Read Angami Naga Job 10 Bible Online

Job 10 - Angami Naga bible

Job 10

¹“A a thuo a kelhou mecüte, a panyaparakecü pie a thuo a gei shülietuo, a a ruopfü kemezhiekecü nunu dieputuo.

²A Ukepenuopfü ki putuo, No a pejota hiecie; kiüdi no a perhieya shi thapie a kieshücie.

³Mia pechüpenyükecü, no n thuo n dzie mhatho rütsekecü, mu kerüzhümia chüpie u neikeshü no süu üse viüya me?

⁴No uchüumo mhi pfü me? Morei no themia tuoi mha nguya me?

⁵N zhakoe themia teisozhako tuoi me? Morei n teicieko themia teicieko tuoi me?

⁶Siro no kiüdi a mha kesuo kechü ketsoya ga? Mu a kephouma pfhüya ga?

⁷A jomokecü no siba ze; mu miapuorei n dzie nunu tapralie lho zokecü la.

⁸N dzie thuo a chü a rhei phreshü, mu tsie no rürei par di a pekawate.

⁹No nyoba nunu a chü a rheikeshü rükrashücie; mu a chüpie nyophe nu shü lawatieya me?

¹⁰Thunudzü mhiei no a rushü moü me? Tsiu thunudzü khie tuoi a kerhüshü moü me?

¹¹No a zhü tsiu a chü pie a wheshü, tsiu a ru nu a zhüda pie a chü kemeguoshüte.

¹²No kerheiro mu kekhrie ketho pie a tsüshü; mu no a theke menuokeshü la a ruopfü sebalieya.

¹³Derei mha hako no n melou nu keviewate; hau n gei bakecü a si ba.

¹⁴A phoumawa üliro, no a mehoba, mu no a mha kesuokechü nunu a khashüwalie lho.

¹⁵A themia kerüzhümia puo üliro, a sü chülietie; A kemiathomia puo zo ürei, a a tsü pfü sielie lhote, thenga thuo a tshupfüliete, süla no a kemezhiekecü mehoshücie.

¹⁶“Losha tuoi noe a whuo di a whuokecü sie rei a whuo.

¹⁷No a pejokecüko kehie kesa lashüte, mu a kebvükecü chü pekrashü, noe rüpfhünuo kesa ze a whuote.[22]

¹⁸“Kiüdi no nuobvü nunu a se par ga? Miapuorei a ngu mo zokecünu a bu siata ücüwe,

¹⁹ae lhou vorkemo tuoita zotuo; nuobvü nunu a toupie mekhru nu votatuo.

²⁰A zhako tsa moü me?[23] A bu a rübeitacie, sitse a rülei zalietuo.

²¹A la vorlie kelho nu voketa mhodzü, kijü zeibouikecü, mu kesia khrüu nu voketa mhodzü,

²²zeibouikecü kijüu,[24] kezei mhie zokecüu, mu kesia khrüu nu thezho puorei ba kemora, tsiu kezieue kezei mhiekecü kijü nu” sishü.