Read Angami Naga Job 1 Bible Online

Job 1 - Angami Naga bible

Job 1

¹Thiedzü Uz rüna nu mia puo tuo, puo za Job. Themia süu vitsei mu mezhü, tsiu Ukepenuopfü khrüprei, siro mha kesuou rütseya.

²Siro thepfumia thenie mu thenumia se penuopie puo tsü.

³Puoe tekuo nyie thenie, ut nyie se, mhatho thu krie pengou, gadapfü krie pengou mu kituomia kekra nyi; süla puoe niathutsa themia pete donu kezhatho chü.

⁴Puo nuo thepfukoe vo huoniehuo kinu thehethehie chüchüya, ukoe teisozha pethopie mia puopuo tsüya; sidi uko mia ketse pie uko üpfünuo seko kie di uko bu vo uko ze hieya.

⁵Siro uko thehethehie kechü zhako tseita ro Job-e sielie di uko phou chükemesaya, mu khise sie zilie di uko mia kedithede shikecüu medzi di puoe kethe ruosuo chüya; kekreilamonyü Job-e sie, “A nuonuoko kekrükedeiwa mu uko nou nu Ukepenuopfü rüsewa rei silie lho mu” iya. Hamhiekecü Job-e chü seiya.

⁶Khunhie puo Ukepenuopfü nuonuoko u thuo u khapie Jihova mhodzü shütuoü vor, mu Satan[1] rei uko donu vor.

⁷Sitse Jihova sie, Satan ki, “No kirapuonu vor ga?” idi ketso. Satan Jihova die kela di sie, “Kijü nu rühou lukihaki vo mu sünunu tuo kho mu ke tuo di vor we,” sita.

⁸Sitse Jihova sie Satan ki, “No a kituou Job dze leshüya nhie? Kijüu nu themia puo kemhiekecü puorei tuo mo zo, puo vitsei tsiu themia kemezhü puo, puoe Kepenuopfü khrüpreiya, mu mhakesuou rütseya” sishü.

⁹Sitse Satan Jihova die kela di sie, “Job-e kemethuo nunu Kepenuopfü preiya üba me?

¹⁰No cakhapie puo khieümhou, puo kitiekinu mu puo mha keba pete houshü mo üme? No puo dzie mhatho gei theja khashü, süla puo kijü nu puo vienya kra miemieliete.

¹¹Derei no tsie n dzie yhashücie, sidi puo vie peteko nyüshücie, sitse puoe n mhodzünu nu n rüpfhürüsetatuo” si.

¹²Sitse Jihova sie Satan ki, “viwe, puo vie kedithede puo ba shi peteko n dzienu shüya, puo gei zokecü no n dzie yhashü hiecie” sishü. Sitse Satan-e Jihova mhodzünu nu tuota.

¹³Süsie khunhie puo, puo nuonuo thepfuko mu thenuko uko dzürie phichütho-u ki nunu mhacü mu khubezu krie keba ki,

¹⁴dieliemia puo Job ki vor di sie, “Mhatho thuko liephietuo, tsiu gadako uko khieki nha cütuo;

¹⁵ru Sabianmiako vor, di uko whuo zete, mu zhiecha pie kituoko dukhriwate, n ki rükhruotuoü a rübei lhiekeshü zo” sita.

¹⁶Puoe diepu keba nu themia kekreimia puo rei vor di sie, “Teigeinu Ukepenuopfü mi tetsur, sidi tekuoko, mu kituoko thewate, mu uko bie pejüwate, mu n ki rükhruoketuo la a rübei lhiekeshü zo” sita.

¹⁷Puo diepu ketha nu kekreimia puo rei vor di sie, “Chaldianmiako kro se chü vor di, utko ba nu ler, sidi utko whuo zete, sidi zhiecha pie, kituomiako dukhriwate; mu n ki rükhruoketuo la a rübei lhiekeshü zo” sita.

¹⁸Puo diepu ketha nu themia kekreimia puo rei vor di sie, “N nuonuo thepfuko mu thenuko phichütho-u ki nu mhacümhakrie ba,

¹⁹ru harie, nhatsa nunu teikhrie khriedi kemeriekecü puo vor, di kiu mvüdzeko biemewa, sidi süu me tsur u nuonuoko va di uko siate, tsiu n ki rükhroketuo la a rübei lhiekeshü zo” sita.

²⁰Sitse Job sie puo pfhenei cierhata, sidi puo tsü thiewa, mu te kijü tsu di rüsuota.

²¹Sidi puoe sie, “A methuo di a zuo va nunu vor, tsiu a methuo di tuo latatuo; Jihovae khashü, mu Jihova thuo zeliete; Jihova bu zapuzayie chüliecie” sita.

²²Mha hako pete nu Job-e phouma morei kekrü di Ukepenuopfü pejota mo.