Read Angami Naga Job 16 Bible Online

Job 16 - Angami Naga bible

Job 16

¹Job-e uko die kela di:

²“A mha sükemhiekecü kekra siwate; nieko pete rei mia nouthupeluolie kemomia phre zo.

³Kemethuokemeruo die kepu puo thela ba me? Morei kedipuonie nieko chü kethepfushü di nieko bu a die kelalie ba ga?

⁴A rei nieko kemhie di pulie vi ba; mhanuü nieko a tha nu bacü we; a die kekra pu nieko petsoulie vi, tsiu nieko gei a tsü tsügeta zotuo.

⁵A tie pie nieko chü kethepfushütuo, mu a die pie nieko nouzhie thu peluoshüwalie vi.

⁶“A diepu zorei, a noukesuou chü kemenelie mo zo; tsiu a shüge ba zorei, süu kidepuo a therhielie ta?

⁷Derei tsie Ukepenuopfü a chüpie a bu a nyie bate, puoe[36] a kromia pete bu u dzükekou chübate.

⁸Puo a bu rütherünhepfü bate, süsü a petsoukecü zhapu puota zo; mu a we miemieta zhükecü a zie gei rei zasi thashü bata zo.

⁹Puo puo noupfhü nunu a cierhawate, mu a ngumecüya; puoe a gei puo hu thegei pie bate, a ngumvümia u mhi pekhrei pie a meho bate.

¹⁰Uko u me mekuopfü di a mehoterü bate; uko a pesepie mhapuochü di a dzo vü; uko kepekrolie di a petsoubate.

¹¹Ukepenuopfü a khapie pelekemoko dzie nu shüwa, mu themia kerüzhüko dzie nu shüwate.

¹²A lhou rüü vor zo, derei puo a cierha pie lutsahatsa vawate; puoe a vo metshülie di a kepfhütshie phawate, sidi a pie puoe rü kebamia puo chüwate;

¹³puo theükepieko a houpfü ba. Puoe a mecünie thu khopie kekreiwa, mu nouzhie kejü chü; puoe a thesie rupie kijü shüshü.

¹⁴Puoe a petsou la vorya, puoe terhümiavimia tuoi a petsou phir.

¹⁵A gakhropfhe terhü pie a mo whelie, mu a kekuou nyophe nu zhüte.

¹⁶Kekra la a zie meriete, tsiu a mhinhe zeide-ite.

¹⁷A dzie se mha peka mo, mu a kechae mesa zo ürei.

¹⁸“He-i kijü, no a zie krukezhü whewa hiecie, mu a kekra bu kerülei tha puo rei ngu hie.

¹⁹Harie, tsie zorei, a zhapuu teigei ba, tsiu a dze thupiekezhü pesogei ba.

²⁰A zeko a kre; derei a mhi-e mhidzü pekrü pie Ukepenuopfü tsü.

²¹Mia puoe puo siezanuomia la mhachayakezha tuoi, Ukepenuopfü ze di themia mezhüu meza sebalie ücüwe!

²²Teicie huoyo sa ro, ae la vorya kemo cha nu votatuo.