Read Angami Naga Job 15 Bible Online

Job 15 - Angami Naga bible

Job 15

¹Sitse Elifaz Teman-u puo die kela di sie:

²Mhakesimia puoe diethuodieruo pu, tsiu niathutsa teikhrieu üse puo tshupfüketuo meseü me?

³Puoe puo keprakemevi kejü die, morei se mha kevi chülie kelho die se keprüli keba mese me?

⁴Derei noe Ukepenuopfü prei mote, tsiu Ukepenuopfü mhodzü mhalemedokecü kekha sebate.

⁵Kekreilamonyü kesuokechüue n tie petha, mu no udo kevimia diepuu kedaliete.

⁶A monyü n tie thuo n pejo bate; n die thuo n petsou bate.

⁷No penuo kevor themia kerietho-uü me? Morei kijükhruko chükelie mhodzü tuotaü me?

⁸No Ukepenuopfü pekhreko rünyüwate me? Mu n thuo n rübei mhasi üya me?

⁹Hie si kemo no mhakikecüpuo si ba ga? Hie gei tuokemo, no mhakesikele kikecü puo ba ga?

¹⁰Hie donu, n puo ki rei phichükuo, tsiu u tsü rüpou mu tsatoketamia ba.

¹¹Ukepenuopfü thenou thupeluokeshüko n la tsathor me? Morei n gei mha kepekhre huo tuo me?

¹²Kiüdi n melou bu n hüze lutsa votatieya ga? Tsiu kiüdi n mhi mephrie ba ga?

¹³Sidi n ruopfü Ukepenuopfü petsou, tsiu die haikecü putieya le?

¹⁴Themia ha kedipuo üdi mesalietuo ga? Morei thenumia geinu penuo kevor-u kedipuomhie di miatholietuo ga?

¹⁵Harie, Ukepenuopfü puo kemesako rei peleya mo; mu teiko zorei puo mhodzüki mesa mo zo.

¹⁶Themia mha kesuo dzü kemhiei di krie kezhau kidepuo kerütse mu rhu shi?

¹⁷“A n pekieshütuo, a pfhe rünyüliecie mu a mhi pie nguwaketau a tha pekieshütuo.

¹⁸Süusü mhakesimia u puonuoe u ki pushü, tsiu ukoe süu keviewa.

¹⁹Kijü khapie süko ki rübei shü; tsiu uko donu rüsorünamia puorei tuo vo mo.

²⁰Kerüzhü teisozha pete kemezhiekecü geinu meyhumezhie baya, tsiu teicie peteu mha kesuo kechü la khapie bate.

²¹Puo nyieto nu mhapfhe kemeriekecü puo tuo; puoe mhanyikeba ki mha pekawayakezhau puo gei phirtuo.

²²Ukoe kezei nunu lataketuo preiya, tsiu zhiechae puo pfhe ba.

²³Ukoe chazou kecüca pfhü rühou di sie, ‘Süu kirapuo ba ga?’ situoya. Puoe teisozha kezeiu puo penuo keba siba.

²⁴Kemezhiekecü mu meyhumezhiekecü la ukoe kemichie bate; kedimia puo terhü nu votuoü dojü se keba tuoi, ukoe puo petsoutuo.

²⁵Kekreilamonyü ukoe uko dzie yhapie Ukepenuopfü petsoute, tsiu u thuo sie Kuokejokejüu[35] petsoute.

²⁶Puoe thethochü puo petsou di pezhü zhüdi se ta puo whuo zo.

²⁷Kekreilamonyü ukoe uko keluo bu uko zie zepfülie, tsiu uko chieca nu luoliete.

²⁸Sidi nadiko ka ketara, tsiu themia ba kelho rakezhü kiko nu; mha kepeka pfhepie kezhü kikonu lhouya;

²⁹ukoe mhanyilie lho, morei uko kinyi balie lho, morei kijü nu uko mie kre reilie lho;

³⁰ukoe kezei nunu tapralie lho; miü bu uko thewatuo, siro teikhrie thuo uko nuopouko whepfütatuo.

³¹Uko bu u seyakezha kemethuo peleta hiecie, kemethuo pie uko zhakhra chüshütuocü la.

³²Puoteiu mhodzü süu kha tseishüwatuo, tsiu uko coko pejorükhripfü balie lho.

³³Ukoe mekemo khubesi kemhiei kenieriewatuo, tsiu Oliv tuoi puopou rürhotatuo.

³⁴Kekreilamonyü Ukepenuopfü sakemomia puo si vülie lho, tsiu mi-e thesokeliemia pfhekiko thewatuo.

³⁵Uko thedokesuo rhülieya, sidi mhakesuo se vorya, uko noue miasekedokecü la dojü baya” sishü.