Read Angami Naga Job 19 Bible Online

Job 19 - Angami Naga bible

Job 19

¹Süsie Job-e puo die kela di sie:

²“Nieko kedithechiepuo diepu a keyhu, mu a kechakhri zo batieya ga?

³Nieko va ker hako a mese chü, nieko a gei kekrükeshü ha menga ba mo zo me?

⁴Mhanuü a kekrüwaketa la üliro, a kejoko a thuo a gei ba ze.

⁵Mhanüu nie thuo nie chüpezha pie a petsou zorei, tsiu a gei kemezhiekecü vorketako se a petsoutuoü rei,

⁶Ukepenuopfü a kelhou pie puotou kemo nu shüwata ücü, mu puo jal pie a bo sebaketa siliecie.

⁷Süsie, a kra di “Kebvütelie!” ishü zorei a pfhekhoshü mote, süsie a puo kie petoshü, derei kethocau tuo mote.

⁸Puo cakhapie a houliete, süla a parlie kenjüte, tsiu puoe kezei pie a chako nu shüshüte.

⁹Puoe a thetshetherhu chü sete, tsiu a tsü gei keditsüreu sete.

¹⁰Puoe lutsahatsa nu a pekawate, mu a sü vote, siro puoe a kemerüu seibo tuoi phewate.

¹¹Puoe puo noupfhünouyie puopie a petsou bate, mu a pie puo ngumvümiaü bate.

¹²Puo rüpfhünuoko ze vo kengulie, di uko a retuoü mhathoko chüpie a pfhekiu khieümhou razhüchü houpfü bate.

¹³“Puoe a kikruko bu a ze kepetsete, mu a kesimiako bu rei a khakewa chüta.

¹⁴A seyieko mu a khriethoko a rükra mote.

¹⁵A kinu keba a somiako a rükra mote, a kituopfüko rei a üse uko mhodzüki sikemo themia puo kemhiete.

¹⁶A a kituou kieshü, derei puo a pfhekho mo; a thuo puo ki a mezhiemelo phi zo.

¹⁷A keha thesüe a kimiae pfhü bate, mu a kikru zorei a ngu mecüte.

¹⁸Nhicuko rei a mecüte; a siethakesie ki, uko a petsoute.

¹⁹A zemia a noulieko pete a rütsete, mu a themia khrieyakezhako rei a petsoute.

²⁰A ruko a zhü a chü dapfübate, mu a kesia nunu talie zieta zo.

²¹He-i nie a kezemiako, a ngumezhiecie, a ngumezhiecie, kekreilamonyü Ukepenuopfü dzie a bieshüte!

²²Kiüdi nie Ukepenuopfü tuoi, a pechüya ga? Kiüdi a chü ngushü di ci zorei vite, silie mo ga?

²³“He-i, tsie a dieko thu pie zhüta ücü we! He-i, süko pie leshüda puo chülie ücü we!

²⁴He-i sükosü thegi kethusei mu guli chüpie thupie zhüwa, tsiu thegi pie tsiekrie gei thu pie kechachie zhüta ücü we!

²⁵A Rhakelieu[37] rhei tuokecü a si tou, mu puo tsiesie kijü[38] gei thalietuo;

²⁶a zhü a mo kewheu thuo kata zorei, a a chü nunu Ukepenuopfü ngu zotuo.

²⁷A a thuo puo mehotuo, tsiu a mhi puo meho zotuo, mu kekreimia meholie lho. A meloue a nounu mezie bate!

²⁸Derei niekoe sie, ‘Kimhie di we puo pechütuo ga!’ Süu, ‘Puocapuolau puo geinu nguliete eru’ isi.

²⁹Zhiechau preiliecie, kekreilamonyü noupfüe zhiecha geinu siazhau se vorya, sitse nie bu capikechü puo ba ükecü silietuo.”