Read Angami Naga Job 12 Bible Online

Job 12 - Angami Naga bible

Job 12

¹Süsie Job-e pu la di sie:

²“Nieko themia ükezhamia zo, mu mhasi nie ze siatatie.

³Derei a rei nieko mhiei mhasimhale a geituo; a nieko ki rünuokuo moze; supuonie mha hakemhieko si mo ba ga?

⁴Ae a zemiako krenyü chübate; a Ukepenuopfü kieshü, ru puo a die kelashü; miatho mu vitseikecü themiau, mia krenyü chübate.

⁵Themia rüü kebamia thenou kesuo ngu mecüya, derei ukoe u thatha khrukhre mo kebamia pfhe baya.

⁶Miaviesekecümia pfhekiko nu noune bate, mu Ukepenuopfü peseyakezhamia khrukhre bate, uko uko dzienu uko Kepenuopfü se vorya.

⁷“Derei nhachüko ketsoshücie, sitse süko n pethashütuo; teikhrie nu ketuo perako ketsoshücie, sitse süko n ki pushütuo;

⁸kijüu gei nhako ki pushücie, sitse süko n pethashütuo; mu dzükezha nu ketuo khuoko mha thapie n kieshütuo.

⁹Hako pete donu supuonie Jihova dzie thuo haha chüshükecü si mo ba ga?

¹⁰Puo dzie nu mha rheiketuo pedekejüko kerheiro, mu themia pedekejüko kerheiro puo dzienu baükecü.

¹¹U nyieto nunu mhapfhe silieya moü me? Mu u me nunu kecüca methaya moü me?

¹²Ketsamia gei mhasi baya me? Tsiu teisozha kecha geinu mhacamhala silieya me?

¹³“Ukepenuopfü mhasi mu kekuo ba; puoe tahitarholie kevi mu mhasimhale ba.

¹⁴Mhanuü puoe bietshebietshawa ro, miapuorei süu chü lalie kenjü; puoe miapuo khapie bawa ro, miapuorei süu khrü lalie kenjü.

¹⁵Puoe dzü khawa ro, süko sotaya; puoe süko pie chazou shüshü ro, süko kijü tshurünyietuotaya.

¹⁶Puo gei kekuo mu mhasi ba; mia bu puo sekewau mu mia sekeshüu kenienie puo vie.

¹⁷Puo mia tahitarhoyakezhako bie kemethuowaya, mu capiko bie penyawaya.

¹⁸Puoe kedimia chiepha phreishüya, tsiu chiepha pie uko chieca nu phashü.

¹⁹Puoe zievoko bu methuo di uko zetaya, kekuomiako chükelhouwaya.

²⁰Puoe pelelie kesümiako die chüpejüwaya, tsiu pehümia mhasi se setaya.

²¹Puoe thenga rupie kedinuoko gei shüwa, tsiu kekuomia chiepha bie kethachüwaya.

²²Puoe kezei nunu mhakesouko pfhü separlieya, tsiu kesia khrü separ kezie nu shülieya.

²³Puoe seyieko chüpekrashüya, di süko pekawaya; puoe seyieko chüpezhashüya, mu süko biepecü lawaya.

²⁴Puoe kijüu krütamia[30] mhasimhale chüsetaya, sidi uko bu cha kejü rayha nu rühou tuotaya.

²⁵Sükoe kezie sa mo di kezei nu rühoutuote, tsiu puoe uko bu kemezemia tuoi pevüvü tuoya.