Read Angami Naga Job 13 Bible Online

Job 13 - Angami Naga bible

Job 13

¹“Harie, a mhi-e hako pete nguwate, a nyie-e süu pfhe silie tsiu puocapuola silie.

²Nie kedipuo siba shi, a rei siba, a nieko ki thachü mo zo.

³Derei a Kuokejokejüu[31] ki mhaputuo, tsiu a a nyie hau se Ukepenuopfü mhodzünu pu nyüba.

⁴Derei niekoe, kemeda pie nyhüpekrawate; nieko pete rei kemethuo darukesimia chüte.

⁵He-i, nieko pete rei kemekrie bata ücü we, sitse süu nie mhasi chülietuo.

⁶Tsie a mezhüu rünyüliecie, tsiu a tie nu a mezhiemelokecü rünyüshücie.

⁷Nie Ukepenuopfü la tijütieya me? Mu puo la mhasekedatieya me?

⁸Nie puo kitsa vakuotatieya me? Nie Ukepenuopfü yapie di dieputieya me?

⁹Puo bu nie pfhü se parkeshü ki, süu nie la vituoüya me? Morei mia puoe mia sekedakeshü tuoi, nie-e puo sekedalietieya me?

¹⁰Nieko pekhre di nie nei si kreishü ro, puoe nie kerhie zotuo.

¹¹Puo kekuokezha se n chüpie n bu michieta motuoü me? Mu puo khrükeprei n gei tetsu motuoü me?

¹²Nie mhasiko sü mige mhasi mhie zo, mu dahouko rüga zo.

¹³“A bu a rübeishücie, sitse a diepushütuo, mu a gei mhakehoupuo bu rei phircie.

¹⁴A a chü pie a hu nu shü, mu a kerheiro pie a dzie nu shütuo me?

¹⁵Harie, puo a dukhriwa zotuo; a kemerü jüte,[32] sizorei a puo mhodzünu a mezhüko pu zotuo.

¹⁶A kelakelieu hauha zo, pelekemomia puo mhodzü vorlie lhokecüu la.

¹⁷A dieko rünyü menuoshücie, mu a pukeshüko bu n nyienu leliecie.

¹⁸Harie, a a nyieko keseliete; a üse mezhüülieketuo a siba.

¹⁹Supuonie a ze kemeütuoü ba ga? Mhanuü tsie a kemekrie batatuoü ro, a siatatie.

²⁰Mhaca kenie pie a tsücie, sitse a n kinu rüshütalie lho.

²¹A kinu n dzie chü setalie; tsiu no kemeriekecüu bu a kechü sa hietacie.

²²Süsie a kieshücie, sitse a n pfhekhoshütuo, morei a bu diepushücie, mu no a die kelashücie.

²³A mha kesuo kechüko, tsiu a kephoumako kedithede puota ga? A bu a kejokemouko mu a kephouma siliecie.

²⁴Kiüdi no n zie kevielie ta, di a üse n ngumvümiaüta ga?

²⁵Kiüdi no seinyü hepie lukihaki vo ketuo puo kechükede, mu seinyü kiketa puo whuotieya mu?

²⁶No mha kepfhü kro puo thupie a petsou bate, tsiu a khriesa ki kephoumako a bu riecü[33] batacü la.

²⁷No a phi pie seiphikha nu shüwate, tsiu a cha pete meho bate; no a phitshü gei puo khu thushüte.

²⁸Mha cie menaketa puo tuoi chükelie, mu pfhekhu bu cükewa puo tuoi, mia puo bu jütazhie.