Read Angami Naga Job 14 Bible Online

Job 14 - Angami Naga bible

Job 14

¹“Themia thenumia geinu penuo kevor puo tei keduoyo zo, tsiu kemezhiekecü thuo tshupfü.

²Puoe nyiepou tuoi parya, sidi rüwitaya, puoe teisükeyu tuoi tataya, sidi ba sa motaya.

³No n mhi pie themia sikecü puo gei shütieya me, tsiu a ze vo n ze dienyakecütieya me?

⁴Supuonie mha mesakemo puo nunu mha kemesa puo se parlie vi ga? Miapuorei ba mo.

⁵Uko zhako le sebate, mu Uko la thekhrü zhako noe si bate, mu no uko la puotei chiepiekebau, uko süu cie volie kenjü.

⁶Uko kinu rüreitalie, mu n kethelie,[34] sidi zhakhramia tuoi puo teisozhako pevo puo neilietuo.

⁷“Seibo puoe puo kemerü ba, süu wiwa zorei pou laparlieya, sidi puoco kemeneko jütaya mo.

⁸Puo mie kijü nunu tsa vota zorei, tsiu puo mvüu kijü nu siata zorei;

⁹sizorei dzü re kevi nunu süu pou lapartuo, sidi seibo kemedzü puo tuoi puoco thela partuo.

¹⁰Derei themiae siataya, tsiu cieürietaya; themia keha thelau khashüwa, sitse puo kirapuo tuotaya ga?

¹¹Dzükezha nu dzü ba motayakezha tuoi, tsiu kerüu zeta di sotaya kezha tuoi.

¹²Sütuoi themia tsu zhüta tse, la sier motaya; teiko jüta kemochie puo cosierlie lho, morei puo keze nunu puo kesoulie lho.

¹³He-i, n noupfhünouyie jüta kemochie, no Sheol nunu a kevie se balieücü we, no a la puotei puo kesepie ba di a rükra shüücüwe.

¹⁴Mia puoe siata liro, puoe rhei lalie vi me? A teisozhako chiepiekeba chie, a shüphrashüketuo teiu vor kemochie a pfhebatuo.

¹⁵No a kieshütuo, sitse a n pfhe khoshütuo; no n dzie mhathoko ngu n neilietuo.

¹⁶Sitse no a phichako phrü motatuo; mu no a kephoumako rei meho motatuo.

¹⁷a kejokemouko likhuo puo nu khapie bawatuo, tsiu noe a kesuokechüko whewatatuo.

¹⁸“Derei kijüthou tetsur mu biechie pejüwa, tsiu tsiekrieu puotha nunu bie kediwate;

¹⁹dzüe ketsieko chü kemejuwaya; dzükoe kijüu gei nyophe zoupfütaya; sütuoi no themia merüketuou pekawaya.

²⁰No kechachie uko petsou seituoya zo, sidi uko votaya; uko kengu zieu chükediwa di uko ketsewaya.

²¹U nuonuoko therhu pfülieya, tsiu ukoe süu siya mo; mu sükoe thachüta, derei ukoe süko dze siya mo.

²²Ukoe u mo gei kechüu rübei siya, tsiu u thuo uko krü kraya” sishü.