, uko bu a lie chüketuo la.

²Noe tsierei uko bu tuo mvü di uko kha ze ba zo ro,

³harie, Jihova dzieue thesa kere se puo se n lie nu ketuo n kiriko, gurako, gadako, utko, thukroko, mu tekuo kroko gei shütuo.

⁴Derei Jihova Israelko kiriko mu Ijiptko kiri kho kekreishütuo, sidi Israel vieko puorei siatalie lho’ ” sita.

⁵Sitse Jihova puotei puo chieshü di, pukecü, “Sodu Jihova kijüu gei mha hau chüshütuo” sishü.

⁶Sidi süsie nhie Jihova mha hau chüshü; Ijiptmia kiriko pete siata, derei Israelko kiri we yopuo zorei siata mo.

⁷Sitse Faroe mia ketsepie ketso ru Israelko kiri puo rei siata kemo silie. Derei Faro nou chü perewata, sidi puoe themiako bu tuo mvüta.

⁸Siro Jihovae Mosa mu Aron unie ki, “Miphu nunu migo thedzie ketshu pielie, sidi Mosa bu Faro mhodzünu nu süko kelhoupie teitsa vashülie.

⁹Sitse süu Ijipt kijü pete mho nyophe kememhie chütatuo, sidi Ijipt kijü pete nu tichü thuo themia gei mu khunuo gei chü partuo.”

¹⁰Süla unie miphu nunu migo pielie, di Faro mhodzünu thalie, sidi Mosae süko kelhoupie teitsa vashü, sitse süko themia gei mu khunuo gei tichü chü parta.

¹¹Siro tichü la kemeduoko rei Mosa mhodzü thalie kenjüta, tichüe kemeduoko gei mu Ijiptmia pete gei baketa la.

¹²Derei Jihovae Faro nou chü perewa, sidi puoe unie pfhe rünyü mvüta; Jihova Mosa ki pukeshü mhiei.

¹³Sitse Jihova Mosa ki, “Khiserüna sielie di vo Faro mhodzü thalie, sidi puo ki pushülie, ‘Jihovae Ibriko Kepenuopfü hakemhie puya: A themiako bu tuotacie, uko bu a lie chüketuo la.

¹⁴Tsieu va a thesa puo ketsepie n gei mu n kituoko gei, mu n themiako gei shütuo, kijü nu a tuoikecü miapuorei tuo kemo n bu silieketuo la.

¹⁵Tsiewe a dzie khashü di thepie pie no mu n themiako pechüshü ro kijüu nunu n dathewata zotuo.

¹⁶Derei hau la a n perheipie ba, a kekuo pie n pesishütuoü, kijü pete nu a za pu pesishüketuo la.

¹⁷No tsierei n thuo n chü pezhapie a themiako petsou ba, sidi uko bu tuo mvü ba zo.

¹⁸Harie, sodu ha meseki a prü bu krü se tsurtuo, Ijipt kijü chülie tse nunu vor tsie ketso mhakipuorei süde krüya mo.

¹⁹Süla tsie mia ketseshü di, nie kiri mu terha nie vie ketuo se puo keya kenyi nu vortalie, kekreilamonyü themia rei khunuo rei ze kinu vorta mo di terha ketuo khe gei prüu tsurtuo, mu ukoe siatatuo’ ” sita.

²⁰Sitse Faro kituoko donu Jihova die kepreimia u diemia mu u kiriko bu ta kinu vortatuo;

²¹derei Jihova die pie mhaükemo khe u diemia mu u kicükiri pie terha bawatuo.

²²Sitse Jihovae Mosa ki, “N dzie yhapie teibo vashüi kijü pete nu prü bu themia gei, khunuo gei mu lie nu nha pete gei, siro Ijipt kijü puochapuochie pete nu krü tsurlieketuo la” si.

²³Sitse Mosae puo theu yhapie teitsa vashü ru; Jihovae teikese mu prü ketseshü, mu mi te kijü nu tsurta; sidi Jihova Ijipt kijü nu prü pekrüshü;

²⁴prü krü mu prü donu mi meva si ba zota, prü krüthorshü zo, Ijipt-e seyie puo chükelie sie Ijipt kijü pete nu mhakipuorei süde krü chie mo.

²⁵Sidi Ijipt kijü puochapuochie nu prü bu mha pete vawa, themia mu khunuo rei mu lie nu nha pete vawa, mu terha seiko pete vatshevatshawa.

²⁶Israelko keba Goshen kijü nu rübei prü krükemo zo.

²⁷Sitse Faroe mia ketsepie Mosa mu Aron unie kishü di sie, “A tsieu va phoumawate Jihovae mezhü zo, a mu a themiako jote.

²⁸Jihova ki chashücie, teikese mu prükekrü hau hai zorei vite; a nieko bu tuolietuo, mu nie bu ba salie lhote” si.

²⁹Mosa puo ki, “A nadi nunu pralie mumetha ae Jihova ki a dzie yhashütuo; sitse teise motatuo, sidi prü bu krü motatuo, n bu kijüue Jihova vie zoücü silieketuo la.

³⁰Derei no mu n kituoko we, tsierei Jihova preilie mo zokecü a si ba” sita.

³¹(Flax mu barli lha we peka phrewa, Barli lha we puokre pfü ba mu Flaxnhapfü pou thebe batacü la.

³²Derei thoulha mu nhalha we pekawa mo, hanie we rüchü menuokecü la.)

³³Süla Mosae Faro nadiu nunu prata, di puo dzie yhapie Jihova ki shü; ru teikese mu prükekrü khawata, mu tei rüpie kijü va sa mota.

³⁴Derei Faroe teirü, prükekrü mu teise sa moketa ngu tse, puo phouma lata, di puo noure lalie, puo mu puo kituoko rei.

³⁵Sidi Faro nou chü perewa, di puo Israelko bu tuo mvüta; Jihova Mosa geinu pukeshü tuoi.